<<    <     2 Nadoma     4     >    >> 
Pɔka kayema n dɛna nɔtɔgɔheba ayema pɔga kaahɛ yele Elisa
4
1 Pɔka kayema n dɛna nɔtɔgɔheba ayema pɔga kaahɛ yele Elisa yeti, Mam sera, ho yameŋa, ka bɔna. Ho me mi' te a daa zote Na'ayenɛ mɛ. Ge behɛ, a sanɛ daana n wa'ana te a nyɔkɛ n kɔma bayi' te ba dɛna da'aba, a sanɛ la zuo. 2 Elisa soke en yeti, Ho bote n eŋɛ la bene bo ho? Yele mam, ho tare la bem ho yire wa poan? Te pɔka wa lerege yeti, Mam ho yameŋa wa ka tare sɛsɛla n yire wa poan, han dagana kaam dugula kayena ma'an. 3 Elisa yele en yeti, Yehe ɛ nɛreba zen'enhen pemehe dugulehe vɔya zo'e na. 4 Te hom la ho kɔma kɛn' bɔ'en ge nyu', te ho dekɛ kaam la n boe dugulesɛka poan la ka'ara lɛɛra dugule vɔya la. Dugulesɛka woo n perɛ, ya tee kayema. 5 Te pɔka wa bahɛ Elisa, te ka kɔma la doohe ɛ to'ohe dugulehe na, te ba kɛn' bɔ'en yo' bahɛ na, ge te kɔma la degeha dugulehe la bɔ'ɔra en te a lɛɛra. 6 Pɔka wa n leere la bala peta dugulehe wa, te a nya te yele a dayɔɔhe la yeti, Bo ya mam dugula na. Te a dayɔɔhe la yele en yeti, Dugulehe la zan'an n bala. Bilam te kaam la me go'e ka le ka'ara na. 7 La nya wa'ana yele Elisa enŋa eŋɛ se'em la. Te Elisa yele en yeti, Lebe ta dekɛ kaam la koohe yɔ sanɛ la, te sɛla n gee la ho tara beha ho kɔma la.
8 Daarɛ deyema te Elisa dɔla Sunem teŋa tɔla, te pɔka bɔna bini la ka sera dɛna dakanrɛ, pɛnregɛ Elisa te a yee di dia. Bala, saŋa wo te Elisa han ne ta paɛ teŋa la poan, a ne kɛn' la bilam di dia. 9 Pɔka wa ta yele ka sera yeti, Mam mi' te boraa wa n ne makɛ doohe ka'lam tole wa dela Yenɛ nɛra. 10 Bahɛ te to mɛ bɔ' soŋɔ, la to ze'ele gɔrɔgɔ la tebole la koka la butolela ko poan, te a ne han wa'an to zen'an na, a kɛn' bilam ta gan'arɛ vo'ohe.
11 Daarɛ deyema te Elisa wa'ana kɛn' a bɔ'ɔ la poan gan'an, 12 ge yele a yameŋa Gehazi yeti, Yi' Sunem pɔka wa bo mam na. Te pɔka wa wa'ana dɔnbelɛ a nɛŋan. 13 Elisa yele a yameŋa la yeti, Soke pɔka wa yeti, kaŋa n ete to se'em wa, bene te ka bɔta? Ka bote n ze'ele ka na'arɛ sohɛ la bene naba wa bii zaba nɛŋadaana wa zen'an bo en? Te pɔka wa yeti, Mam boe la n nɛreba wa, ge sɛla yele ka koŋe mam. 14 Te a soke Gehazi yeti, Bene n nare pɔka wa? Te Gehazi yeti, Kaŋa ze' wa, ka ka tare bodibila, ge te ka sera me nya korogɛ. 15 Elisa nya yeti, Le yi' ka na. Te a yi' ka te ka wa'ana dɔnbelɛ koleŋa la nɔɔrɛn. 16 Elisa yele ka yeti, Saŋkana le ta paara la, te bodibila boe ho nu'uhen. Te pɔka wa lerege yeti, Aai, n daana. Yenɛ nɛra wa, da pan'ahɛ mam ho yameŋa wa! 17 Ge pɔka wa seren ta nyɔkɛ poorɛ, dɔgɛ bodibila, saŋsɛka poan te Elisa pa'alɛ en la.
18 Bia wa ta zo'e, daarɛ deyema doohe ka sɔ yehe a va'amen te nɛreba kɛɛre dia zen'an. 19 Bɔna bɔna ta yɛta ka sɔ la te, N zuo! N zuo! Te ka sɔ la yele yameŋa yeti, Nyɔkɛ bia wa ta bo ka ma ha. 20 Yameŋa la nyɔkɛ bia wa tare na bo ka ma la. Bia wa zin' la ka ma la na'ma zuo tara tara la wontɛɛŋa, te ka ki. 21 Ka ma la tare ka zom ta kɛn' Yenɛ nɛra wa bɔ'en la, ta gan'arɛ ka boraa wa gɔrɔgɔ la zuo, ge yehe na, ge yo' bia la bahɛ ha. 22 A nya soolom a sera la ha yeti, Bo mam yameŋa la boŋa na, te n keŋɛ kalam ta nyɛ Yenɛ nɛra wa kalam ge lebe na. 23 Te a sera la soke yeti, Ho ye' a zen'an zina bo? Zina dagɛ ŋmarepaalega, bii Vo'ohogo Dabaherɛ. Te pɔka wa yeti, La ka tare daaŋɔ. 24 A lo' boŋa la, ge yele yameŋa la yeti, Bahɛ te boŋa wa kanbela mɛ. Da gu'uha mam, han dagana n mɛŋa en ta yele ho te ho ze'ele.
