Nehemia 13

1 De daarɛ la, te ba kaanlɛ Moses gɔŋɔ, te nɛra woo toba wona. Bilam te ba wom te ba yuun da sakɛ te Ammon bii Moabdoma la pa'ahɛ Yenɛ lagaŋɔ la poan, 2 Se'ere n sɔe la, ba yuun ka to'ohɛ Israeldoma la la dia la ko'om, ge ba ton yɔ la Balaam te a wa'ana pɔ' bahɛ ba zuo. Ge tomam Yenɛ la yuun tuluge pɔtɛ la mɛ, te de dɛna kan'somɔ. 3 Nɛreba la n wom pa'alegɔ kona wa la, ba yelege saama buuri la mɛ woo Israel poan bahɛ.

4 Se'ere n pa'ahɛ dela, Eliasib n de malemadaana la, pon tabelɛ dɛna Yenɛ Yire baanrɛ gura mɛ. Enŋa la Tobia dela zɔtɔ, 5 te a maahom Yenɛ Yire deo kantɛ bo en. Deo seko poan te ba tabelɛ tara boom bo'olom la ko'ɛnka la kaanbegɔ lɔgɔrɔ la ki la daam paalom la kaam pia porogerɛ bo'olom sebo n de ba tare kena na bɔ'ɔra Levidoma la yoonyooneba la nayaŋa guruba la biŋera la malemadoma bo'olom la. 6 Saŋkaŋa la te mam ka boe Yerusalem. Se'ere n sɔe la Babilon teŋa Naba Artasaset na'am gɔŋɔ zuo yuuma pihitan' la ayi' poan, te mam daa boe la naba wa zen'an. Ge la yuue fiin te mam sohɛ en sore te n lebe. 7 Mam lebe Yerusalem na nya ta baŋɛ be'em sebo te Eliasib tom, doohe la enŋa dekɛ Yenɛ yire zenzaka deo bo Tobia la. 8 La daam mam suunre, te mam vaɛ Tobia wa yire lɔgɔrɔ zan'an deo la poan lobe bahɛ yeŋa. 9 Mam nya bo nɔɔrɛ te ba miihe deto la, ge nya le vaɛ Yenɛ yire lɔgɔrɔ la zan'an la boom bo'olom la ko'ɛnka la lebehe biŋe ko poan.

10 Mam me nyɛ te ba ka dekɛ boom bo'olom bo Levidoma te ba ne dekɛ bo ba. Bala, Levidoma la yoonyooneba la zan'an lebe la ba va'amen. 11 Te mam nyɔna kpɛ'ɛndoma la yeti, Bene te ya bahɛ Yenɛ yire la bala? Ge te n nya yi' Levidoma lagahɛ na, bahɛ te bama woo ze'ele a ze'elego zen'an. 12 Yuda nɛreba zan'an nya tare ba boom la daam paalom la kaam pia porogerɛ bo'olom wa'an Yenɛ Yire lɔgɔrɔ deto la poan na. 13 Mam dekɛ malemadaana Selemia la gɔŋgoloha Zadok la Levi boraa ayema Pedaiah, te bama sɔna lɔgɔrɔ bɔ'ɔrɔ la behera, ge dekɛ Mattaniah dayɔa Zakur dayɔa Hanan te enŋa dɔla ba poore. Se'ere n sɔe la, nɛrebana wa dela birikindoma. Bama n sɔe ba dɔla tɔnta lɔgɔrɔ la bɔ'ɔra ba sɔɔnrɔ la.

