6
1 Sanbalat la Tobia la Gesem n de Arab nɛra la to diŋdoma la zan'an n ta wom te mam malom mɛ dangoone la mɛ te weere ka bɔna zen'an, ge bala ma'an te mam nan ka kɛn'ɛhɛ nayahe kolehe la. 2 Sanbalat la Gesem tom sɔɔleŋa bo mam na yeti, Wa'ana te to nyɛ taaba teŋbila kayema poan, wa'an Ono paberɛ la poan na. Ba bote ba pɔgɔlom mam mɛ n bala. 3 Te mam tom nɛreba la sɔɔleŋa kana wa bo ba yeti, Mam tone la toonɛ n kanregɛ, n kan nyaŋɛ sige na. Bene te tooma la wan gu' zɛ'a ge te mam nan sige yamam zen'an na? 4 Sugumnɔɔren bonaahe te ba tom sɔɔleŋa kaŋa mea bo mam na, te mam me lɛbeha ba mam lerege ba se'em mea.5 Bonuu poan la te Sanbalat tom a yameŋa mam zen'an na, te a zanla gɔŋɔ n lorege. 6 Ko poan golehɛ yeti, Teŋhe nɛreba yele mɛ, te Gesem me yeti la dela sera te hom la Yudoma la yeti ya tare la gbirigere na. Bala zuo te ya mɛta dangoone la. Sɛla n pa'ahɛ yele dena wa poan dela, hom nya yeti ho dɛna ba naba. 7 Ge ho pon deŋɛ loohe nɔtɔgɔheba te ba mɔɔlɛ ho yele dena wa bo ho Yerusalem poan, te Naba pon deŋɛ bɔna Yuda teŋa! Naba wan wom yele dena wa. Bala wa'ana te to sɔnhɛ la taaba! 8 Te mam lerege en yeti, Sɛla ka boe ana wo hom yeti se'em wa boe. Hom mɛŋa n ete dɛ ho zuo poan. 9 Ba zan'an zegere la ba vuunhe to, tɛn'ɛha bɔ'ɔra ba mɛhe te to giinla wan kɔ'ɔhɛ la to tooma la, te to kan tom a ba'ahɛ. Te mam sohɛ yeti, Nananawa, Na'ayenɛ, kpemehe n nu'uhe wa!
10 Te mam nya keŋɛ Mehetabel dayɔa Delaiah dayɔa Semaiah n yu' a mɛŋa bahɛ a yire poan la zen'an. Te a yele mam yeti, Bahɛ te to paɛ taaba Yenɛ Yire la poan la to yu' to mɛŋa lebehe ha. Se'ere n sɔe la, nɛreba n ye' na te ba ko hɔ. Yu'uŋɔ te ba yɛ'a na te ba ko hɔ. 11 Te mam yele en yeti, Boraa n ane wo mam wa wan sakɛ zɔ? Bii se'em n ane wo mam wa wan sogɛ Yenɛ Yire poan te a vom zuo? Mam kan keŋɛ! 12 Mam baŋɛ te Yenɛ ka tom en, ge a mɛŋa n pote. Se'ere n sɔe la, Tobia la Sanbalat n yɔ en. 13 Ba yɔ en mɛ te a sigehe mam te n tom be'em doohe la enŋa n yele mam sɛla, te ba nya bo mam yu'urɛ be'o bii ba zɛrɛgɛ mam. 14 Mam Yenɛ wa, tɛnra Tobia la Sanbalat wa la bama n eŋɛ se'em wa. Tɛnra nɔtɔgɔha Noadia, la nɔtɔgɔha sɛba woo n zegere te ba sigehe mam la.
15 Dangoone la mɛ ba'ahɛ la Elul ŋmarega la poan dabeha pihiyi' la anuu daarɛ. Dabeha pihinuu la ayi' te ba dekɛ ba'ahɛ dɛ. 16 To diŋdoma la woo n wom wana wa la, dabeem kɛn' teŋse'ehe woo n kae to mum la mɛ, te ba giinla kɔ'ɔhɛ. Se'ere n sɔe la, ba mi' te toonɛ wa tom ba'ahɛ mɛ la to Yenɛ la soŋorɛ.
17 Se'ere n pa'ahɛ la, Yuda teŋa nɛrezura la golehere gɔnɔ mɛ bɔ'ɔra Tobia ha, te Tobia me goleha lɛregera ba. 18 Se'ere n sɔe la, Yuda teŋadoma kekeko wa bɔna la nɔpɔtɛ se'ere te ba daa pɔ' la Tobia la poan, ge te a me le dɛna Arah dayɔa Sekania dɛɛma, te a dayɔa Yehohanan di Berekia dayɔa Mesulam pɔyɔa. 19 Sɛla n pa'ahɛ dela, ba daa kɔ'ɔn kena tɔgɔra la a etesoŋɔ yɛla pa'ala mam, te mam han yelese'ere, ba tare ta yele en. Te a goleha gɔnɔ seto n wan kɛn'ɛhɛ mam dabeem bɔ'ɔra mam na.