25 Te pɔka wa yehe wa'ana paɛ Yenɛ nɛra wa zen'an, Karmel zoore la zuo. Yenɛ nɛra wa n ta nyɛ te pɔka wa kene na la, te a yi' a yameŋa Gehazi la yeti, Behɛ! Sunem teŋa pɔka la en bala kena na la! 26 Zɔ kalam to'ohɛ ka soke behɛ ka kene la ka mɛŋa? Ka sera la ka bia la de ba mɛŋa? Te pɔka la yeti, Ba kɔ'ɛ yam. 27 Pɔka wa n wa'ana paɛ Yenɛ nɛra wa zen'an zoore la zuo la, ka lu la a na'ma zuo. Te Gehazi me paɛ na te a zan'ɛn pɔka wa bahɛ, te Yenɛ nɛra wa yele en yeti, Bahɛ ka! Ka boe la daaŋɔ poan. Na'ayenɛ me dekɛ de sogɛ mam mɛ ge ka yele mam de yele. 28 Pɔka wa yele en yeti, N daana, mam daa sohɛ ho bodibila yele? Mam daa pon ka yele ho yeti ho da pan'ahɛ mam? 29 Elisa yele Gehazi yeti, Yɛ ho lɔgɔrɔ kena ge dekɛ n doore wa zanla. Ho han to'ohɛ se'em, da po'ohɛ en. Se'em me han po'ohɛ hɔ, da sakɛ. Ho han ta paɛ, ho dekɛ doore wa pagalɛ bia la nɛŋa zuo. 30 Ge pɔka la yeti, Mam pɔ' la Na'ayenɛ la hom mɛŋa yeti ho han ka dɔla, mam kan kule.
31 Gehazi deŋɛ nɛŋa ta paɛ dekɛ doore la pagalɛ bia la zuo, te bia ka eta nuka. Te a lebe to'ohɛ en na yeti, Bia la ka ihege. 32 Elisa n wa'ana paɛ yire la poan la, a nyɛ te bia la ki mɛ gan'an a gɔrɔgɔ la zuo. 33 A kɛn' ge yo' koleŋa la lebehe na, ge bɔna ha la kum la, soha Na'ayenɛ. 34 A ihege zom gɔrɔgɔ la zuo, uma bia la zuo, te a nɔɔrɛ tɔ bia la nɔɔrɛ, te a nini tɔ bia la nini, te a nu'uhe tɔ bia la nu'uhe. En um bia la zuo bala la, te bia la iŋa la pɔhɛ eta wam. 35 Elisa sige kae bɔ'ɔ la poan fiin, ge le lebe ta uma bia la zuo, te bia wa kɛnhom sugumnɔɔren boyopɔe, ge pekɛ ka nini. 36 Elisa yi' Gehazi yele en yeti, Yi' Sunem pɔka wa na. Te a yi' ka te ka paɛ na te Elisa yele ka yeti, To'e ho bia. 37 Pɔka wa paɛ dɔnbelɛ Elisa na'ma teŋa la na'ahegɔ, ge nyɔkɛ a bia la yehe.
38 Saŋa kayema te Elisa lebe Gilgal teŋa poan, ta paɛ te kom n sige teŋa la poan. Te nɔtɔgɔheba lagahɛ n zin'an a nɛŋan, te a yele a yameŋa yeti, Dekɛ dokɔ kantɛ la dogolɛ, la ho dogɛ zɛɛnrɔ bo nɔtɔgɔheba wa. 39 Ba ayema yehe zɛɛnrɔ la ɛɛa, ta nyɛ gɛntɛ deyema n wom, te a go'ohe gɛntɛ la wɔla la la nu'o me'en, tare na ŋma pa'ahɛ zɛɛnrɔ la poan, ge ka mina ban de sɛla. 40 Ba nya ta zaaɛ zɛɛnrɔ la tɔnrɛ boraahe wa. Ge ban dite la, te ba kaahɛ bahɛ na yeti, Yenɛ nɛra wa, yabega n boe dokɔ la poan! Ba kan ta'an di zɛɛnrɔ la. 41 Elisa yeti, Tare ya zom bo mam. Te a to'e zom la yuguhe dokɔ la poan ge yeti, Nya tɔnrɛ ya bo nɛreba la te ba di. Te ban dite la, ba ka le wom se'ere se'ere.
42 Boraa kayema n yehe Baal Salisa na, tara ka dia na te ka bo Yenɛ nɛra wa, mui dideena boroboro pihiyi' la ki pa'ahɛ. Elisa yele a yameŋa yeti, Dekɛ bo nɛreba wa te ba di. 43 Te yameŋa soke yeti, Bana fiin wa wan eŋɛ la wane tɔnrɛ seke nɛre kɔbega wa? Ge Elisa yele en yeti, Dekɛ bo nɛreba wa te ba di. Na'ayenɛ yeti, ba wan di ka tegɛ ge gee. 44 Te a wa dekɛ dia la ze'ele boraahe wa, te se di ta tegɛ ge gee, wo Na'ayenɛ n yele se'em la.