N Daana, hom de tomam bɔŋa zen'an to buuri saŋa woo poan
90
1 N Daana, hom de tomam bɔŋa zen'an to buuri saŋa woo poan. 2 Zɔya wa en ta bɔna la, bii hom ta naam teŋparɛ wa la teŋa wa la, ze'ele pɔhega yɛ'a ba'ahegɔ hom pon dɛna la Yenɛ.3 Hom ne bahɛ te nɛresaaleba lebege tentɔnɔ. Ho ne yele ba yeti, Asaala, lebe tentɔnɔ la poan. 4 Yuuma tuhure hom nɛŋan ane mɛ wo daanyenɛ, bii yu'uŋɔ en tole la.
5 Ho piie ba mɛ woo ko'om uue na la, te ba ki. Ba ane woo mɔɔ en yehere bolika na la, 6 ne ma'ɛn bolika soŋa, ge zanɔɔrɛ, ko ne zɛnkɛ mɛ ku'e. 7 Ho sunsunyiim la dite to mɛ. Dabeem en kɛn' tɔ la ho sunsunya la. 8 Ho dekɛ tomam tuure wa biŋe la ho nɛŋan. Tomam sogɛ tona be'em sebo la woo gan' la ho nɛɛhom la nɛŋan.
9 Tomam vom dabeha woo dole la ho sunsunyiim la poan ta ba'ahɛ. Tomam yuuma ba'ahɛ mɛ la sin'iŋɔ. 10 Tomam vom yuuma zan'an dela yuuma Pihiyopɔe ma'an, bii to han kpe'em, la paɛ yuuma pihinii, ge la bala zan'an, to boe la daaŋɔ, la sunsagaŋɔ poan. La kan yuue, la to yuuma la n ba'ahɛ. 11 Ane mi' ho sunsunyiim wa paŋa beene. Ho sunsunyiim la tare la dabeem wo ho mɛŋa la. 12 Pa'alɛ to te to mina te to dabeha ka zo'e, la to tara yam.
13 Na'ayenɛ, bahɛ bala. Wane ma'an te la wan ba'ahɛ? Zɔ ho yamehe wa ninbɔn'ɔn. 14 Diihe to bolika la ho nɔŋerɛ kantɛ la, te to yoona la nyeema, la popeelom to vom dabeha woo poan. 15 Bo' to nyeema dabeha la zo'e wo dabahese'a te ho pogolom to la. Bahɛ te a zo'e wo to daaŋɔ yuuma la. 16 Bahɛ te ho tooma nɛɛ ho yamehe wa poan na, te ho na'am kpe'eŋo bɔna ba kɔma zuo. 17 Bahɛ te hom to Daana Yenɛ wa ninbɔn'zɔrɛ bɔna to zuo. Bahɛ te to sɛla woo eta soŋa. Ɛɛn, bahɛ te to sɛla woo eta soŋa bɔ'ɔra tɔ.