Te a maalɛ nyɔgom kaanbegɔ daka
4
1 Te a maalɛ nyɔgom kaanbegɔ daka la te ka teŋa woko dɛna santire pihiyi' te ka yaleŋa dɛna santire pihiyi' te ka saazuo woko dɛna santire pia. 2 A dekɛ nyɔgom kure laa la te ka yi'ira Ko'kantɛ la, te ka dɛna kiliga, te ka yaleŋa dɛna santira pia, te ka saazuo woko dɛna santira anuu. Mi'magahega woko n de santira pihitan' en dekɛ makɛ ka mum. 3 Laa la nɔgbanɛ la teŋa na, a golɛ wama guunlehe seyi' kae ka. 4 Te ba kure lɔlehe pia la seyi', te laa wa yaga se zuo, te lɔlehe la setan' nɛhe tɔ zuɔ, te setan' nɛhe tɔ zanɔya bɔba, te setan' nɛhe tɔ gɔbega, te setan' nɛhe me tɔ dapɔya. Te laa wa n de Ko'kantɛ wa suga se zuo, te se fehe tɔ taaba bɔba teŋasoka. 5 Te laa wa takenɛ dɛna nu'dibila, te ka nɔɔrɛ la gɔmɛhɛ kae soŋa. Ka poan ko'om dɛna dogorɔ tuha atan'. 6 Ge kure peere laahe pia, dekɛ senuu ze'ele ko'kantɛ laa la zuɔ, te senuu zɛ'a gɔbega, te ba pɛɛra nyɔ'an lɔgɔrɔ la bini. Ge laa la n de Ko'kantɛ la dela malemadoma la pɛɛra ba mɛhe bini.7 Ge maalɛ botelelehe pia, wo ban pa'alɛ se'em la, te senuu zɛ'a Yenɛ Yire la poan zuɔ, te senuu zɛ'a gɔbega. 8 Te a maalɛ tebola pia ze'ele Yenɛ Yire la poan, anuu zuɔ, anuu gɔbega. Ge maalɛ sanlema laahe kɔbega n tare miiha. 9 Te a maalɛ malemadoma zenzaka la, la zenzaka kantɛ la la se kolehe, takɛ kolehe la la nyɔgom. 10 Ge nya dekɛ laa n de ko'kantɛ la ze'ele Yenɛ yire la gɔbega bɔba pooren na.
11 Ge Huram maalɛ dogorɔ, la vaahe, la miihego laahe. Huram n ba'ahɛ toonse'ere te a to'e Naba Solomon zen'an, Na'ayenɛ Yire la mea poan se'em n bala. 12 Nyɔgom zɛnya ayi' la, la fotohe seyi' la, la zɔntɔ la n kure lo' zɛnya la zuo la, la gologa la, 13 *pomegranate kɔbehe senaahe la n golɛ guunlehe seyi' kae fotohe seyi' wa en vuge zɛnya wa fotohe la zuin la, 14 ze'elehe pia la se laahe kanra pia la, 15 laa sɛka n de ko'kantɛ la. 16 dogorɔ, vaahe, nɛnɔ yaahega doma la doka lɔgɔrɔ woo. Huram Abi dekɛ la nyɔgom n ane soŋa kure lɔgɔtona wa woo bo Naba Solomon te to dɛna Na'ayenɛ Yire la poan lɔgɔrɔ. 17 Yordan paberɛ la poan, Sukot la Zereda teŋhe teŋasoka yaka la poan, te naba wa bahɛ te nɛreba la keŋɛ ta yagona lɔgɔrɔ la woo naanɛ nya ne ka'ɛ nyɔgom doohe naanɛ woo zuo, kure lɔgɔrɔ la zan'an. 18 Solomon n bahɛ te ba maalɛ lɔgɔkooŋɔ wa se'em n bala. Nyɔgom sebo te a dekɛ maalɛ tɔ la ba' zo'e gaŋɛ mɛ te se'em ka mina nyɔgom la tebehom n zone se'em.
19 Te Solomon bahɛ te ba maalɛ lɔgɔseto woo n boe Yenɛ Yire la poan la, ta ta' la sanlema ko'ɛnka daka la tebole se'ere te danlehom boroboro pagata de zuo la 20 sanlema butolela ze'elehe la se butolelahe te se nɛɛra bugum Saraa la nɛŋan na wo ban pa'alɛ se'em la 21 puuro la butolelahe la migihe n de salensoma la 22 migihe se'ehe la laahe n tare miiha la deensontɔ la laahe se'ehe n tare dogora. Ba dekɛ la salensoma paɛ paɛ kure lɔgɔtona wa, ge sanlema kure kuto seto n tare Yire la yeŋa kolehe la de poan Saraa la kolehe.