2 Nadoma 9

1 Nɔtɔgɔha Elisa yi' nɔtɔgɔheba ayema na, yele en yeti, Yɛ ho fuo, lo ho sɛganɛ, la ho dekɛ kaam la dugula wa, keŋɛ Aramot Gilead teŋa. 2 Ho han ta paɛ, ɛ Nimsi dayɔa Yehosapat me dayɔa Yehu. Yehe en a taaba poan, tare en kɛn' saraa la poan. 3 Ta ka'ɛ kaam la yeele a zuo, ge yele en yeti, Na'ayenɛ yeti, mam sɔ' hɔ la kaam te ho dɛna Israel naba ge yu'ɛ koleŋa la yehe zɔ da ze'ele!

4 Bala te bodibipaalega wa n de nɔtɔgɔha wa, keŋɛ Aramot Gilead teŋa. 5 A ta paɛ te zaba nɛŋadoma n nan boe ba lagaŋɔ poan, te a mɔɔlɛ bo ba yeti, Nɛŋadaana, mam tare la sɔɔleŋa te n bo ya. Te Yehu soke yeti, To ane? Te a lebehe yeti, Hom. 6 Yehu ihege kɛn' la en, te bodibipaalega wa ta ka'ɛ kaam la yeele a zuo ge yeti, Na'ayenɛ Israel Yenɛ la yeti, mam sɔ' hɔ la kaam te ho dɛna Israel naba, ho behera mam Na'ayenɛ nɛreba wa. 7 Ho damɛ ho daana Ahab yire wa, te mam lerege Yezebel n ka'ahɛ nɔtɔgɔheba la Na'ayenɛ yamehe la woo ziim la. 8 Ahab yire la zan'an wan mɛlom. Mam wan ko Ahab yire la boraa woo, bii da'aberɛ woo n de boraa de poan Israel poan bahɛ. 9 N wan eŋɛ Ahab yire wa wo Nebat dayɔa Yeroboam yire la. N wan eŋɛ dɛ wo Ahiya dayɔa Baasa yire la. 10 Baahe wan obe Yezebel Yezreel samanɛ zuo, nɛra ka boe wan pin' en. En tɔgɛ wana ba'ahɛ la, a yu'ɛ koleŋa la mɛ zɔ.

11 Yehu n yehe lebe a daana yamehe la zen'an na, te ba sɔkera en yeti, Te kɔ'ɛ yam? Zɔlɔgɔ la wa'an ho zen'an na te a eŋɛ la bem? Yehu lebehe ba yeti, Ya mi' ban de sɛba, la ban ta'an pɛbila se'em. 12 Ba yeti, Ponpɔrɔma wa! Yele to en yele ho sɛla la. Yehu me yele ba yeti, Nɔtɔgɔha la n yele mam te Na'ayenɛ yeti, mam sɔ hɔ la kaam, te ho dɛna naba beha Israel teŋa wa. 13 Bilam bilam te ba degehɛ ba fuyɛɛtɔ yeregɛ pagalɛ kura la zuo te a yaga to zuo, ge peebe tentanɛ mɔɔlɛ yeti, Yehu n de naba! 14 Nimsi dayɔa Yehosapat me dayɔa Yehu wa n yehe Yoram pooren se'em n bala. Bala ma'an te naba Yoram la Israel zan'an tiihom la Aramot Gilead pɛɛnbɔn'ɔn la poan te ba zabɛ la Aram naba Hazael. 15 Ge bala ma'an la te Naba Yoram tuluge lebe la Yezreel teŋa na te a tebɛ pɔgɔloŋɔ seko te Aram teŋa pɛɛntɛɛnreba la pɔgɔlom en, enŋa n zaberɛ la Aram naba Hazael la. Te Yehu yeti, Ya han bɔta te mam dɛna naba da bahɛ ya te nɛra yehe teŋa wa poan keŋɛ Yezreel teŋa ta ko'ohe sɛla n eŋɛ wa. 16 Te a bagɛ a yiri toroko, keŋɛ Yezreel teŋa, zen'an te naba Yoram bɛn'ɛnra gan'an la. Te Yuda teŋa naba Ahazia me wa'an bini na te a behɛ naba Yoram.