14 Tɛnra mam n Yenɛ wa, da saalom mam dekɛ birikinte tom toonse'a bo n Yenɛ wa yire wa la de poan tooma wa.

15 Dabeha aŋa poan, mam nyɛ Yuda nɛreba mɛ, te ba ŋmɛkera tiihe wɔla daam Vo'ohogo Daarɛ la, tara ki ziila ba bonhe, la daam la tiihe wɔla la mu'uro la zeero kekeko. Ba tara lɔgɔtona wa woo kɛn'ɛra Yerusalem teŋa Vo'ohogo Daarɛ poan na. Te mam yele ba la ninmɔ'ɔrɛ daanden daarɛ dia koohogo yele. 16 Tire teŋa borase'ehe me kɛn'ɛre Yerusalem mɛ, ne tara zim la koohogo lɔgɔrɔ zo'e zo'e na kɔɔha bɔ'ɔra Yudadoma Vo'ohogo Daarɛ la Yerusalem poan. 17 Te mam nyɔna Yuda nɛrezura la yeti, Bene te ya tona toonfɛn'ɛherɛ dena wa wa, ganlona Vo'ohogo Daarɛ wa? 18 Ya sɔdoma yuun ka eŋɛ la wana mea bahɛ te to Yenɛ tare nɔyalegerɛ dena wa wa'an bama la to teŋkana wa zuo na wa? Nananawa, ya le gbirigera la sunsunyiim kantɛ bahera Israel zuo, la yamam n ganlone Vo'ohogo Daarɛ wa la.

19 Zaanɔɔrɛ ma'ahom han ne ta paara Yerusalem nayahe la Vo'ohogo Daarɛ la daarɛ, mam ne bo la nɔɔrɛ te ba yu' nayahe la da yu'ɛ se, gura te Vo'ohogo Daarɛ la ta tole. N ne dekɛ la borase'ehe n dole mam mɛŋa la gu'ule nayahe la, te ba da bahɛ te lɔgɔrɔ kɛn' Vo'ohogo Daarɛ la na. 20 Sugumnɔɔren boyena, boyi' te koohedoma la n koohere lɔgɔrɔ yema yema la gan'arɛ Yerusalem yeŋa. 21 Te mam yele ba la ninmɔ'ɔrɛ yeti, Bene te ya ne wa'ana gan'an dangoone la zen'an? Ya han le eŋɛ bala, n wan gorɛ ya. Yehe bala ma'an na, ba ka le kena Vo'ohogo Daarɛ la poan na. 22 Te mam bo Levidoma la nɔɔrɛ te ba pee ba mɛhe keŋɛ ta gura nayahe la Vo'ohogo Daarɛ la te de dɛna toolom dabaherɛ. Mam Yenɛ, tɛnra mam yele dena wa me zuo ge zɔ n ninbɔn'ɔn ho zo'ohogɔ la poan.

23 Le pa'ahɛ, dabeha aŋa poan la, mam nyɛ te Yuda teŋa boraahe n di pɔgɔhe n yehe Asdod la Ammon la Moab teŋa. 24 Ba kɔma porogerɛ tɔgɔre Asdod teŋa yetɔgom, bii buuri a se'a yetɔgom ge ka tana tɔgɔra Yuda teŋa yetɔgom. 25 Te mam nyɔna ba, ge pɔ' nɔya bahɛ ba zuo. Mam ŋmɛ' borase'ehe mɛ, vɔnhɛ se zuto zonto, ge bahɛ te ba biŋe nɔɔrɛ Yenɛ yu'urɛ la poan yeti, ba kan dekɛ ba pɔyɔɔhe elehe buuri bana wa dayɔɔhe, bii ba di ba pɔyɔɔhe bo ba dayɔɔhe bii ba mɛhe! 26 Dagɛ pɔgɔdire dena taaba te Israel teŋa naba Solomon tom be'em la? Teŋhe la woo n boe la, naba yuun ka boe ana wo Solomon. Yenɛ nɔŋɛ en, ge eŋɛ en te a dɛna Israel zan'an naba, ge la bala zan'an sateŋhe pɔgɔdire n tare en ta kɛn' be'em poan. 27 La ane soŋa te tomam me wona nananawa te yamam me tone la toonfɛn'ɛherɛ dena wa, zagaha ya Yenɛ la doohe la ya sateŋhe pɔgɔdire wa zuo?

28 Eliasib n de malema nɛŋadaana la dayɔa Yoiada dayɔa di Sanbalat n de Horon teŋa nɛra la pɔyɔa mɛ, te mam sa'ɛ en n zen'an.

29 Mina ba yele n Yenɛ wa. Se'ere n sɔe la, ba ganlom malemadoma tooma la Levidoma nɔbiŋere la mɛ. 30 Te mam miihe bama n doohe la ban ganlom ba mɛhe la sateŋhe la zuo, ge bo malemadoma la Levidoma ba woo toonɛ n de se'ere. 31 Ge me bo saŋa te nɛreba tara dɔɔrɔ la dideena kena saŋsɛka woo n de ba tare kena na la. N Yenɛ wa, tɛnra n yele saŋa soŋa.