Abiya di Yuda na'am
13
1 Yeroboam na'am gɔŋɔ zuo yuuma pia la anii poan, te Abiya di Yuda na'am. 2 A zin'ire a na'am gɔŋɔ zuo la yuuma atan' Yerusalem poan. A ma yu'urɛ dela Maaka, dɛna Gibea boraa Uriel pɔyɔa. Te zaberɛ bɔna Abiya la Yeroboam teŋasoka. 3 Te Abiya dekɛ pɛɛntɛɛnreba tuha kɔbehe senaahe n kpe'em ge mina zaberɛ keŋɛ, te Yeroboam me dekɛ pɛɛntɛɛnreba tuha kɔbehe senii n kpe'em ge mina zaberɛ te ba maahom yehe na.4 Te Abiya zom Zemaraim Zoore la n boe Epraim teŋa la n yage zoore zuo la ta yeti, Yeroboam la Israel buuri wa, kelehe ya! 5 Ya ka mi' te Na'ayenɛ Israel Yenɛ la biŋe la nɔɔrɛ n ka lukure dekɛ Israel eŋɛ naba David la a kɔma nu'uhen te ba sɔna Israel behera saŋa woo? 6 Ge la bala zan'an, Nebat dayɔa Yeroboam n de David dayɔa Solomon yameŋa yehe a kpɛ'ɛma wa nu'uhen mɛ ge tuluge zabera la en. 7 Te nɛreyaalehe n ka tare vɔnrɛ pa' ho poore, faanreba n kpe'em gana Naba Solomon dayɔa Arehoboam wa n daa nan de' bia wa, te a daa ka nyaŋɛ zabɛ la ba. 8 Nananawa, ho maahom mɛ te ho zabɛ Na'ayenɛ n yuun dekɛ teŋa la na'am bo naba David te a beha la, nya yehe na la ho pɛɛntɛɛnreba kekeko, ge tara ho sanlema nagabibihe baga la te Yeroboam kure te ba dɛna ya yena la. 9 Hom ka dige Na'ayenɛ malemadoma la n de Aron dayɔɔhe la mɛ la Levidoma la ge loohe ho malemadoma wo teŋhe wo n loohe ba malemadoma se'em la? Se'em woo n tare lɔlega la peraahe ayopɔe na pee a mɛŋa ne lebege la ho yena yooro wa malemadaana. 10 Ge han dɛna tomam, Na'ayenɛ n de tomam Yenɛ. Tomam ka zagahɛ en. Aron dayɔɔhe n de malemadoma tona Na'ayenɛ wa nɛŋan, te Levidoma la soŋora ba. 11 Bolika la zanɔɔrɛ woo, ba nyɔ'anre nyɔ'an bo'olom mɛ la digilom bɔ'ɔra Na'ayenɛ, te toolom boroboro la paga tebole sonɛ la zuo, te sanlema bugum lamehega zɛ'ɛlega la zɛ'a te bugum lamehe la suga maahom laŋerɛ zanɔɔrɛ woo. Se'ere n sɔe la, tomam dole la Na'ayenɛ to Yenɛ la n bo to nɔse'ere la, ge hom zagahɛ en mɛ. 12 Yenɛ boe la tomam mɛ, dɛna tomam nɛŋadaana, te malemadoma la me maahena te ba peebe tentana la bahɛ ya zuo. Israeldoma wa, da zabɛ ya la Na'ayenɛ n de ya sɔdoma Yenɛ wa ge ya kan nyaŋɛ.
13 Ge te Yeroboam tom pɛɛntɛɛnreba te ba kae Yudadoma pooren, te Israeldoma basɛba bɔna Yudadoma la nɛŋa, te basɛba bɔna ba pooren. 14 Yudadoma n ta baŋera la, te Israeldoma la zaberɛ mɛ la ba pooren la nɛŋa zan'an, te ba me kaahɛ bo Na'ayenɛ, te malemadoma la me peebe tentana la, 15 te Yudadoma la kaahɛ tagurega. Ban kaahɛ tagurega la, te Yenɛ damɛ Yeroboam la Israel nɛreba la zan'an, Abiya la Yuda nɛŋan. 16 Israel buuri la n zote te ba peɛn Yudadoma la, te Yenɛ dekɛ ba eŋɛ Yudadoma la nu'uhen, 17 te Abiya la a nɛreba la kɔrom ba gaŋɛ, ko Israel pɛɛntɛɛnreba tuha kɔbehe senuu. 18 Ban kɔrom Israel boraahe la saŋkaŋa poan se'em n bala, te Yudadoma la nyaŋɛ ba, bama n dekɛ ba mɛhe delom Na'ayenɛ n de ba sɔdoma Yenɛ la zuo. 19 Te Abiya dige Yeroboam poore, to'ohe teŋhe sena wa. Betel teŋa la ka teŋbibihe, Yesana teŋa la ka teŋbibihe la Epron teŋa la ka teŋbibihe. 20 Yeroboam ka le maan nyɛ paŋa Abiya saŋa la poan zan'an, tara tara te Na'ayenɛ ta damɛ en te a ki.