22
1 Yuuma atan' te Aram la Israel ka tara zaberɛ la taaba. 2 Ge yuuma atan' aŋa mea poan te Yuda naba Yehosapat keŋɛ te a ta behɛ Israel naba. 3 Israel naba wa pon deŋɛ yele a yamehe mɛ yeti, Ya ka mi' te Aramot Gilead dela tomam denɛ ge te to ka eta se'ere te to lebehe to'e ka Aram naba wa nu'uhen? 4 Bala te a soke naba Yehosapat wa yeti, Ho wan doohe mam keŋɛ te n zabɛ la Aramot Gilead teŋa wa? Te naba Yehosapat lerege Israel naba wa yeti, Mam dela hom, mam nɛreba dela ho nɛreba, te mam yiri dɛna ho yiri. 5 Ge Yehosapat yele Israel naba wa yeti, Yia dela ɛ Na'ayenɛ kan'aŋɔ.6 Bala te Israel naba wa lagahɛ nɔtɔgɔheba la na, te ba paɛ wo boraa kɔbehe senaahe, te a soke ba yeti, N keŋɛ ta zaba la Aramot Gilead teŋa wa bii n bahɛ? Te ba woo lerege en yeti, Keŋɛ ge Daana la wan dekɛ ka eŋɛ hom naba nu'uhen. 7 Yehosapat soke yeti, Na'ayenɛ nɔtɔgɔha ayema ka boe ka'lam te to soke enŋa me? 8 Israel naba wa yeti, Boraa kayema gee ya te to wan ta'an soke Na'ayenɛ behɛ, ge mam yaɛ ka mɛ. Se'ere n sɔe la ka ka malom pota yelesonɛ bɔ'ɔra mam, saŋa woo be'em ma'an. A dela Imla dayɔa Mikaiah Te naba Yehosapat lerege yeti, Naba, da yele bala. 9 Te Israel naba wa yi' a yameŋa kayema yele en yeti, Ta tare Imla dayɔa Mikaiah wa'an nananawa na.
10 Israel naba wa la Yuda naba Yehosapat bagɛ ba na'am lɔgɔrɔ zin'an na'am kogohe zuto Samaria teŋa nayaŋan dia tɔa zen'an la. Te nɔtɔgɔheba la woo zɛ'a ba nɛŋan pota. 11 Te Kenaanah dayɔa Zedekia maalɛ a kuto iila ge yeti, Na'ayenɛ n yele se'em n wana. Bana te ho wan dekɛ vorɛ Aramdoma wa ta sagom ba ba'ahɛ. 12 Nɔtɔgɔheba la woo pota yele yenɛ yeti, Ta zabɛ Aramot Gileaddoma wa ge ho wan nyaŋɛ ba. Se'ere n sɔe la, Na'ayenɛ wan dekɛ teŋa la eŋɛ ho nu'uhen. 13 Se'em te ba tom te a ta yi' Mikaiah na la nya yɛta en yeti, Behɛ, hom dela ho ma'an. Bana tɔgɔre la yetɔgɔnyɛlegɔ bɔ'ɔra naba. N belone ho mɛ, me ta tɔgɛ wo bama n tɔgɔre se'em la. Ta tɔgɛ yetɔgɔnyɛlegɔ. 14 Ge Mikaiah yeti, Mam pɔ' la Na'ayenɛ wa yeti mam wan yele en la Na'ayenɛ n yele mam se'em.
15 En paɛ naba la zen'an na la, te naba la soke en yeti, Mikaiah, to keŋɛ ta zabɛ la Aramot Gilead teŋa wa bii to bahɛ? Te a lerege en yeti, Ta zabɛ la ho nyaŋɛ ge Na'ayenɛ wan dekɛ ba eŋɛ hom naba wa nu'uhen. 16 Naba soke en yeti, Sugumnɔɔren bolɛ te ho bɔta te n bahɛ te ho pɔ' te ho kan parom, ge ho wan yele mam la yelemɛŋɛrɛ Na'ayenɛ yu'urɛ la poan? 17 Mikaiah nya lerege yeti, Mam nyɛ la Israeldoma la n yeregɛ zoore zuo wo piihe n ka tare duŋkeena la. Te Na'ayenɛ yeti, nɛrebana wa ka tare daana. Bahɛ ya ba te ba kule ba yiya la sunma'ahom. 18 Israel naba la yele Yehosapat yeti, N ka yele ho yeti a ka malom pota yelesonɛ bɔ'ɔra mam, ge be'em ma'an?
