Solomon, n dayɔa wa, nan ho sɔ Yenɛ la ho suunre zan'an
28
1 Te David daa yi' Israel nɛŋadoma lagahɛ Yerusalem na. Nɛresɛba te a yi' n wana, ba yizuto keendoma la ba zaba nɛŋadoma sɛba n sɔe nɛreba tuha la kɔbehe behera la sɛba n behere a lɔgɔrɔ la sɛba n sɔe naba yire tooma, paŋadoma la zan'an la pɛɛntɛɛnreba sɛba n kpe'em. 2 Naba David ihege yeti, Kelehe ya ma, n sɔɔnrɔ wa. La daa bo la n suuren te n mɛ' yire bo Na'ayenɛ nɔbiŋere daka la, te la dɛna Yenɛ na'ma tagalegɔ zen'an. Mam maahom mɛ te n mɛ' a yire la. 3 Ge Yenɛ yele mam te n da mɛ' yire bo en. Se'ere n sɔe la n daa ko la nɛreba zaberɛ poan. 4 Ge la bala zan'an, Na'ayenɛ Israel Yenɛ la n loe ge deehe mam nam wa ya zan'an zuin. A loe Yuda la me eŋɛ ba nɛŋadoma, ze'ele bilam loe mam sɔ yire, n sɔ yire la poan mam te a nɔŋɛ, ge bobe ma na'am Israeldoma zuin. 5 Na'ayenɛ bo mam dayɔɔhe kekeko ge a loe n dayɔa Solomon te a sɔe n na'arɛ. 6 Na'ayenɛ yele mam yeti, ho dayɔa Solomon wa n wan dɛna n dayɔa te mam me dɛna a sɔ ge te a mɛ' n yire la bo mam. 7 A han sake dɔla mam nɔya la mam nɔze'elego wa wo n pon deŋɛ dɔla mam se'em wa a sɔ'ɔlom la wan bɔna wuuha wuuha. 8 Bala la to ze' la Israel lagaŋɔ Na'ayenɛ to Yenɛ nɛŋan wa te mam yele ya, doohe Na'ayenɛ ya Yenɛ nɔya la wo n bote se'em la yamam la ya yaahe wan sɔna teŋsoŋa wa wuuha wuuha.9 Solomon, n dayɔa wa, nan ho sɔ Yenɛ la ho suunre zan'an, ge na'aha en. Na'ayenɛ behere la nɛra woo suunre la a potɛn'ɛre. Ho han ɛ en, ho wan nyɛ en. Ge ho han bire poore bahɛ en a me wan bire poore bo ho. 10 Tɛnra te Na'ayenɛ loe hɔ te ho mɛ' a yire bo en. Tara sunkpe'ene la ho ton toonɛ wa!
11 David daa nya dekɛ yire la te a bɔta te Solomon mɛ dɛ se'em la boe en mɛ, pa'alɛ en zenzaka deto la saazuo deto la teŋa deto la lɔgɔrɔ deto la toolom deto la Saraa la zan'an. 12 Ge a le pa'alɛ en sea la n pa'alɛ en te a mɛ' yeŋa deto Yenɛ Yire la poan la deto toseto te to dɛna Yenɛ Yire lɔgɔrɔ deto la toolom lɔgɔrɔ deto. 13 A pa'alɛ en enŋa wan pu Na'ayenɛ Yire nɛŋadoma la Levidoma tɔka tɔka se'em la tooma la toolom lɔgɔrɔ la te ba wan tara to se'em. 14 A le kelom yele en enŋa wan makɛ sanlema la sanlempɛɛla la se'em n maale toolom lɔgɔrɔ la 15 makɛ sanlema la sanlenpeelega la la butoleladoma la ba ze'elehe la 16 makɛ sanlema maalɛ tebola se'ere te toolom boroboro la bɔna de zuo la me makɛ sanlempɛɛla tebola la 17 makɛ sanlensoma bo vaahe te ba tara yaaha nɛnɔ la lakanra la makɛ sanlema bo bibihe la makɛ sanlempɛɛla te ba maalɛ la bibihe la 18 makɛ salensoma maalɛ ko'ɛnka daka. Ge te a yele en te a wan eŋɛ la wane maalɛ Na'ayenɛ nɔbiŋere daka la liŋa te kelompagehedoma la yaga ka zuo.
19 Te David daa yele Solomon yeti, Mam golehɛ sɛla woo te Na'ayenɛ pa'alɛ mam la hom wan mɛ' Na'ayenɛ Yire la se'em. 20 David me yele a dayɔa Solomon yeti, Tara potɛn'ɛrɛ, ge bahɛ te ho iŋa kpeŋɛ, ge ma'ɛn ho mɛŋa! Da zɔ dabeem bii enŋ kɔhegɔ. Na'ayenɛ mam Yenɛ wan soŋe hɔ sɛla woo te yire wa mɛ ba'ahɛ, te ba kɛn' bini pɛngɛ en. 21 Malemadoma la Levidoma me ba toonɛ, la yamdoma la zan'an maahom mɛ te ba tom, nɛreba la la ba nɛŋadoma la wan eŋɛ sɛla woo te ho yele ba la.