Asa dayɔa Yehosapat sɔe a na'arɛ dɛna naba
17
1 Te Asa dayɔa Yehosapat sɔe a na'arɛ dɛna naba, sɛ ze'ele ka sakera bɔ'ɔra Israel. 2 Ge bahɛ te pɛɛntɛɛnreba bɔna Yuda teŋkanra se'a te dangoone mɛ kae se la poan, la Yuda la Epraim teŋse'ehe te a sɔ Asa yuun nyaŋɛ se la. 3 Te Na'ayenɛ bɔna la Yehosapat. Se'ere n sɔe la, Yehosapat nɛ la a sɔ naba David na'arɛ, ka dɔla Baal baga. 4 Ge dɔla a sɔ Yenɛ la, la a pa'alegɔ la, ka eta wo Israeldoma n ete se'em la. 5 Bala te Na'ayenɛ dekɛ teŋa la zan'an eŋɛ Yehosapat wa nu'uhen, te Yuda zan'an tare koberɛ yɔɔra bɔ'ɔra en, te a panrɛ dɛna zuodaana. 6 Te ŋmɛ'ɛra nyɔn'ɔn la Na'ayenɛ sɔrɔɔ la, malom vɔn' zɔya zuto kaanbegɔ zen'enhe la, la Aserah bagarɛ dɔɔrɔ la Yuda poan bahɛ.7 A na'am gɔŋɔ zuo yuuma atan' poan, te a tom a nɛŋadoma Ben Hail, la Obadia la Zekaria la Netanel la Mikaiah te ba pa'alɛ Yuda teŋhe la zan'an. 8 Levidoma basɛba la pa'ahɛ: Semaiah la Netania la Zebadia la Asahel la Semiramot la Yehonatan la Adoniya la Tobiya la Tob Adoniya la malemadoma Elisama la Yehoram. 9 Te ba tara Na'ayenɛ Pa'alegɔ Gɔŋɔ la doohe Yuda teŋkanra la poan zan'an pa'alɛ nɛreba la. 10 Te Na'ayenɛ kɛn'ɛhɛ teŋse'ehe woo n kae Yuda mum la dabeem, te se ka kɔ'ɔra zaberɛ la Yehosapat. 11 Te Pilistidoma basɛba tare bo'olom na, la sanlenpeelega te la dɛna ba koberɛ na yɔ bo Yehosapat, te Arabdoma me tare piihe tuha ayopɔe la kɔbehe seyopɔe, boohe tuha ayopɔe la kɔbehe seyopɔe te la dɛna koberɛ na yɔ bo Yehosapat.
12 Te Yehosapat kpe'em malom kpe'em, mɛ pɛɛntɛɛnreba bɔŋa zen'enhe la lɔgɔrɔ biŋere zen'enhe Yuda teŋa poan. 13 Tɔnta lɔgɔrɔ kekeko, pɛɛntɛɛnreba, la sɛba n mi' pɛɛntɛɛnrɛ baha Yuda teŋkanra la la Yerusalem poan. 14 Yizuto la zaba nɛŋadoma n wana. Yuda yizuo la poan, zaba nɛŋadoma sɛba n behere pɛɛntɛɛnreba tuha tuha dela. Adna behere la pɛɛntɛɛnreba tuha kɔbehe setan', 15 te Yehohanan behere pɛɛntɛɛnreba tuha kɔbehe seyi' la tuha pihinii, 16 te Zikri dayɔa Amasia se'em n yehe a mɛŋa bo Na'ayenɛ la, me tare la pɛɛntɛɛnreba kɔbehe seyi' n mi' pɛɛntɛɛnrɛ. 17 Benyamin yizuo la poan, Eliada n mi' pɛɛntɛɛnrɛ la tare la pɛɛntɛɛnreba kɔbehe seyi' n tare logoro la zaba te'elehe, 18 tagela Yehozabad enŋa tare la pɛɛntɛɛnreba tuhure kɔbega la tuha pihinii n de pɛɛntɛɛnreba. 19 Bana n de sɛba n tone bɔ'ɔra naba la. Sɛba te a dekɛ bahɛ teŋse'ehe te dangɔɔma mɛ kae se Yuda teŋa poan zan'an la ka pa'ahɛ.