15
1 Nebat dayɔa Yeroboam di Israel na'am la yuuma pia la anii poan te Abiya di Yuda na'am, 2 kɛn'ɛra Yerusalem, behɛ teŋa la yuuma atan'. A ma yu'urɛ dela Maaka, dɛna Abisalom pɔyɔa. 3 Abiya tom a sɔ be'em la woo te a tom te a nyɛ la. A ka dekɛ suunre zan'an bo Na'ayenɛ a Yenɛ la wo a sɔ naba David en yuun ane se'em la. 4 Ge David zuo, Na'ayenɛ a Yenɛ la bahɛ te David yire dɛna naba Yerusalem poan doohe la n bahɛ te Abiya wa dayɔa sɔe dɛna naba la ge me sɛ Yerusalem ze'ele. 5 Se'ere n sɔe la, David yuun tone la sɛla n de ma'an Na'ayenɛ nɛŋan, ka tue Na'ayenɛ n bo en nɔɔrɛ la woo a vom dabeha la zan'an poan, han dagana Hiti boraa Uria yele la ma'an. 6 Zaberɛ kɔ'ɔn bɔna Arehoboam nɛreba la Yeroboam nɛreba teŋasoka la bala Abiya saŋa la woo poan. 7 Abiya n wa beha teŋa la tooma a se'a yɛla la n eŋɛ yelese'a woo la n golehɛ eŋɛ la Yuda nadoma yɛla gɔŋɔ la poan. Zaberɛ la kɔ'ɔn bɔna Abiya la Yeroboam teŋasoka la bala. 8 Te Abiya ta kule paɛ a sɔdoma, te ba pin' en David Teŋa la, te a dayɔa Asa sɔe dɛna naba.9 Israel naba Yeroboam na'am gɔŋɔ zuo yuum pihiyi' poan te Asa di Yuda na'am, 10 kɛn'ɛra Yerusalem yuuma pihinaahe la deyena. A mayaaba yu'urɛ dela Maaka dɛna Abisalom pɔyɔa. 11 Te Asa eta sɛla n de ma'an Na'ayenɛ nɛŋan, wo a sɔ David n yuun ete se'em la. 12 A sa'ahɛ baga kaanbegɔ zen'enhe boraahe la n tone yalomtooma la teŋa la poan bahɛ, ge wɔnrɛ baga se'a te a sɔ maalɛ la bahɛ. 13 Ge a foe a mayaaba Maaka, a pɔgɔnaba kpe'eŋo la poan bahɛ, n sɛ Aserah bagarɛ dɔɔ la zuo. Asa ŋmaɛ dɔɔ la mɛ bahɛ, nyɔ' kɔ Kidron bɔn'ɔn la poan. 14 Asa ka nyaŋɛ sagom baga kaanbegɔ zen'enhe la n boe kuŋkuma zuto la zan'an bahɛ, ge Asa dekɛ a suunre zan'an bo la Na'ayenɛ a vom saŋa la woo poan. 15 Te a tare sanlenpeelega la sanlema la lɔgɔseto woo te enŋa la a sɔ dekɛ bo Na'ayenɛ la wa'an Na'ayenɛ Yire la poan na.
16 Zaberɛ bɔna Asa la Israel naba Baasa la teŋasoka, ba na'am dia saŋa la woo poan. 17 Israel naba Baasa keŋɛ zaberɛ la Yuda teŋa, ge mɛ dangoone kae Aramah teŋa, te se'em da yehe bii keŋɛ Yuda naba Asa sɔ'ɔlom poan. 18 Asa nya vaɛ sanlenpeelega la sanlema se'a n gee Na'ayenɛ Yire la poan la naba yire poan la. A bo a yamehe, tom ba Hezion dayɔa Tabrimon me dayɔa Ben Hadad n de Aram teŋa naba kɛn'ɛra Damaskus teŋa la zen'an. 19 A yeti, Bahɛ te to biŋe nɔɔrɛ la taaba, wo lan yuum boe mam sɔ la hom sɔ teŋasoka se'em la. Behɛ, n bo'ore ho la sanlenpeelega la sanlema. Nananawa, bahɛ nɔbiŋere se'ere te ho biŋe la Baasa, te a bahɛ n daaŋɔ. 20 Ben Hadad sakɛ bo naba Asa, ge tom a zaba nɛŋadoma te ba keŋɛ ta zabɛ la Israel teŋhe. Ba zabɛ nyaŋɛ Iyon la Dan la Abel Bet Maaka la Kineret zan'an, ta' la Naptali teŋhe la zan'an. 21 Baasa n ta wom bala la, a bahɛ Aramah teŋa mea la mɛ, ge lebe Tirza teŋa. 22 Naba Asa nya mɔɔlɛ Yuda teŋa poan woo, te nɛra ka gee, te nɛreba la yehe keŋɛ ta vaɛ kuga se'a la dɔɔrɔ seto te Baasa tare na mɛta Aramah teŋa la tare na. Bama te naba Asa dekɛ mɛ Geba teŋa n boe Benyamin la Mizpa teŋa la.
23 Naba Asa saŋa tooma la woo, n nyaŋɛ eŋɛ sɛla, n tom toonse'a woo, la teŋse'ehe te a mɛ la woo golehɛ eŋɛ la Yuda nadoma yɛla gɔŋɔ la poan. Ge en ta korogɛ la, a na'ma n eŋɛ. 24 Asa nya kule paɛ a sɔdoma, te ba pin' en a sɔdoma yɔɔ David Teŋa poan, te a dayɔa Yehosapat sɔe dɛna naba.
25 Yeroboam dayɔa Nadab di Israel na'am la Yuda naba Asa na'am dia yuuma ayi' poan. A behɛ Israel teŋa la yuuma ayi'. 26 A tom la be'em Na'ayenɛ nɛŋan, kɔ'ɔn dɔla a sɔ etegɔ la a be'em la en yuun bahɛ te Israel zan'an tue la. 27 Te Isakar yizuo boraa Ahiya dayɔa Baasa ka sakɛ bo Nadab, ta ko' en Gibeton teŋa n de Pilistidoma teŋa la poan. Se'em ma'an te Nadab la Israel zan'an sogɛ gan'an gura Gibeton teŋa la. 28 Baasa ko Nadab la Yuda teŋa naba Asa na'am dia yuuma atan' poan, ge sɔe. 29 En sɔe na'am la ba'ahɛ la, a ko Yeroboam yiredoma la zan'an, ka gee la nɛra yene mɛ. A sagom ba zan'an mɛ wo Na'ayenɛ n tɔgɛ se'em doohe a yameŋa Silon boraa Ahiya poan se'em la, 30 Yeroboam be'em la te a tom bahɛ te Israel zan'an tue la zuo, la en nyiihe Na'ayenɛ Israel Yenɛ la suunre la zuo.
31 Nadab saŋa la a tooma a se'a la en eŋɛ sɛla woo, la golehɛ eŋɛ la Israel nadoma yɛla gɔŋɔ la poan. 32 Zaba boe Asa la Israel naba Baasa teŋasoka la bala ba na'am dia saŋa la woo poan.
Na'ayenɛ yelehom wa'an Hanani dayɔa Yehu