Zerubabel la Yozadak dayɔa Yesua nya ihege pɔhɛ Yenɛ yire wa n boe Yerusalem poan
5
1 Te nɔtɔgɔha Hagai la Zekaria n yehe Ido tuunhom poan na la ze'ele Israel Yenɛ la n behere ba la yu'urɛ poan tɔgɛ Yudadoma la n boe Yuda la Yerusalem poan la. 2 Te Sealtiel dayɔa Zerubabel la Yozadak dayɔa Yesua nya ihege pɔhɛ Yenɛ yire wa n boe Yerusalem poan wa mea, te Yenɛ nɔtɔgɔheba la bɔna la ba soŋora ba. 3 Bala ma'an la, Tatenai n sɔe Euprates Yakenɛ ha beha la la Setar Bozenai la ba taaba n wa'ana soke ba yeti, Ane n bo ya sore te ya malom mɛ Yenɛ yire wa la dangɔɔma wa? 4 Ba me soke ba yeti, Sɛba n bahɛ te wana eta wa dela bane? 5 Ge Yenɛ la niho gan' Yudadoma keendoma la zuo mɛ, te se'em ka nyaŋɛ gu' ba, gura te ba ta ko'ohe naba Darius, te a golehɛ gɔŋɔ lebehe na te ba to'e.6 Gɔŋɔ seko te Tatenai n sɔe Euprates Yakenɛ ha beha la, la Setar Bozenai la ba tadaandoma, la kpɛ'ɛndoma sɛba n sɔe Euprates Yakenɛ behera la golehɛ bo naba Darius n wana. 7 Ban golehɛ gɔŋɔ la yele naba Darius se'em n wana: Gɔŋɔ wa bo'ore la naba Darius. Ho farafara. 8 To bote naba baŋɛ te tomam keŋɛ la Yuda teŋa, Yenɛ kantɛ yire la poan. Te nɛreba la malom mɛte dɛ la kugu kanra, dekɛ tisoma dɔɔsonɔ pagela zuin. Ba ma'ɛn la ba mɛhe mɛta yire la, te tooma la me kena kalam kalam. 9 Te tomam soke ba keendoma la yeti, ane n bo ya sore te ya mɛ Yenɛ yire wa, la dangɔɔma wa? 10 Ge me soke ba keendoma la yu'urɛ te to golehɛ bo ho na.
11 Ban lerege tomam se'em dela, tomam dela Yenɛ se'ere n naam saazuo la teŋparɛ wa la yamehe. To malom mɛta la Yenɛ yire se'ere n yuum mɛ yuuman yuuman ha la, yire se'ere te Israel nakantɛ kayema yuum mɛ ba'ahɛ la. 12 Ge tomam sɔdoma yuum nyiihe la saazuo Yenɛ sunsunya, te a dekɛ ba eŋɛ Naba Nebukadnezar n de Babilon teŋa naba la, Kaldea teŋa naba la nu'uhen, te a sagom Yenɛ yire la ge pɛnregɛ nɛreba la keŋɛ Babilon teŋa. 13 Ge Babilon teŋa naba Kirus na'am dia pɔhega yuunɛ poan la, te naba Kirus bo nɔɔrɛ te to mɛ Yenɛ yire la. 14 Ge yehe sanlema la sanlenpeelega lɔgɔrɔ la te Naba Nebukadnezar yuum vaɛ tɔ Yenɛ Yire la poan Yerusalem na biŋe a baga deo poan Babilon teŋa poan la, Kirus yuun vaɛ to mɛ bo la boraa kayema yu'urɛ n yi'ire Sesbazar, se'em te a loe ta a dɛna teŋbehega nɛŋadaana la, 15 ge yele en yeti, tare ya lɔgɔrɔ wa lebe Yerusalem teŋa ta malom mɛ Yenɛ Yire la zen'en te de yuun bɔna la, dekɛ lɔgɔrɔ wa ze'ele bini. 16 Te Sesbazar wa'ana ɛɛnbɛ Yenɛ yire la Yerusalem teŋa wa poan. Yehe de daarɛ na paɛ zina, de boe la mea poan ge de nan ka ba'ahɛ.
17 Bala, hom naba bahɛ te ba ɛ Babilon teŋa na'am tooma yɛla gɔŋɔ la poan behɛ nya naba Kirus tabelɛ bo nɔɔrɛ te ba malom mɛ Yenɛ yire la Yerusalem poan. Ge bahɛ te to baŋɛ yele wa n de se'em.