Saŋgbana wa n yule wa pa'ale la Yenɛ soŋa
19
1 Saŋgbana wa n yule wa pa'ale la Yenɛ soŋa. Saa saŋgbana pa'ale la a nu'o tooma n ane se'em. 2 Daarɛ woo ho han beha ba, ba pa'ala la sɛla. Yu'uŋɔ woo tare la se'ere pa'ala Yenɛ n tom se'em. 3 Ho kan wom te ba tɔgɔra, bii ho wom te ba wuulena, ge la bala zan'an, teŋa wa zan'an nɛreba mi ba yele mɛ.4 Ba yetɔgom paɛ teŋa wa logerɛ woo poan mɛ.a Yenɛ maalɛ wontɛɛŋa wa sogorɛ mɛ saazuo ha bo en, 5 te a yɛhera na wo pɔgɔdita n ne nan sogɛ bɔna deo te a yɛhera la popeelom wo nɛra n eŋɛ sɛla nyaŋɛ la. 6 Wontɛɛŋa wa ne yɛhera bolika, ne yehena, tara tara ta lu zen'an kayema me ha, sɛla ka boe te a bugum la ka paara.
7 Na'ayenɛ pa'alegɔ dela tontɔɔ, kpɛmɛha ho sea. Na'ayenɛ nɔze'elego dela sɛla te ho han dekɛ delom bo, ho kan lu ge tare yam sirigera la ho mɛŋa. 8 Na'ayenɛ yelehom dela sera, hom se'em n lɔgɔhe a tare la popeelom daarɛ woo. Na'ayenɛ nɔɔrɛ la dela yelemɛŋɛrɛ, ge tara bɔkerɛ bɔ'ɔra hom se'em n dole a.
9 Na'ayenɛ zɔɔlom ane soŋa, bo me wan bɔna la ba la wuuha. Na'ayenɛ ze'elego la dela sera, ge me dɛna tontɔɔ. 10 Ba tare toolom gana sanlema, ba toolom la gane sanlema n sɛn' bi'ihe bugum poan. Ba zan'anhom gana seerom.
11 Ba kan'ane ho yamehe, hom se'em n dole a, ho wan nyɛ yɔɔrɛ se'ere n kanregɛ. 12 Nɛresaala ka nyɛte a mɛŋa tuure, Na'ayenɛ, di sugure bo mam n tuure se'a te n ka nyɛta. 13 Na'ayenɛ, gu'ura mam toonbe'seto te n mɛŋa kɔ'ɔn bɔta te n tom poan, da bahɛ te toonbe'tona wa sɔna mam behera. Bala te n wan dɛna fa'a, te be'em kan sɔna mam behera.
14 Na'ayenɛ hom de mam faanra la mam soka zen'an, to'e n pu'uhegɔ wa.