19 Mikaiah kelom tɔgɔra yeti, Bala, wom Na'ayenɛ yelehom wa. Mam nyɛ te Na'ayenɛ zin' la a na'am gɔŋɔ zuo, te saazuo doma woo kae en, bɔna a zuɔ la a gɔbega. 20 Te Na'ayenɛ yeti, ane n wan pan'ahɛ Ahab te a keŋɛ ta zabɛ la Aramot Gilead, la a ki bini? Te ena yeti wana, te ena yeti wana. 21 Pooren te sea yehena ze'ele Na'ayenɛ nɛŋan yeti, mam wan pan'ahɛ en. 22 Na'ayenɛ soke en yeti, sɔrɔɔ kone poan? Te a yeti, mam wan yehe ta dɛna ponpɔrɔŋɔ sea bɔna a nɔtɔgɔheba la woo nɔyan. Te Na'ayenɛ yeti, bo wan seren nyaŋɛ pan'ahɛ en ge keŋɛ ta eŋɛ bala.
23 Bala, Na'ayenɛ dekɛ la ponpɔrɔŋɔ sea eŋɛ nɔtɔgɔhadoma bana wa woo nɔyan. Na'ayenɛ yeti nɔyalegerɛ n wan sige ho zuo. 24 Kenaanah dayɔa Zedekia nya paɛ lobe Mikaiah sapɛnka, ge soke en yeti, Na'ayenɛ sea la n yehe mam zen'an doohe la bɛ? 25 Mikaiah yele en yeti, Daanse'ere daarɛ te ho wan zɔ ta sogɛ saraa poan la te ho wan baŋɛ.
26 Israel naba nya bo nɔɔrɛ yeti, Tare ya Mikaiah wa ta bo Amon n behere teŋa la naba dayɔa Yoas, 27 ge yele ba te naba n yele se'em n wana. Pagɛ ya nɛre n wa. Da bo'ore ya en sɛla gana boroboro la ko'om ma'an gura te n ta ze'ele pɛɛntɛɛnre la poan lebe yɔle yɔle na. 28 Mikaiah yeti, Ho han lebe yɔle yɔle na, Na'ayenɛ ye ka tɔgɛ bo mam. Nɛreba wa, boɔn ya n yelehom wa biŋe.
29 Bala te Israel naba la Yuda naba Yehosapat keŋɛ Aramot Gilead teŋa zaberɛ. 30 Israel naba wa yele Yehosapat yeti, Mam wan mina gee yɛɛhɛ n lɔgɔrɔ wa ge kɛn' zaberɛ la poan, ge hom bagɛ ho na'am lɔgɔrɔ kɛn' bini. Bala te Israel naba la yɛɛhɛ a na'am lɔgɔrɔ la ge kɛn' zaberɛ la poan. 31 Aram teŋa naba wa daa bo a nɛreba pihitan' la bayi' la n de a zaba yiri toroto nɛŋadoma la nɔɔrɛ yeti, Da zabɛ ya la nɛra se'em, a de' kpɛ'ɛma bii taroma, han dagana Israel naba wa ma'an. 32 La bɔna bɔna te zaba yiri toroto nɛŋadoma wa ta nyɛ naba Yehosapat la, ba yeti, Israel naba n wana. Ba nya ŋmɛregɛ zabera la en, ge Yehosapat n kaahɛ bahɛ na la, 33 yiri toroto nɛŋadoma wa baŋɛ te a dagɛ Israel naba la, te ba bahɛ a dika.
