Yoahaz di na'am behɛ teŋa la ŋmarehe setan' Yerusalem poan
36
1 Te teŋa la nɛreba bobe Yosia dayɔa Yoahaz na'am Yerusalem poan, te a sɔe a sɔ na'arɛ. 2 Yoahaz wa dɛna la yuuma pihiyi' la atan' ge di na'am behɛ teŋa la ŋmarehe setan' Yerusalem poan. 3 Te Mizraim teŋa naba wa'ana sigehe en te a da dɛna naba Yerusalem poan, ge bahɛ te teŋa la yɔɔra koberɛ sanlenpeelega bɔɔrehe kɔbega, la sanlema bɔɔrega bɔ'ɔra Mizraim teŋa naba wa. 4 Te Mizraim teŋa naba wa tee bobe Yoahaz yebega Eliakim naba, ge tee segɛ a yu'urɛ Yehoiakim. Te naba Neko wa tare Eliakim keema Yoahaz lebe Mizraim teŋa poan.5 Yehoiakim wa dɛna la yuuma pihiyi' la anuu ge di na'am, behe teŋa la yuuma pia la deyena Yerusalem poan, tona be'em Na'ayenɛ a Yenɛ la nɛŋan. 6 Te Babilon Naba Nebukadnezar wa'ana zabɛ nyaŋɛ en, bobe en la nyɔgom zɔntɔ tare en keŋɛ Babilon. 7 Nebukadnezar kɛn' vaɛ Na'ayenɛ Yire la poan lɔgɔrɔ toseto mɛ tare lebe a teŋa, ta dekɛ to biŋe a baga yire Babilon teŋa poan 8 Yehoiakim toonse'a n gee la, a yelefɛn'ɛha la te a tom la, la yelese'a woo n dole en la zan'an golehɛ eŋɛ la Israel la Yuda teŋhe nadoma yɛla gɔnɔ la poan. Te a dayɔa Yehoiakin sɔe a na'arɛ dɛna naba.
9 Yehoiakin wa dɛna yuuma pia la anii ge di' na'am, behe teŋa ŋmarehe setan' la dabeha pia Yerusalem poan, tona be'em Na'ayenɛ nɛŋan. 10 Yuunɛ n ta kaara, te Naba Nebukadnezar tom te ba wa'ana nyɔkɛ en wa'an Babilon teŋa na, lagom vaɛ Na'ayenɛ Yire toolom lɔgɔrɔ la pa'ahɛ, ge te a bahɛ te naba la sɔɔn Zedekia sɔe dɛna naba behera Yuda la Yerusalem.
11 Zedekia wa dɛna la yuuma pihiyi' la deyena ge di na'am la, behɛ teŋa la yuuma pia la deyena Yerusalem poan. 12 Te a tona be'em Na'ayenɛ nɛŋan, ka sigehe a mɛŋa nɔtɔgɔha Yeremia n tɔgɔre Na'ayenɛ yelehom la nɛŋan.
13 Ge me la yehe Nebukadnezar n bahɛ te a pɔ' Yenɛ yu'urɛ poan la pooren. Te a toba kpa' te a suunre kanbɛ ka bɔta te a ŋmɛregɛ lebe Na'ayenɛ Israel Yenɛ la zen'an na. 14 Le yɛ'ɛha me malemadoma kpɛ'ɛndoma la la nɛreba la kpɛ'ɛndoma la zan'an ka le dɛna birikindoma, doohe la sateŋhe sese'ehe yelefɛn'ɛha la, nya ganlom Na'ayenɛ n de Israeldoma Yenɛ la toolom yire la te enŋa Na'ayenɛ mɛŋa maahom dɛ Yerusalem poan la.
15 Te Na'ayenɛ la n de ba sɔdoma Yenɛ la, doohe a kpanma la poore tɔgɛ bige teŋa, la ninbɔn'seko te a tara la a nɛreba la, la a kɛn'an zen'an la. 16 Ge ba ton kɛha Yenɛ kpanma la mɛ, ge zɛrɛgera a yelehom la, La'ara a nɔtɔgɔheba la nya bahɛ te Na'ayenɛ sunsunyiim yie la a nɛreba la, te gu'a ka bɔna. 17 Te a bahɛ te Babilon nadoma to'ohɛ ba la zaberɛ, bahɛ te so'a tagalɛ bodibinpaal konkowa Yenɛ deo la poan, ka gee bodibinpaal sɛka bii pugunto bii boraa yan'ahe bii mina n tare yuuma, Yenɛ dekɛ ba zan'an tus ɛnŋɛ la Nebukadnezar nu'uhen. 18 Te a vaɛ Yenɛ deon lɔgɔrɔ la zan'an keŋɛ Babilon teŋa, lɔgɔkanra la bonbibihe, la Na'ayenɛ po'ohegɔ deon sanlema la naba kpɛ'ɛndoma la sanlema. 19 Te ba tanŋɛ Yenɛ deo la bugum ge gbi' Yerusalem dangɔɔma, nyɔ' naba yire ge sagom sɛla woo n tare toolom. 20 Te a vaɛ sɛba woo n daa peɛn so'a la keŋɛ Babilon te ba ta dɛna yamehe bɔra enŋa la a dayɔɔhe la paɛ saŋsɛka te Persia tansugure la sɔe dɛna panhedoma.
21 Te teŋa la nyɛ popeelom ka Vo'ohogo Dabehaa la kɔ'ɔn gan'an vɔ'ɔha bala la ka n de daboo la, kɔ'ɔn gura yuuma pihiyopɔe la wa'ana tole wo Na'ayenɛ yelehom la te Yeremia porɛ bo se'em la.b 22 Te Persia naba Kirus, a na'am ka yia yuunɛ poan, te a wan ɛnŋɛ se'em te Na'ayenɛ yelehom la te Yeremia porɛ la wa'ana tolec la te Na'ayenɛ mɛŋa kalom Persia naba Kirus sure te a soolom a sɔ'ɔlom la zan'an ge golehɛ bige. 23 Sɛla te Persia naba Kirus yɛta, Na'ayenɛ, saazuo Yenɛ wa, n bo mam teŋhe wa woo n boe teŋparɛ wa zuo wa. Enŋa n loe ma te n mɛ' Yenɛ Yire bo' en Yerusalem n boe Yuda poan, ya mam sɛba n de a nɛreba wa ayema te Na'ayenɛ a Yenɛ la wan bɔna la en, hon mina n tole nɛŋa.