Naba Ahasurus dekɛ Haman la yire bo Ester te a sɔna
8
1 Daanden daarɛ mea te naba Ahasurus dekɛ Haman se'em n de Yudoma la diŋdaana la yire bo Ester te a sɔna, te a nya yele naba la Mordekai n de a sɛla, 2 Te naba la dekɛ a nu'toa sɛka te a to'e ka Haman nu'uhen la tee pire Mordekai, ge te Ester nya dekɛ Mordekai te a dɛna nɛŋadaana Haman yire la poan, sɔna de beha. 3 Te Ester le keŋɛ ta dɔnbele naba nɛŋan la nintam, la beloŋo yeti te a gu' potɔɔ potɛn'se'ere te Agag boraa Haman maahom biŋe Yudoma la bahɛ. 4 Te naba le zɛnkɛ sanlema doore la tɔ Ester.5 Te Ester ihege ze'ele naba nɛŋan yeti, Ho poorɛ han seren pee mɛ la mam, ge te ho me nɔŋɛ mam, te mam yeti n yelese'ere wa han dɛna sera bo hom naba, ge te ho bɔta mam yele, bahɛ te ba golehɛ gɔnɔ ho yu'urɛ poan te to gu' gɔŋseto te Agag boraa Hamedata dayɔa Haman golehɛ tɔnrɛ teŋa woo n boe ho sɔ'ɔlom wa poan te ba doohe sagom Yudoma woo n boe ho sɔ'ɔlom wa poan la. 6 Mam wan eŋɛ la wane ta'an ŋmibe sina ge beha sagaŋɔ seko n ye mam nɛreba wa zuo na wa? Bii n ŋmibe sina ge beha sagaŋɔ seko n ye' mam mɛŋa sɔɔnrɔ wa zuo na wa? 7 Te Naba Ahasurus yele Ester la Mordekai la n de Yudoma la yeti, Behɛ, mam dekɛ Haman yule la dɔɔseto te a mɛŋa sɛ ze'ele la poan, la enŋa n dekɛ a nu'o pagelɛ yamam Yudoma wa zuo te a sagom ya la. 8 Bala ya mɛŋa ta'an dekɛ mam yu'urɛ golehɛ yan bote la ana se'em bo Yudoma wa teŋa wa poan, la ya dekɛ mam nu'toa danlehom di'ɛn gɔŋɔ la poan. Se'ere n sɔe la, mam nu'toa la han deŋɛ di'ɛn gɔŋɔ la, nɛra ka boe wan zagahɛ yelese'a n golehɛ eŋɛ ko poan la.
9 Te naba gɔŋgoloheba la lagahɛ ŋmarehe setan' la te ba yi'ira Sivan laa, ka dapihiyi' la atan' daarɛ, nya golehɛ gɔŋɔ la doohe Mordekai n pa'alɛ ba se'em la, nya bo Yudoma la, la gɔŋminiba, la kpɛ'ɛndoma sɛba woo n behere teŋhe n boe sɔ'ɔlom la poan, la kpɛ'ɛndoma sɛba n tone bɔna India ta paara Kus teŋhe la poan, teŋkanra se'a woo te gɔnɔ la paɛ se la dela teŋhe kɔbega, la teŋhe pihiyi', la seyopɔe, teŋa woo la ka gɔŋɔ, buuri woo la de yetɔgom. 10 Gɔnɔ la woo golehɛ la naba la yu'urɛ poan, nya bagɛ naba yiri se'e n tan zɔta, bo nɛresɛba n yeti ba tare gɔnɔ la ɛ tɔnrɛ la.
11 Ge naba la le bo Yudoma la fole yeti, Teŋsɛka n boe enŋa sɔ'ɔlom la poan sina ge yeti ka zabɛ la ba, ba kan'ahɛ ba mɛŋa soŋa, la ba zabɛ to'e ba vom, ba sagom ka, kɔrom teŋkaŋa poan nɛreba, fan' ka pɛɛntɛɛnreba, ko ka kɔma, la ka pɔgɔba, ge fan' ka lɔgɔrɔ tara. 12 Naba Ahasurus loe la dabaherɛ Adar ŋmarehe la n de ŋmarehe pia la seyi' la, ka dabeha pia la a atan' daarɛ. 13 Tɔnrɛ ya gɔŋseko te ya golehɛ la te ko dɛna nɔze'elego bo sɔ'ɔlom la poan nɛreba zan'an, te Yudoma la me maahom ba mɛhe gura ba dima se'em n wan ihege daanse'ere daarɛ te a zabɛ la ba, ba lerege.
14 Te naba la bo nɔɔrɛ, te yiri la yehe a yire la, kanbela kalam yɛ'a zen'se'ehe woo n sone te gɔŋɔ la paɛ se la poan ge te ba dekɛ koyema me mɔɔlɛ Susa teŋa poan.
15 Te Mordekai nya ze'ele naba la yire bagɛ a mɛŋa la na'am futo n de sɔbele pɔɔnhegɔ, la peelega, la sanlema muŋa, la yaberɛ te ba dekɛ guno peelega, la mɔlɔgɔ wogɛ dɛ nya yehe na, te Susa teŋa la zan'an taɛ la popeelom yooma. 16 Te Yudoma la nyeena, te ba poorɛ pee, te dabaherɛ lebege de'eŋɔ, la vo'ohege dabaherɛ. 17 Sɛla n le pa'ahɛ la dela nɛreba zo'e zo'e n kɛn'ɛre teŋa la poan la n nyɛ bala la, dekɛ ba mɛha te bama me dela Yudoma. Se'ere n sɔe la dabeem n kɛn' ba la Yudoma la.