34 Ge nɛra ayema daregɛ a tanhɔ tɛn' yoo, te la wa'ana doohe Israel naba wa n pin' a mɛŋa la a zaba lɔgɔrɔ la fole peka poan nyɔkɛ en. Te naba wa yele a zaba toroto nɛŋadoma la yeti, Ba tɛn' mam mɛ. Tare mam zɔ yehe zaberɛ wa poan. 35 De daarɛ la zaberɛ la zabɛ la bala, te Israel naba la uma a zaba toroko la poan tɔ Aramdoma la. Te a pogoleŋɔ la ziim ka'ɛ gan'an zaba toroko la poan, te a ki zanɔɔrɛ denɛ mea. 36 Yene ta luta la, te kaahega sige pɛɛntɛɛnre la woo teŋasoka yeti, Nɛra woo lebe a teŋa, ta kule a teŋa a teŋa. 37 Te naba la ki te ba tare en wa'an Samaria na, te ba pin' en bilam. 38 Ba pee zaba toroko la Samaria bɔka kayema poan, zen'an te pɔgɔ yalomdoma sɔɔra ba iŋhe la, te baahe leele a ziim wo Na'ayenɛ yelehom la n yele se'em la.
39 Ahab saŋa toonse'a n gee la enŋa eŋɛ yelese'a woo la a na'am yire la te a mɛ dekɛ wɔbegɔ nyɛna golɛ de poan zan'an la teŋse'ehe te a mɛ dangoone kae se la golehɛ eŋɛ la Israel nadoma yɛla gɔŋɔ la poan. 40 Ahab kule paɛ a sɔdoma, te a dayɔa Ahazia sɔe a na'arɛ dɛna naba.
41 Asa dayɔa Yehosapat di Yuda na'am la Israel naba Ahab na'am dia yuuma anaahe poan. 42 Yehosapat dela yuuma pihitan' la anuu ge di na'am. A zin'ire na'am gɔŋɔ zuo la yuuma pihiyi' la anuu Yerusalem teŋa poan. A ma yu'urɛ dela Azuba dɛna Silhi pɔyɔa. 43 A sɛla woo poan, a doohe la a sɔ Asa sɔya la. A ka bɔregɛ a poan. A ete la sɛla n ane soŋa Na'ayenɛ nɛŋan. Ge a ka wɔnrɛ kuŋkuma zuto kaanbegɔ zen'enhe la bahɛ, te nɛreba kelom kena ba poan kaanbera ge nyɔ'anra ko'ɛnka se poan. 44 Yehosapat me bɔna la sunma'ahom la Israel naba.
45 Yehosapat saŋa tooma a se'a la, enŋa n eŋɛ sɛla la a pɛɛntɛɛnreba la n zabɛ se'em woo la, golehɛ eŋɛ la Yuda teŋa nadoma yɛla gɔŋɔ la poan. 46 Enŋa n piihe boraahe la n daa tone yalomtooma a sɔ Asa saŋa poan ha la zan'an teŋa la poan bahɛ. 47 Naba ka le bɔna Edom teŋa, han dagana kpana. 48 Yehosapat mɛ Tarsis teŋa ɔɔnrɔnɔ la te to kena Opir teŋa tara sanlema kena na, ge to ka nyaŋɛ keŋɛ zen'an, to wɔnrɛ la Ezion Geber teŋa la zuo. 49 Bala ma'an la, Ahab dayɔa Ahazia yele Yehosapat yeti, Bahɛ te mam nɛreba wa tom la ho nɛreba wa ko'om la poan, te Yehosapat zagahɛ.
50 Yehosapat nya kule paɛ a sɔdoma, te ba pin' en a sɔdoma yɔɔrɔ poan, a sɔ David Teŋa la poan. Te a dayɔa Yehoram sɔe a na'arɛ dɛna naba.
51 Ahab dayɔa Ahazia di Israel na'am bɔna Samaria teŋa poan la, te Yuda naba Yehosapat pon zin'an a na'am gɔŋɔ zuo la yuuma pia la ayopɔe. Ahazia behɛ Israel teŋa la yuuma ayi'. 52 A tom be'em Na'ayenɛ nɛŋan. Se'ere n sɔe la, a dole a sɔ la a ma la Nebat dayɔa Yeroboam se'em n bahɛ te Israel tue la sɔya la. 53 A tone ge na'aha la Baal bagarɛ, nyiihe Na'ayenɛ Israel Yenɛ la sunsunya wo a sɔ eŋɛ se'em la.