Yenɛ, kelehe n sohoga wa
55
1 Yenɛ, kelehe n sohoga wa, da sogɛ ho mɛŋa kan kelehe n sohoga wa. 2 Behɛ mam, ge lerege mam. La nyaŋere mam mɛ. Mam ka tare vo'ohogo n daaŋɔ wa poan. 3 Mam diŋdoma kiŋkima kɛn'ɛhere mam la dabeem. Nɛre wuruba wa muguhego la kɛn'ɛhere mam la dabeem. Ba maahene te ba mɛlɛhɛ mam mɛ. Daaŋɔ la sunsunyiim te ba tara dina la mam. 4 Mam suunre sagom mɛ la n mɛŋa. Kum dabeem en kɛn' mam. 5 Dabeem la gbe'a n tare mam. Pabegerɛ n tare mam.6 N han tare ne kelompagehe wo dayene, n ɛnkɛ ne keŋɛ ge vo'ohe. 7 Behɛ, n wan ɛnkɛ ne keŋɛ zen'an n zaan ha. N wan gan' ne mɔen ha. 8 N wan kanbelɛ ɛ soka zen'an bo n mɛŋa sabeeo kanra wa n lobere wa.
9 N Daana sagom bahɛ. Tulum ba yetɔgom. Se'ere n sɔe la, mam nyɛte la gbirigere, la zaba ma'an n boe teŋa wa poan. 10 Bolika, la yu'uŋɔ zan'an, ba zone ka dangɔɔma wa mɛ kaara ka muna, te tuure la daaŋɔ ma'an perɛ ka dangɔɔma la poan, la ka teŋasoka. 11 Sagaŋɔ en perɛ ka, te fan' la muguhego perɛ ka sɔya zuto.
12 La han dagane la dima n voole ne mam, n wan ŋmibe ne. La han dagane la sɛba n yaɛ mam, se'em n ka bote mam daane ne mam, n wan sogɛ ne n mɛŋa te a da nyɛ mam. 13 Ge la dela hom nɛresaala, mam la se'em n zone, mam tadaana n de mam mɛŋa zɔ, 14 mam la se'em n ne lagom sɔnhera sɔnhɛ soŋa la taaba Yenɛ yire la poan, mam la se'em n ne dɔla taaba en bala.
15 Bahɛ te ba ki tɔtɔ. Bahɛ te ba laɛ ba yɔɔ poan voto. Se'ere n sɔe la, be'em n boe ba yiya poan, la ba sunya poan.
16 Ge han dɛna mam, mam yi'ire la hom Yenɛ wa. Na'ayenɛ wa wan fan' mam bahɛ. 17 Bolika, wontɛɛŋa la zanɔɔrɛ zan'an, mam tɔgɔre n yele wa bɔ'ɔra hom mɛ, ge kɛla te ho wom n kaahega wa. 18 A wan fan' mam, te sɛla kan pogolom mam n zaberɛ wa poan. Mam diŋdoma zo'e mɛ zabera la mam. 19 Yenɛ se'ere n de naba pɔhega na la wan wom n fabelegɔ wa, ge sigehe n diŋdoma wa teŋa. Se'ere n sɔe la, ba ka tare teere, ba me pon ka zɔta Yenɛ.
20 Mam zɔ soŋɔ la zaberɛ mɛ la sɛba n daa tare sunma'ahom la en la. A kɔ'ɔre nɔse'ere te a biŋe la ba la mɛ. 21 A nɔɔrɛ daa ane mɛ wo seerom la, ge a suunre poan lo mɛ la diŋo. A yetɔgom ane bolololo wo kaam la, ge a maahom la pɛɛma.