Yenɛ paŋa sige Oded dayɔa Azaria zuo
15
1 Te Yenɛ paŋa sige Oded dayɔa Azaria zuo, 2 te a nya yehe to'ohɛ Asa yele n yeti, Hom la Yuda la Benyamin zan'an! Ya han bɔna la Na'ayenɛ, Na'ayenɛ boe mɛ la ya. Ya han ɛ en, a wan bahɛ te ya nyɛ en. Ge ya han zagahɛ en, a wan zagahɛ ya. 3 La yuue mɛ te Israel bɔna ka tara yelemɛŋɛrɛ Yenɛ, ka tara malemadoma sɛba n pa'ale, ka tara pa'alegɔ. 4 Ge ba ne han ta bɔna daaŋɔ poan, ba ne yi' la Na'ayenɛ Israel Yenɛ wa, ge ɛ en, te a ne nɛɛ a mɛŋa bo ba. 5 Saŋkaŋa poan la, sunma'ahom ka boe hom se'em n ze'ele teŋa la poan yɛhera bii kɛn'ɛre na. Daaŋɔ ma'an n daa sigere teŋa la zuo. 6 Teŋkanra daa sagone taaba mɛ, te teŋbibihe sagona taaba. Se'ere n sɔe la, Yenɛ bahɛ te daaŋɔ n sige zen'an woo. 7 Ge han dɛna yamam, da bahɛ te ya giinla kɔ'ɔhɛ. Ya tooma la tare yɔɔrɛ mɛ.8 Asa n wom yelehom sebo te Oded dayɔa Azaria tɔgɛ la, a iŋa kpeŋe mɛ, te a bahɛ te ba vɔn' baga la Yuda la Benyamin teŋhe zan'an poan bahɛ, la baga se'a n boe teŋse'ehe n boe Epraim teŋa la n yagɛ zoore zuo te ba zabɛ to'ohe se la poan bahɛ. Ge malom maalɛ Na'ayenɛ kaanbegɔ daka la n ze' Na'ayenɛ Yire la zenzaka la poan la. 9 Te a lagahɛ Yuda la Benyamin nɛreba, la Epraim, Manase la Simeon teŋhe nɛreba sɛba n daa baŋɛ te Yenɛ n boe la Asa, yehe Israel wa'ana na bɔna a nu'uhen la.
10 Te ba lagahɛ Yerusalem poan, Asa na'am gɔŋɔ zuo yuuma pia la anuu poan, de ŋmarehe setan' poan. 11 De daarɛ, ba yehe la lɔlehe kɔbehe seyopɔe la piihe tuha ayopɔe ban fan' lɔgɔseto zaberɛ la poan na la kaanbɛ bo Na'ayenɛ. 12 Ge nya biŋe nɔɔrɛ te ba dɔla Na'ayenɛ n de ba sɔdoma Yenɛ la la ba suunre la ba potɛn'ɛrɛ zan'an. 13 Hom se'em n kan doohe Na'ayenɛ Israel Yenɛ wa, dɛna bia bii bonkotɛ, boraa bii pɔka, ba lobe ho ko. 14 Ge ze'ele Na'ayenɛ nɛŋan pɔ' nɔɔrɛ la voole, la tentana la benkona peebego. 15 Te Yuda woo nyeena la nɔɔrɛ la te ba ze'ele Na'ayenɛ nɛŋan pɔ' la ba suunre zan'an, la bama n ɛ en ninmɔ'ɔrɛ te a kelehe ba la. Na'ayenɛ n bo ba sunma'ahom zen'an woo se'em n bala.
16 Te Naba Asa yɛɛ a mayaaba Maaka pɔgɔnaba na'am la, la en mɛ Aserah bagarɛ la. Te Asa ŋmaɛ a bagarɛ la tare dɛ ta nyɔ' Kidron bɔn'ɔn la poan. 17 Ge kuŋkuma zuo kaanbegɔ zen'enhe daa kelom bɔna Israel poan mɛ. Ge Asa vom dabeha zan'an poan, a suunre ka tare dɛngerɔ. 18 Te Asa tare lɔgɔseto te a sɔ la a mɛŋa yehe la, sanlema la sanlenpeelega la yire poan lɔgɔseto bo Yenɛ la na kɛn'ɛhɛ Yenɛ yire la poan.
19 Zaberɛ ka sige Yuda teŋa poan tara tara la Asa na'am gɔŋɔ zuo yuuma pihitan' la anuu poan.