Amazia behɛ teŋa la yuuma pihiyi' la awae' Yerusalem poan
25
1 Amazia wa dɛna la yuuma pihiyi' la anuu ge di na'am, behɛ teŋa la yuuma pihiyi' la awae' Yerusalem poan. A ma yu'urɛ dela Yehoadin, yehe Yerusalem na. 2 Te Amazia tona sɛla n de ma'an Na'ayenɛ nɛŋan, ge a ka tone la a suunre zan'an. 3 Se'em ma'an te sɔ'ɔlom la ta ze'ele soŋa bɔna a nu'uhen la, te a ko a yamehe se'ehe n yuun ko a sɔ n yuun de naba la. 4 Ge a ka ko ba kɔma. A tom doohe la golehegɔ la n boe Moses Pa'alegɔ Gɔŋɔ la poan te Na'ayenɛ tɔgɛ yeti, Dɔgɔra kan ki a bia tuure zuo, bii bia ki ka dɔgɔra tuure zuo, ge se'em n tue la n kiiri la.a5 Te Amazia lagahɛ Yudadoma la na, loohe ba yizuo woo nɛreba te ba dɛna zaba nɛŋadoma behera pɛɛntɛɛnreba tuha tuha, la kɔbehe kɔbehe Yuda la Benyamin teŋhe la poan ta tooɛ. Ge le kaanlɛ ba, pɔhera se'em woo n paɛ yuuma pihiyi' beene yɛ'ɛha, te ba dɛna nɛreba tuha kɔbehe setan' n de sɛba n wan ta'an tɛn' pɛɛma bii zanla kanɛ bii zaba tɛ'ɛlega. 6 Ge me yɔ sanlenpeelega bɔɔrehe kɔbega, ge to'e Israel pɛɛntɛɛnreba kɔbega n mi zaberɛ. 7 Ge Yenɛ nɛra ayema n wa'ana yele en yeti, Naa naba, da bahɛ te Israel pɛɛntɛɛnreba wa doohe ho keŋɛ pɛɛntɛɛnrɛ. Na'ayenɛ ka boe la ba bii a bɔna la Epraimdoma wa. 8 Ho han ka nam, ho kena, ge ho pon kpe'em la se'em me zaberɛ la poan, Yenɛ wan lobɛ hɔ ho diŋdoma la nɛŋan. Se'ere n sɔe la, Yenɛ n sɔe nyaŋerɛ bii lubega paŋa. 9 Te Amazia soke Yenɛ nɛra wa yeti, Ge n wan eŋɛ la wane la mam n yɔ sanlenpeelega bɔɔrehe kɔbega Israel pɛɛntɛɛnreba wa zuo la? Te Yenɛ nɛra wa lerege en yeti, Na'ayenɛ tare gaŋɛ, a wan bo ho gana bana. 10 Te Amazia bahɛ te pɛɛntɛɛnreba sɛba n ze'ele Epraim na la woo lebe kule. Te la daam pɛɛntɛɛnreba wa suunre la Yudadoma la, te ba uke kaŋkaŋe lɛbera kula.
11 Te Amazia kpemehe a mɛŋa tare a nɛreba la yehe pɛɛntɛɛnrɛ Yaarom paberɛ la poan, ta zabɛ ko Seir teŋa pɛɛntɛɛnreba tuha pia. 12 Yuda pɛɛntɛɛnreba wa nyɔgɛ la pɛɛntɛɛnreba tuha pia voto, tare ba zom taŋa zoore la zuin ha, nya zan'ara ba bilam ha bahera na, te ba luta na buta. 13 Ge pɛɛntɛɛnreba sɛba te Amazia yeti ba lebe ge da doohe la en keŋɛ pɛɛntɛɛnrɛ la n keŋɛ ta gbirige Yuda la Samaria teŋhe, ta ta' Bet Horon teŋa, ko nɛreba tuha atan' ge fan' ba lɔgɔrɔ zo'o zo'e keŋɛ. 14 Amazia n ze'ele Edomdoma la kɔrɔŋɔ poan lebe na la, a vaɛ la Seir teŋa nɛreba baga wa'ana, dekɛ ba ze'ele te ba dɛna yena, te a kena kaanbera ba. 15 Bala te Na'ayenɛ sunsunyiim taɛ bahɛ a zuo. Na'ayenɛ tom la nɔtɔgɔha a zen'an na, te nɔtɔgɔha la yele en yeti, Bene zuo te hom kaanbera yena se'a n ka nyaŋɛ fan' ba mɛŋa nɛreba bahɛ? 16 N boe bini tɔgɔra la naba wa la, te naba wa soke en yeti, To loe la hom te ho kan'ana naba yire wa bii? Go'e ho nɔɔrɛ te ba da ŋmɛ' hɔ lobɛ. Te nɔtɔgɔha la go'e, ge yele en yeti, Mam mi' te Yenɛ maahom te a sagom ho mɛ, la hom tom toondena wa ge ka bɔta te ho kelehe mam kan'aŋɔ wa la.
