Na'ayenɛ, mam sogɛ la hom poan
71
1 Na'ayenɛ, mam sogɛ la hom poan, da bahɛ te vi malom di mam. 2 Ze'ele ho tontɔɔ bɔŋa la poan fan' mam. Kelehe mam, ge fan' mam bahɛ. 3 Dɛna mam taŋa te n bɔna ho poan saŋa woo. Bo' nɔɔrɛ te n nyɛ faanrɛ.4 N Yenɛ wa, fan' mam toonfɛn'ɛhadoma nu'uhen bahɛ. Fan' mam be'emdoma, la nɛre wuruba nu'uhen bahɛ. 5 Hom poan te mam tara potɛn'ɛrɛ n Daana, hom Na'ayenɛ te mam nam n bilomen na. 6 Hom gure mam n dɔgom poan na. Hom bahɛ te mam dɔgɔ mam na. Hom te mam wan pɛngera saŋa woo.
7 Mam dela nɛre nyanleŋa nɛreba zo'e zo'e nɛŋan, ge hom de mam paŋa zan'an. 8 Mam nɔɔrɛ perɛ mɛ la hom pɛnka, la hom na'ahegɔ dabaherɛ zan'an. 9 Da bahɛ mam n boraa yan'anɛ poan, bii ho zagahɛ mam n paŋa ba'ahegɔ saŋa. 10 Mam diŋdoma tɔgɔre la mam yele, sɛba n eere mam kum la lagahe la taaba mam zuo. 11 Ba yeti taaba yeti, Yenɛ nya zagahɛ n mɛ. To dige en nyɔkɛ. Se'em ka boe wan fan' en bahɛ. 12 N Yenɛ wa, da zaan la mam. Kanbelɛ soŋɛ mam. 13 Sɛba n muguhere mam vom wa la, bahɛ te vi di ba wo bugum la. Bahɛ te yaalegɔ to'e ba, te nyanɛ kɛn' sɛba n eere ba pogolom mam la. 14 Ge mam potɛn'ɛrɛ boe la hom poan. N wan pɛngɛ hɔ, malom pɛngɛ. 15 Mam nɔɔrɛ wa wan mɔɔlɛ ho tontɔɔ yɛla la, la ho faanrɛ yɛla la n zo'e gaŋɛ la, bolika paara yu'uŋɔ. 16 Mam wan pɛngera Daana Na'ayenɛ toonkanra la. Mam wan tɛnra la hom ma'an tontɔɔ yɛla la.
17 Yenɛ, mam bonbilomen ha te ho pa'alɛ mam, tara tara la zina, mam kelom mɔɔla la ho nyalematooma la. 18 Bala, Yenɛ, da bahɛ mam n korogerɛ saŋa, bii n boraa yan'anɛ saŋa, tara mam bala te n ta mɔɔlɛ ho paŋa yɛla wa bo buuri se'a woo saŋa n kene na la ba'ahɛ. 19 Ho paŋa la ho tontɔɔ bɔŋa la ka tare tɛka. Ho tom la toonkanra. Yenɛ, ane n boe wona la hom?
20 Hom se'em n bahɛ te mam nyɛ daaŋɔ, la sunsagaŋɔ wa wan le bo mam paŋa. Ho wan le ve'e mam teŋa teŋa ihege na. Ho wan le dooe mam ihege. 21 Ho wan le bahɛ te n tara zuo, ge bo mam sunbogohom.
22 Mam Yenɛ wa, n wan ŋmɛ' gonlegɔ pɛngɛ hɔ, la hom n de birikindaana la. N wan ŋmɛ' duureŋa pɛngɛ hom se'em Israel fa'a Yenɛ wa. 23 Mam nɔɔrɛ wan baana la popeelom pɛngera hom, te n potɛn'ɛrɛ se'ere te ho fan' bahɛ la me pɛngera hɔ. 24 Bolika yɛ'a yu'uŋɔ, mam nɔɔrɛ wan tɔgɔra la ho tontɔɔ soŋorɛ la. Se'ere n sɔe la, vi la nyanɛ di sɛba n tɛn'ɛhere ne te n nyɛ pogoloŋɔ la.