7
1 Elisa yele en yeti, Wom Na'ayenɛ yelehom wa. Na'ayenɛ yeti, Beere yɛ'a wana ma'an, zom laa wan kɔɔhera la kpile, te mui laahe seyi' kɔɔhera kpile Samaria teŋa nayaŋa wa poan. 2 Zaba nɛŋadaana la te naba la loe te a dela se'em n de a paŋadaana yele Elisa yeti, Na'ayenɛ han wan pon yu'uhɛ voɔnya saŋgbanɛ wa zuo ha bahɛ na, la wan ta'an eŋɛ? Te Elisa yele en yeti, Ho nini wan nyɛ, ge ho nɔɔrɛ kan vɛnkɛ.3 Boraa senaahe n wa bɔna tare iŋa sagaŋɔ, te ba sa'ɛ ba teŋa la poan bahɛ yeŋa na. Te ba yele taaba yeti, Bene zuo te to wan zin'an ka'lam yoo ta vibe? 4 To han pon yeti to kɛn' teŋa wa poan, kom la n boe ka poan la wan ko tɔ. To me han zin'an ka'lam, to wan ta vibe. Bahɛ te to keŋɛ Aramdoma tiiheŋɔ wa poan ta dekɛ to mɛhe bo ba. Ba han ko tɔ, denɛ en bala, ba han le bahɛ tɔ, to vɔna. 5 Bala te ba ihege yenyɔnleŋa yɛ'a Aram pɛɛntɛɛnreba tiiheŋɔ la poan. Ge ban wa'ana paɛ tiiheŋɔ la nɔɔrɛn la, ba ka wom te nɛra damanɛ. 6 Se'ere n sɔe la, Yenɛ la n daa bahɛ te Aram pɛɛntɛɛnreba wa wom la zaba yiri toroto la yiri la pɛɛntɛɛnreba kekeko damaŋa, te ba yele ba mɛhe yeti, Israel teŋa naba wa dekɛ la Hiti teŋa la Mizraim teŋa nadoma yɛ'a na te ba zabɛ la tɔ. 7 Bala te ba daa zɔ yenyɔnleŋa la poan, ge bahɛ ba sogora la ba yiri la ba bonhe la sɛla woo n boe ba tiiheŋɔ la poan la, ge zɔ ba vom wa zuo.
8 Boraahe wa n tare iŋa sagaŋɔ wa n wa'ana kɛn' tiiheŋɔ wa poan la, ba kɛn' la sogorɛ deo koyema poan, di ge nyu' tegɛ, ge vaɛ sanlenpeelega la sanlema la futo tare ta sogɛ. Ba le lebena kɛn' sogorɛ deo koyema poan va lɔgɔrɔ koŋɔ me poan ta sogɛ. 9 Ba nya yele taaba yeti, Tomam ete sɛla wa dela tuure. Zina dela yelesoma mɔɔlegɔ, te tomam tara dɛ to ma'an wa. To han sina dɛ, te beere yiligɛ tɔ, to boe la yele poan. Bala, bahɛ ya te to keŋɛ nananawa ta yele dɛ bo naba yire. 10 Bala te ba wa'ana yi' sɛba n behere teŋa la nayaŋa la, yele ba yeti, Tomam keŋɛ la Aramdoma pɛɛntɛɛnreba tiiheŋɔ zen'an la poan, ge tomam n paɛ bini la, to ka nyɛ nɛra bii wom te nɛra damanɛ bini. Yiri la bonhe ma'an n lo zɛ'a, te sogorɛ deto la me zɛ'a bala mu'mu'. 11 Te nayaŋguruba la yi' naba yire la ha soolom bo ha.
12 Naba la ihege yu'uŋkoŋɔ la tɔgɛ bo a yamehe yeti, Bahɛ ya te n pa'alɛ ya Aram teŋa pɛɛntɛɛnreba la n bɛnte to' se'em te ba zabɛ la to. Ba mi' te to vibere mɛ, bala te ba bahɛ ba tiiheŋɔ zen'an la, ge sogɛ ba mɛhe mɔɔ poan ha. Ba tɛn'ɛha te to han ze'ele teŋa la poan yehe na, ba wan nyɔkɛ tɔ voto, ge sagom to teŋa la poan na. 13 A yameŋa kayema yeti, Wane te ho kan bahɛ te boraahe dekɛ yiri inuu wa n gee teŋa wa poan wa keŋɛ ta behɛ ge lebena. La han pon ana se'em me, tomam sɛba n yee wa yeti to ki mɛ wo Israel nɛresɛba n pon ki se'em la. Bala, bahɛ te to tom te ba keŋɛ behɛ. 14 Bala te ba bagɛ yiri toroto toyi', te naba la tom ba Aram pɛɛntɛɛnreba tiiheŋɔ zen'an la poan yeti, Ta kae ya behɛ ge lebena. 15 Ba yehe kaara zen'an la ta paɛ Yordan Kolaa la ha, nyɛ te futo la zaba lɔgɔrɔ te Aram pɛɛntɛɛnreba la kanbelɛ zɔta ge degeha baha. Te boraahe wa lebe yele naba la. 16 Bala te Israel nɛreba wa yehe ta sagom Aram pɛɛntɛɛnreba tiiheŋɔ zen'an wa, va sɛla woo ko poan. De daarɛ, zom laa koohe la kpile, te mui laahe seyi' kɔɔhera kpile wo Na'ayenɛ yelehom la n yele se'em la.
17 Bala ma'an la te naba la zaba nɛŋadaana n de a paŋadaana la gura nayaŋa la, ge te nɛreba la nɛ en ta ko wo Yenɛ nɛra la te naba la wa'an a zan'an na te a yele en se'em la. 18 La wa'ana eŋɛ mɛ wo Yenɛ nɛra la n daa yele naba la se'em yeti, Beere wana ma'an, mui laahe seyi' wan kɔɔhera kpile, te zom laa kɔɔhera sanlema kpile Samaria teŋa nayaŋa wa nɔɔrɛn la. 19 Zaba nɛŋadaana n daa lebehe yele Yenɛ nɛra wa yeti, Na'ayenɛ han pon wan yu'uhɛ voɔnya saŋgbanɛ wa zuo bahɛ na, la wan ta'an eŋɛ bala? Te enŋa me daa lebehe en yeti, Ho nini wan ta nyɛ, ge ho nɔɔrɛ kan vɛnkɛ la. 20 La seren eŋɛ la bala, te nɛreba la nɛ en ta ko nayaŋan la.