Na'ayenɛ, kelehe n fabelegɔ wa
17
1 Na'ayenɛ, kelehe n fabelegɔ wa, wom n kaahega wa, wom pu'uhegɔ wa se'ere zuo ko dela yelemɛŋɛrɛ daana pu'uhegɔ. 2 Hom n wan lerege bo mam, se'ere zuo ho nini nyɛte yelemɛŋɛrɛ la zan'an.3 Ho mi' mam suunre n ane se'em, bolika la wontɛɛŋa la yu'uŋɔ zan'an ho ɛ mam suunre wa poan me zan'an, ho ka nyɛ be'em de poan. 4 N ka tare n nɔɔrɛ wa tɔgɔra be'em wo nɛra n tare bɔ nɔya tɔgɔra be'em sebo taaba la, Mam nyɔkɛ n mɛŋa me, ka dɔla toonbe'erodoma sɔya la. 5 Mam zegehe n na'ma dɔla la ho sore la ma'an ma'an, n na'arɛ han ka tabele sɛregɛ yehe ho sore la zuo.
6 Yenɛ mam n yi'ire ho wa dela, n nin te ho wan wom ge lebehe bo ma na. Kelehe n pu'uhegɔ wa. 7 Fan' sɛba n dekɛ hom eŋɛ ba soka zen'an la ba diŋdoma nu'uhen bahɛ la ho pa'ale te ho zo'ohore sɛba n zote hom mɛ. 8 Tara mam soŋa soŋa wo nɛra n tare a niho soŋa se'em la, dekɛ ho kelompagehe pin' ma, 9 te potɔpa la da nyɛta mam, pin' mam soŋa te n diŋdoma wa n kae mam bahɛ teŋasoka wa da nyɛ mam. 10 Ba dela pa'ale mea doma, ba zote nɛra ninbɔn'ɔn. 11 Ba kae mam bahɛ la teŋasoka, nya mɔ'ɛ nini ɛɛra sɔrɔɔ seko te ba wan doohe ve'e mam biŋe taŋa. 12 Ba ane me wo gbegenɛ te kom woŋɛ en te a ɛɛra nɛŋɔ te a nyɔkɛ la, ba sogɛ gan'an gura mam te ba aanhom mam wo gbegenɛ n sogɛ gan'an gura nɛŋɔ te a aanhom ko' se'em la.
13 Na'ayenɛ, vaɛ ihege saazuo la ho gin' ba, la ho sigehe n diŋdoma wa teŋa, dekɛ ho so'a la, la ho fan' potɔpa wa nu'uhen bahɛ. 14 Na'ayenɛ zɛnkɛ ho nu'o saazuo, la ho fan' ma nɛrebe'ero bana taaba wa nu'uhen bahɛ. Fan' mam teŋa zuo nɛreba wa n tɛn'ɛhe tii sɛla woo ba'ahere la teŋa wa zuo wa nu'uhen bahɛ. Dekɛ namehe seko le ho maahom biŋe gura ba la namehe ba, bahɛ te namehegɔ la paɛ ba kɔma, ge kelom ta paɛ ba kɔma me kɔma.
15 Ge han dɛna mam, mam wan nyɛ ho nɛŋa. Se'ere n sɔe la, Mam vɔe la tontɔɔ vom, n han ta nɛɛ, ho bɔŋa la mam la, wan perɛ mam la popeelom.