Manase dela yuuma pia la ayi' ge dɛna naba
21
1 Manase dela yuuma pia la ayi' ge dɛna naba, te a behɛ teŋa la yuuma pihinuu la anuu Yerusalem poan. A ma yu'urɛ dela Hepsiba. 2 A tona be'em Na'ayenɛ nɛŋan, tona toonfɛn'ɛha se'a te teŋse'ehe te Na'ayenɛ dige se Israeldoma nini bahɛ la. 3 A malom mɛ kuŋkuma zuo kaanbegɔ zen'enhe la te a sɔ Hezekia tabelɛ gbi' bahɛ la, mɛ Baal kaanbegɔ bimbina, ge sɛ Aserah bagarɛ kaanbegɔ dɔɔrɔ wo Israel naba Ahab n yuun eŋɛ se'em la. A kaanbera ge na'ahera yelese'a woo n boe saazuo ha wa. 4 A mɛ baga kaanbegɔ zen'enhe Na'ayenɛ Yire la poan, zen'sɛka te Na'ayenɛ yeti enŋa yu'urɛ wan pota la bilam Yerusalem teŋa poan la. 5 A kɛn' Na'ayenɛ Yire zenzagahe seyi' la poan mɛ baga kaanbegɔ zen'enhe bo lɔgɔseto woo n boe saazuo wa. 6 A dekɛ a dayɔa nyɔ' kaanbɛ bogora bakologo, ge tomam sɔɔntooma la tiimtooma la nini tooma. A ba' toon be'emtooma ta gaŋɛ, nyie Na'ayenɛ suunre. 7 A maalɛ Aserah bagarɛ tare de ta ze'ele Na'ayenɛ Yire la poan te Na'ayenɛ yele David la a dayɔa Solomon yeti Yire dena poan Yerusalem wa poan te mam loe Israel zen'enhe wa woo poan te n yu'urɛ pota de poan yɛ'ɛha ha la. 8 N kan bahɛ te ba na'arɛ malom sɛregɛ bii ba tuum yehe teŋsɛka te mam dekɛ bo ba yaabdoma la poan, Israel han man'ɛn ba mɛhe dɔla mam bo ba nɔse'a la zan'an, la Pa'alegɔ seko te mam yameŋa Moses ze'ele bo ba la. 9 Ge nɛreba la ka kelehe. Manase pan'ahɛ ba malom kɛn' be'em poan la en tom se'em la gaŋɛ teŋse'ehe te Na'ayenɛ dige se Israeldoma ninin.10 Na'ayenɛ tɔgɛ doohe a yamehe n de a nɔtɔgɔheba la poan yeti, 11 Yuda naba Manase n tom toonfɛn'ɛhe se'a la. Enŋa n tom toonfɛn'ɛha gaŋɛ Amoridoma n yuun boe a nɛŋan la. Enŋa n dekɛ a baga la ganlom Israeldoma la. 12 Bala zuo, Na'ayenɛ Israel Yenɛ la yeti, n yeti n tare la be'em wa'an Yerusalem la Yuda teŋhe zuo na, te tobese'ere woo n wom wan wam. 13 N wan sagom Yerusalem wo n sagom Samaria la Ahab yire la zan'an. N wan pee Yerusalem wo wanɛ la, tuluge ba vuge. 14 N wan bahɛ te n nɛreba wa n gee fiin wa lu ba diŋdoma nu'uhen. Ba wan lebege ba diŋdoma nɛŋɔ te ba sagom ba. 15 Se'ere n sɔe la, pɔhɛ ba yaabdoma n ze'ele Mizraim poan yehe na paɛ saŋkana buuri wa, ba kɔ'ɔn tona la be'em mam nɛŋan, nyiiha mam sunsunya tara tara la zina. 16 Te Manase ka'ahɛ ziim sebo n ka tare taalɛ Yerusalem teŋa wa zen'an woo poan pa'ahɛ a be'em sebo te a bahɛ te Yuda zan'an tue mam Na'ayenɛ nɛŋan la.
17 Manase toonse'a n gee la enŋa n tom sɛla woo la be'em sebo woo te a tom la golehɛ eŋɛ la Yuda teŋa nadoma yɛla gɔŋɔ la poan. 18 Manase kule paɛ a yaabdoma te ba pin' en ba yire samanɛ poan, Uza samanɛ poan, te a dayɔa Amon sɔe a na'arɛ dɛna naba.
19 Amon dela yuuma pihiyi' la ayi' ge di na'am la, te a behɛ teŋa la yuuma ayi' Yerusalem poan. A ma yu'urɛ dela Mesulemet dɛna Haruz n de Yotba teŋa boraa la pɔyɔa. 20 Amon tona be'em Na'ayenɛ nɛŋan wo a sɔ Manase la. 21 A nɛ a sɔ nataka la, tona bɔ'ɔra baga ge na'aha baga se'a te a sɔ yuun na'aha la, 22 A bahɛ Na'ayenɛ a yaabdoma Yenɛ la, ka dɔla Na'ayenɛ n bote se'em. 23 Amon wa yamehe kae a pooren, ko en naba yire la poan. 24 Teŋa la poan nɛreba ka sakɛ, ge me ko' nɛresɛba woo n kae naba Amon pooren ko' en la, ge tee bobe naba wa dayɔa Yosia na'am, te a sɔe a sɔ la na'arɛ dɛna naba.