Yenɛ, bene te ho zagahɛ tɔ bala wuuha?
74
1 Yenɛ, bene te ho zagahɛ tɔ bala wuuha? Bene te hom sunsunyiim taɛ ho mɛŋa piihe dita? 2 Tɛnra ho nɛreba la te ho yuum lagahɛ ba la, sɛba te ho mɛŋa yɔ to'e ba te ba dɛna ho mɛŋa sɔ'ɔlom buuri la. Tɛnra Zion Zoore la n de ho bɔŋa zen'an la. 3 Wa'an ho Yire la poan na behɛ, dima la sagom dela zan'an.4 Diŋdoma la voole mɛ kɛn' ho toolom zen'an la na, sɛ ba sɔ'ɔlom danlehom bini. 5 Ba wɛgɛ zuɔ bɔba nayaŋa la mɛ la lea bahɛ. 6 Ge dekɛ ketehe, la zaanrɛ lagɛ lɔgɔseto n dekɛ golɛ de poan la bahɛ. 7 Ba nyɔ' ho Yire la mɛ la bugum te de di kula. Ba ganlom ho Yire la mɛ, zen'an te hom yu'urɛ bɔna la. 8 Ba yele ba sunya poan yeti, To wan sagom ba lipi. Ba doohe teŋa la poan zan'an mɛ nyɔ' zen'sɛka woo te ba po'oha Yenɛ bini. 9 To ka le nyɛta nyalema. Nɔtɔgɔha ka le bɔna. To ka mi' wana wa n wan ba'ahɛ se'em ma'an.
10 Yenɛ, hom bote dima wa kɛhɛ hɔ ta paɛ la wane ma'an? Dima wa wan kɛhera ho yu'urɛ wa la bala yɛ'ɛha? 11 Bene te ho foe ho nu'o to poan? Wane te hom kan sagom ba?
12 Ge la bala zan'an, Yenɛ wa n de mam naba wa pon bɔna la bala de beeren na, tona faanrɛ tooma teŋparɛ wa zuo. 13 Ho mɛŋa paŋa n dekɛ yelege ko'kantɛ la yema yema, ge wɔnrɛ ko'om poan bonsɛ'doma la zuto. 14 Hom n wɔnrɛ bonsɛla sɛka n de Leviatan la zuo, dekɛ en bo mɔen dunhe te ba obe en. 15 Hom bahɛ te bulehe la ko'nini tanhɛ bula na. Hom bahɛ te kolehe se'ehe n perɛ la ko'om keenhera. 16 Hom sɔe beyiine, ge sɔna yu'uŋɔ. Hom maalɛ ŋmarega la wontɛɛŋa yagelɛ ba yaka zan'an. 17 Hom n sɛ teŋparɛ wa beene woo ze'ele. Hom naam oonɛ, la seɔn.
18 Na'ayenɛ, tɛnra dima la n kɛhere hɔ, te nɛreyooro toora ho yu'urɛ la se'em la. 19 Da dekɛ ho dayene wa eŋɛ mɔen dunhe wa nu'uhen. Da malom tamɛ ho nɛreba wa muguhego wa yele. 20 Da tamɛ ho nɔbiŋere la, ge nɛresɛba n bote gbirigere n sogɛ teŋa la poan gbita. 21 Da bahɛ te nyanɛ di sɛba n boe muguhego poan wa. Bahɛ te taromdoma, la nahadoma nyaŋɛ pɛngɛ ho yu'urɛ. 22 Yenɛ, ihege tɔgɛ. Tɛnra nɛreyooro wa en kɛhere ho yu'urɛ daarɛ woo se'em la. 23 Da tamɛ nɔyalegerɛ se'ere te ho diŋdoma la tom ho la. Da tamɛ ho diŋdoma wa n tanhere se'em saŋa woo wa.