12
1 Israel naba Yehu na'am gɔŋɔ zuo yuuma ayopɔe poan, te Yoas di Yuda na'am. A zin'ire na'am gɔŋɔ zuo yuuma pihinaahe Yerusalem poan. A ma dela Beerseba pɔka te ka yu'urɛ n yi'ira Zibia. 2 Yoas tooma zan'an a vom dabeha woo poan tegɛ Na'ayenɛ nini. Malemadaana Yehoiada n pa'ale en te a dɔla. 3 Kuŋkuma zuto kaanbegɔ zen'enhe la ma'an n kelom bɔna, te nɛreba kelom kaanbera se poan, ge nyɔ'anra ko'ɛnka se poan.4 Yoas ta yele malemadoma la yeti, Tare toolom lɔgɔrɔ la ligiri la woo kena Na'ayenɛ Yire wa poan na. La dɛna nɛra n yɔɔrɛ a koberɛ bii nɛra pɔ' nɔɔrɛ la Na'ayenɛ te a wan bo en bii nɛra suunre kalom n te a tare wa'an Na'ayenɛ Yire wa poan na la. 5 Bahɛ te malemadoma wa tɔ'ɔha ligi'ena wa te i bɔna ba zen'an te ba dekɛ maalɛ Na'ayenɛ Yire wa zen'sɛka woo n nare maalegɔ.
6 Ge lan eŋɛ se'em dela, la ta paɛ la naba Yoas na'am gɔŋɔ zuo yuuma pihiyi' la a atan', te malemadoma la ka loe Na'ayenɛ Yire la zen'sɛka maalɛ. 7 Bala te Naba Yoas yi' malemadaana Yehoiada la a taaba la lagahɛ na, soke ba yeti, Wane te ya ka bɔta yire la maalegɔ? Da le to'ohe ya ligiri la bɔ'ɔra ya mɛhe, i dela yire la maalegɔ ligiri. 8 Malemadoma ko nɔɔrɛ te ba kan le to'e lagahɔ nɛra zen'an, ba nu'o me pon kan bɔna yire la maalegɔ poan.
9 Malemadaana Yehoiada dekɛ daka mune voŋɛ yoko ko poan dekɛ ta ze'ele lɛm la kaanbegɔ daka la zuɔ bɔba, te se'em woo n kɛn'ɛre Na'ayenɛ Yire la poan na. Malemadoma sɛba n gure Na'ayenɛ Yire koleŋa la tɔ'ɔha ligise'a woo te nɛreba tara kɛn'ɛra Na'ayenɛ Yire la poan na la eta dakɛ wa poan. 10 Ba han ta behɛ te ligiri la zo'e daka wa poan, naba gɔŋgoloha la malema nɛŋadaana la n ne keŋɛ ta ka'ɛ i eŋɛ bɔra poan lo' i nya kaanlɛ Na'ayenɛ Yire la ligiri la n de se'em. 11 Ba nya kaanla ligiri la wɛleha bɔ'ɔra sɛba n maale Na'ayenɛ Yire la, mina Na'ayenɛ Yire la n ane se'em woo la. Te bama me ne to'e yɔ kpa'areba la mɛteba sɛba n tone Na'ayenɛ Yire la tooma la 12 sɛba n mɛte dangoone la sɛba n ŋmate kuga. Te ba da'ara dɔɔrɔ la kuga se'a n kerehe wan dekɛ mɛ. Te ba dekɛ maalɛ Na'ayenɛ Yire la zen'se'ehe n sagom la, ge dekɛ tom toonse'ere woo n de yire la maalegɔ toonɛ. 13 Na'ayenɛ Yire ligiri ena wa poan dagɛ ba dekɛ maalɛ sanlenpeelega ko'wama bii migihe bii laakanra bii tentana bii sanlema dogorɔ la laahe bii sanlenpeelega dogorɔ la laahe. 14 Ligi'ena wa dekɛ bo la sɛba n tone Na'ayenɛ Yire wa tooma la te ba me dekɛ i tom Na'ayenɛ Yire la maalegɔ tooma la. 15 Sɛla n pa'ahɛ dela, ligiri la n dekɛ eŋɛ sɛba nu'uhen te ba yɔɔra sɛba n tone tooma la ka tare ba zin'ire pa'alɛ ban eŋɛ ligiri la se'em. Se'ere n sɔe la ba zan'an dela birikindoma. 16 Geere bo'olom la be'em bo'olom ligiri la woo ka tare kɛn'ɛra Na'ayenɛ Yire la poan na. Iŋi dela malemadoma la denɛ.
17 Aram naba Hazael keŋɛ ta tɛn' pɛɛma la Gat teŋa, to'e ka sɔna, te a nini mɔ'ɛ la a zabɛ la Yerusalem la. 18 Ge Yuda naba Yoas vaɛ toolom lɔgɔkanra zan'an te a sɔdoma Yuda nadoma Yehosapat la Yehoram la Ahazia yuun dekɛ to bo Na'ayenɛ Yire la bo'olom sebo te enŋa meŋa daa bo Na'ayenɛ la sanlema se'a woo n boe Na'ayenɛ Yire wa la naba yire poan la bo Aram naba Hazael, te Hazael bahɛ ka le zabɛ Yerusalem la teŋa la.
19 Yoas tooma la en eŋɛ sɛla woo n golehɛ eŋɛ la Yudadoma nadoma yɛla gɔŋɔ la poan. 20 A yamehe n yehe a pooren, ko' en Bet Milo sɔrɔɔ seko n dole yɛ'a Sila la zuo. 21 Simea dayɔa Yozabad la Somer dayɔa Yehozabad n wa dɛna a yamehe la n ko' en. Te ba pin' en a sɔyaabdoma yɔɔ poan, David Teŋa la poan, te a dayɔa Amazia sɔe a na'arɛ dɛna naba.