David daa lagahe Israeldoma la zan'an
13
1 David daa sɔnhɛ la Israel zaba nɛŋadoma la n behere tuha tuha te sɛba behera kɔbehe 2 ge nya yele nɛra woo n boe bilam la yeti, La han ana ya soŋa ge me le dɛna Na'ayenɛ to Yenɛ la potɛn'ɛrɛ, to tom lagahɛ nɛra woo n boe Israel teŋa wa poan la kala na, ta ta' la malemadoma la Levidoma la zan'an. 3 Ge to me dekɛ Yenɛ nɔbiŋere daka lebe to zen'an na. Se'ere n sɔe, Saul saŋa poan, to ka sokɛ Na'ayenɛ en bote sɛla. 4 Ba zan'an naɛ nɔɔrɛ sakɛ te la ana soŋa. 5 David daa lagahe Israeldoma la zan'an, pɔhɛ Sihor Kolaa n boe Mizraim teŋa poan paɛ Lebo Hamat teŋa te ba keŋɛ Kiriat Yearim teŋa dekɛ Yenɛ nɔbiŋere daka tare lebe ba zen'an la. 6 David la Israel zan'an paɛ Baala teŋa, te ba yi'ira ka Kiriat Yearim, n boe Yuda poan la nya dekɛ Yenɛ nɔbiŋere daka la. Na'ayenɛ tara a naam zin'an kelompagehedoma n zɛ'a daka zuo la teŋasoka ge daka la n deŋa a mɛŋa denɛ la.7 Ba dekɛ ka Abinadab yire, sugule toroko paalega zuo, te Uzah la Ahio pɛ'ɛra nii la, 8 te David la Israeldoma la woo daa wa'are mɛ ge yooma la ba paŋa zan'an te ba zɛnkɛ Yenɛ yu'urɛ, ge te kɔnlɔ la gulo la lenlahe la tentana damena. 9 Ban ta paɛ Kidon dia tɔa zen'an la, nahɔ la gɛnta te bo lu te Uzah dekɛ a nu'o te a gin' nɔbiŋere daka la. 10 Bilam bilam te Na'ayenɛ sunsunya nyie la Uzah te a ko' en, la enŋa n kalom nɔbiŋere daka la zuo, te a ki' Yenɛ nɛŋan bilam.
11 David sunsunya nyie la Na'ayenɛ n ko Uzah la, bala te ba segɛ zen'an la Perez Uzah.a 12 Te dabeem kɛn' David te a yeti, N yeti n eŋɛ la wane tare Yenɛ nɔbiŋere daka wa kule n yire na? 13 David daa ka nyaŋɛ tare nɔbiŋere daka la kule a yire David Teŋab ge bahɛ ka Gat boraa Obed Edom yire poan. 14 Yenɛ nɔbiŋere daka daa boe la bilam ŋmarehe setan', te Na'ayenɛ kan' som bahɛ Obed Edom yire la zuo.