Israeldoma zan'an tigihe ba mɛhe David nɛŋan Hebron teŋa
11
1 Israeldoma zan'an daa tigihe ba mɛhe David nɛŋan Hebron teŋa poan yeti, Baŋɛ te to dela sɔɔnrɔ. 2 Saul na'am saŋa la hon de te Israel pɛɛntɛɛnra nɛŋadaana. Te Na'ayenɛ ho Yenɛ daa yele ho yeti ho wan ta dɛna mam nɛreba wa duŋkeema la ba naba. 3 Israel keendoma zan'an n lagahɛ David zen'an Hebron teŋa poan, te David biŋe nɔɔrɛ la ba Na'ayenɛ nɛŋan ge te ba sɔ' en la kaam te a dɛna naba behera Israeldoma dohe Na'ayenɛ yelehom la te a dekɛ bo Samuel la saŋkaŋa poan.4 David la Israeldoma daa lagom keŋɛ Yerusalem. Saŋkaŋa la daa dela Yebus ge Yebusdoma bɔna bini. 5 Yebusdoma yele ba yeti, To da sakɛ te ya du' ka la na. Ge te David nyaŋɛ kɛn' to'e ba Zion Zoore teŋkanra te ba nya yi'ira ka David Teŋa. 6 David n daa yele yeti, Mina n diŋɛ tɛn' Yebus nɛreba wa ayema ko' enŋa n wan dɛna ya kpɛ'ɛma. Te Zeruiah bia Yoab nyaŋɛ zom yia to'e a kpe'eŋo. 7 David sɔe kɛn'ɛra ka poan, te, ba yi'ira ka David Teŋa. 8 Te a mɛ kura zom kae ka mum, ge te Yoab me behɛ te ba lebe maale sɛla n gee la. 9 Pɛɛntɛɛnreba Na'ayenɛ n bo la en la zuo, David kanrege mɛ te la ka tare makerɛ.
10 Kansaŋehe sena n daa tebege David a na'am sɔ'ɔlom la poan soŋɛ en te a di Israel na'am la te a doohe Na'ayenɛ yelehom la. 11 Kansaŋsena mea kanlɛ n wana: Hakmoni boraa Yasobeam n de ba kpɛ'ɛma. Enŋa ma'an ko' la nɛreba kɔbehe setan' la a kanɛ, zaberɛ deyena poan. 12 Kansaŋehe setan' la poan, Aho boraa Dodai dayɔa Eleazar me dela ayema. 13 A dohe David, Israeldoma la Pilistidoma n zaberɛ Pas Damim teŋa poan la. Mui va'am la poan te Israeldoma ba zan'an zɔ 14 ge ba ze'ele va'am la poan tɛn' Pilistidoma ko ba. De daarɛ te Na'ayenɛ bo ba nyaŋkantɛ.
15 Pɛɛntɛɛnreba pihitan' la n ne pon tɛbegera David la ba poan boraa kansaŋehe setan' sige Adulam taŋa yoko la poan ta paɛ David, ge te Pilistia pɛɛntɛɛnreba la tiihom la Arepaim bɔn'ɔrɔ la poan. 16 Saŋkaŋa poan te Pilistia pɛɛntɛɛnreba la to'e Betlehem zan'an, ge te David kelom bɔna a soka zen'an la poan. 17 Te ko'nyuuro tara David te a yeti, Ane n wan ankɛ bulesɛka n pɔnre Betlehem nayaŋa ko'om na bo' mam te n ko n ko'nyuuro wa! 18 Te kansaŋehe setan' wa nyaŋɛ kɛn' Pilistia pɛɛntɛɛnreba teŋasoka, kɛn' Betlehem ankɛ bulega ko'om wa n pɔnre nayaŋa la tare na bo' David. Ge David zagahɛ, ka nyu' ge ka'ɛ bo' Na'ayenɛ. 19 A yeti, Yenɛ kan sakɛ te mam nyu' ko' buna wa! Bo ane wo nɛreba wa ziim la. Ba ankɛ bo bo mam. Toon kpe'eŋo wa te kansaŋehe setan' wa nyaŋɛ tom n bala.
20 Yoab yebega Abisai n de pɛɛntɛɛnreba pihitan' wa nɛŋadaana. A daa zabɛ mɛ la a kanɛ la boraa kɔbehe setan' ko' ba, ge wa'ana dɛna nɛrekantɛ wo boraahe setan'. 21 Enŋa n de nɛrekantɛ wo batan' la dɛna ba nɛŋadaana, ge a ka pa'ahɛ bana ba tan' la.
22 Yehoiada dayɔa Benaiah la ze'ele Kabzeel teŋa na la a daa dela kansaŋehe n eŋɛ la yelekanra kekeko. A daa ko' Moab zabzabera la ba yi' la, le daa le ma'ahom yehe keŋɛ yoko poan, mɛgelom zen'an daarɛ deyema ta ko' gbegenɛ. 23 A mi daa lagom ko' Mizraim nɛra wagelɛ, yɛɛ a kanɛ kantɛ. Benaiah daa dekɛ la dɔɔ zabɛ la en, to'e kanɛ la a nu'uhen ko' en. 24 Yehoiada dayɔa Benaiah toonkanra la n daa bala wo n lagom dɛna batan'. 25 A daa dela nɛre zure pihitan' la poan, ge me daa ka kpe'em paɛ batan' la. David bahɛ te a dɛna la sɛba n gure en la nɛŋadaana.
26 Sɛba n lagom dɛna pihitan' la daa dela Yoab yebega Asahel la Betlehem boraa Dodo dayɔa Elhanan la 27 Haror boraa Samot la Pelon boraa Helez la 28 Tekoa boraa Ikes dayɔa Ira la Anatot boraa Abiezer la 29 Husat boraa Sibekai la te Aho boraa Ilai la 30 Netopa boraa Maharai la Netopa boraa Baana dayɔa Heled la 31 Benyamin Gibea boraa Aribai dayɔa Itai la Piriton boraa Benaiah la 32 Gaas kolaa teŋa boraa Hurai la Arbat boraa Abiel la 33 Baharum boraa Azmavet la Saalbon boraa Eliaba la 34 Gizon boraa Hasem dayɔɔhe la Harar boraa Sagee dayɔa Yonatan la 35 Harar boraa Sakar dayɔa Ahiam la Ur dayɔa Elipal la 36 Mekera boraa Heper la Pelon boraa Ahiya la 37 Karmel boraa Hezro la Ezbai dayɔa Naarai la 38 Natan sɔɔn Yoel la Hagri dayɔa Mibhar la 39 Amon boraa Zelek la Beerot boraa Naharai n ziire Zeruiah bia Yoab zaba lɔgɔrɔ la 40 It boraahe Ira la Gareb la 41 Hiti boraa Uria la Alai dayɔa Zabad la 42 Areuben boraa Siza dayɔa Adina n dɛna Areuben doma la pɛɛntɛɛnreba pihitan' neŋadaana la 43 Maaka dayɔa Hanan la Mit boraa Yosapat la 44 Asterot boraa Uzia la Aroer boraa Hotam dayɔɔhe Sama la Yeiel la 45 Simri dayɔa Yediael la a sɔɔn Yoha n de Tiz boraa la 46 Mahav boraa Eliel la Elnaam dayɔɔhe Yeribai la Yosavia la Moab boraa Itma la 47 Eliel la Obed la Mezoba boraa Yaasiel.