17 Te Yuda naba Amazia to'e kan'aŋɔ seko, tom nɛreba Yehu dayɔa Yehoahaz me dayɔa Yehoas n de Israel naba la zen'an yeti, To'ohɛ mam na te to zabɛ. 18 Te Israel naba Yehoas lebehe Yuda naba wa na yeti, Zaaŋa n boe Lebanon teŋa yele mɔlɔsonɔ tia n boe Lebanon teŋa te a dekɛ a bia bo a dayɔa te a di. Te mɔen duŋa bɔna Lebanon mɔen mea dɔla bilam tɔla, sagom tibila tabalɛ teŋa. 19 Ho yele ho mɛŋa mɛ yeti, behɛ, n nyaŋɛ Edomdoma. Te pa'alɛ mɛŋa la nyɔn'ɔn ŋmɛ'a perɛ ho suunre. Yee ho yire baanlam. Bene te hom wa, hom wa me bɔta te ho gbirige daaŋɔ bahɛ ho zuo la ho ki, te la lagom ta' Yudadoma wa?
20 Ge Amazia kan kelehe bana. Se'ere n sɔe la, la ze'ele la Yenɛ zen'an na te a dekɛ Yudadoma wa eŋɛ Yehoas nu'uhen la bama n kaanbere Edomdoma baga la. 21 Bala te Israel naba Yehoas yehe, te enŋa la Amazia to'ohɛ taaba Bet Semes teŋa n boe Yuda sɔ'ɔlom poan la. 22 Te Israeldoma la nyaŋɛ Yudadoma la, te ba woo zɔ kule ba yiya ba yiya. 23 Israel naba Yehoas nyɔkɛ Yuda naba Amazia n de Yehoahaz dayɔa Yoas la Bet Semes poan, tare n wa'an Yerusalem na, aanhom dangoone la ze'ele Epraim nayaŋa la, ta paɛ sɛnka nayaŋa la, te la woko dɛna santira kɔbehe senaahe. 24 Ge vaɛ sanlema la sanlenpeelega, la lɔgɔrɔ seto woo n boe Yenɛ yire la poan te Obed-Edom gura to la, ge vaɛ naba yire poan lɔgɔrɔ me, nyɔkɛ nɛreba pa'ahɛ lebe Samaria teŋa.
25 Te Yuda naba Amazia n de Yoas dayɔa la vɔ ta paɛ la yuum pia la anuu Israel naba Yehoas n de Yehoahaz dayɔa n ki tole la. 26 Amazia tooma a se'a la, a pɔhega yɛ'a a ba'ahegɔ golehɛ eŋɛ la Yuda la Israel teŋhe nadoma yɛla gɔnɔ la poan. 27 Pɔhɛ saŋsɛka te Amazia te yehe a mɛŋa Na'ayenɛ zen'an la, nɛreba la daa yehe la a pooren Yerusalem poan, te a zɔ keŋɛ Lakis teŋa, te ba tom nɛreba te ba doohe a poore Lakis teŋa la poan ta ko' en bilam ha, 28 nya zin' en la yiri na pin' en a sɔdoma yɔɔrɔ la poan Yuda teŋa poan.