17 Te gura la n yage Yezreel teŋa deo woko zuo limiha la, nyɛ Yehu la a nɛreba la te ba pɔnre na, te a yele naba Yoram na yeti, Mam nyɛ la nɛreba n pɔnre na. Te Yoram yeti, Loe yiri ban'ara te a to'ohɛ soke nya to kɔ'ɛ yam? 18 Bala te yeho ban'ara la yehe to'ohɛ Yehu, yele en yeti, Naba yeti, to kɔ'ɛ yam? Te Yehu soke n yeti, Aai, tomam ka kene la sunma'ahom na. Pa'ahɛ na. Te gura la le yeti, Yiri ban'ara la paɛ ya, ge a ka lebere na. 19 Te naba le tom yiri ban'ara ayema, te enŋa me paɛ yeti, Naba yeti, to kɔ'ɛ yam? Te Yehu yele en yeti, Aai, tomam ka kene la sunma'ahom. Pa'ahɛ to na. 20 Te gura la le yeti, A paɛ ya ge a ka lebere. Se'em n tukure yiri toroko la tukure la bora bora wo Nimsi dayɔa Yehu la. 21 Yoram yeti, Maahom ya. Te ban maahom a yiri toroko na, te Israel naba Yoram wa la Yuda naba Ahazia zom ba yiri toroko ba yiri toroko to'oha Yehu. Ta paɛ en Yezreel teŋa nɛra Nabot samanɛ la zuo ma'an.

22 Yoram n nyɛ Yehu la, a soke en yeti, Yehu, n kɔ'ɛ yam? Yehu lebehe en yeti, Sunma'ahom wan eŋɛ la wane bɔna, hom ma Yezreel baga kaanbegɔ la sɔɔntooma la to'e teŋa wa zan'an la? 23 Yoram ŋmɛregɛ zɔta ge yeti, Ahazia, bɛnregɔ! 24 Yehu nya foe a pɛɛnhɔ, ve'e a tanhɔ la a paŋa zan'an tɛn' Yoram poore. Te pɛɛnhɔ la kɛn' ta voregɛ a sunsuunre, te a lu a yeho toroko la poan ha. 25 Yehu yele a yameŋa Bidkar yeti, Paɛ ɔnbegɛ en, lobe bahɛ Yezreel teŋa nɛra Nabot samanɛ wa zuo. Tɛnre te hom la mam yuun dole a sɔ Ahab poore mɛ ge te Na'ayenɛ tɔgɛ yele dena wa bahɛ a zuo, yeti 26 Na'ayenɛ wan ka'ɛ ho ziim bahɛ samanɛ dena mea zuo lerege Nabot la a kɔma ziim la. Bala zuo, ɔnbegɛ en lobe bahɛ samanɛ dena mea zuo, te la doohe la Na'ayenɛ yelehom la.

27 Yuda naba Ahazia n nyɛ wana la, a to'e la Bet Hagan teŋa sore zɔta. Ye Yehu digera en ge yeti, Ko' ya enŋa me! Te a pɛɛntɛɛnreba la dakɛ en la pɛɛnɛ a yiri toroko la poan ha Gur kuŋkune la n lɛm la Ibleam teŋa la, ge a walehɛ zɔ kɛn' Megido teŋa ta ki bilam. 28 A yamehe la zi' en la yiri toroko keŋɛ Yerusalem ta pin' en yɔɔ poan la a sɔyaabdoma David Teŋa la poan. 29 Ahab dayɔa Yoram na'am gɔŋɔ zuo yuuma pia la deyena poan te Ahazia daa di Yuda naba.

30 Yehu n ta lɛbera Yezreel teŋa na la, te Yezebel pon wom sɛla n eŋɛ la mɛ. A nya golɛ a nini, ge maalɛ a zuo, nya vɛɛha takole poan na. 31 Yehu n kɛn'ɛre teŋa la nayaŋa poan na la, te Yezebel yeti, Zimri farafara, ho mɛŋa daana te ho ko? 32 Yehu gorege behɛ saazuo ha, ge soke yeti, Ane n pa' tomam pooren? Ane? Te bɔla ayi' atan' behɛ en na. 33 A yele ba yeti, Nyɔkɛ ya en lobe bahɛ teŋa na! Te ba nyɔkɛ en lobe bahɛ na, te a ziim ma' dangoone la, ge lerom yiri la te a bahɛ te i nɛɛre en la. 34 Yehu nya kɛn' ta di ge nyu', ge yeti, Behɛ ya la ya pin' pɔgɔsɛka te nyanɛ di ka wa ge ka dela naba pɔyɔa. 35 Ge ban keŋɛ te ba ta dekɛ en pin' la, ba ka nyɛ a zen'an gaŋɛ a zuowanɛ la a na'tala la a nu'tala. 36 Ba lebe na yele en, te a yeti, Na'ayenɛ yelehom la n bala te a tɔgɛ doohe a nɔtɔgɔha Tisbe boraa Eliya daa yeti, Yezreel teŋa poan te baahe wan obe Yezebel nɛnɔ la. 37 Yezebel iŋa wan bahɛ yoo Yezreel samanɛ zuo, te nɛra kan sakɛ te Yezebel n bala.