4
1 Te Naba Solomon sɔna Israel zan'an beha. 2 Sɛba n de a kpɛ'ɛn kanreba dela Zadok dayɔa Azaria n de malemadaana, 3 te Sisa dayɔɔhe Elihorep la Ahiya dɛna gɔŋgoloheba, te Ahilud dayɔa Yehosapat me goleha yɛla biŋera. 4 Te Yehoiada dayɔa Benaiah dɛna zaba nɛŋadaana, te Zadok la Abiatar dɛna malemadoma, 5 te Natan dayɔa Azaria dɛna kpɛ'ɛn sɛba n behere teŋhe teŋhe la kpɛ'ɛma, te Natan dayɔa kayema Zabud dɛna malemadaana ge me dɛna naba la kan'ana. 6 Te Ahisar behera naba yire, te Abda dayɔa Adoniram me sɔna tontoneba beha.7 Solomon me tara kpɛ'ɛndoma pia la bayi' te ba sɔna Israel teŋhe teŋhe la beha. Bama n to'ohere lɔgɔrɔ teŋhe la woo poan bo'ore naba la a yire la zan'an. Ba ayena woo ne bo mɛ ta paɛ ŋmarega yuunɛ woo poan. 8 Ba yu'ura dela: Ben Hur n sɔe Epraim teŋa la n yage zoore zuo la beha, la 9 Ben Deker n sɔe Makaz la Saalbim la Bet Semes la Elon Bet Hanan teŋhe, la 10 Ben Hesed n sɔe Arubot la Soko la Heper teŋhe beha, la 11 Ben Abinadab n di Solomon pɔyɔa Tapat n sɔe Napot Dor, la 12 Ahilud dayɔa Baana n sɔe Taanak la Megido la Bet San zan'an n lɛm Zaretan teŋa Yezreel teŋa fehegan la ze'ele Bet San ta'ara Abel Mehola paara Yokmeam teŋhe, la 13 Ben Geber tare Manase dayɔa Yair teŋhe la Argob sɔ'ɔlom n boe Basan la teŋhe pihiyoobe te dangɔɔma la nyɔgom nayahe kae se Aramot Gilead poan sɔna, la 14 Ido dayɔa Ahinadab sɔna Mahanaim teŋa, la 15 Ahimaaz n di Solomon pɔyɔa Basemat sɔna Naptali teŋa, la 16 Husai dayɔa Baana sɔna Aser la Alot teŋhe, la 17 Parua dayɔa Yehosapat sɔna Isakar teŋa, la 18 Ela dayɔa Simei sɔna Benyamin teŋa, la 19 Uri dayɔa Geber sɔna Gilead teŋsɛka n de Amori naba Sihon la Basan naba Og teŋhe la. Enŋa ma'an n sɔe teŋkaŋa zan'an beha.
20 Yuda la Israel nɛreba zo'e wo kolaa tentɔnɔ la. Ba dita ge nyuura ge tara popeelom. 21 Solomon sɔna teŋhe la woo, ze'ele Kolaaa la nɔɔrɛn ta paɛ Pilistia teŋhe la zan'an, ta du'ura Mizraim teŋa beene. Ba woo kene yɔɔra ba koberɛ bɔ'ɔra Naba Solomon, ge bɔna a nu'uhen a vom yuuma la woo poan. 22 Solomon n to'ore disɛka daarɛ woo dela kisoma zom somɔ dogorɔ kanra pihitan' la kikanha zom dogorɔ kanra pihiyoobe la 23 lɔlehe n pire pia la nii se'e n obere yaama ma'an pihiyi' la piihe kɔbega la boohe la ɛɛnrɔ la walehe la gbamboohe la nɔɔhe n ane soŋa. 24 Se'ere n sɔe la, sɛla woo n boe Kolaa la yakenɛ nɛŋa bɔba ha la woo ze'ele Tipsa yɛ'a Gaza boe la naba wa nu'uhen, te sunma'ahom bɔna bɔbɔrɛ woo. 25 Solomon saŋa la, Yuda la Israel, ze'ele Dan ta paara Beerseba, boe la fai. Nɛra woo dɛla a tia teŋa. 26 Solomon tara yiri gɔtɔ tuha anaahe te i vɛ'ɛra a zaba toroto, ge tara yiri tuha pia la ayi' i tɔka. 27 Kpɛ'ɛndoma wa ayena woo bɔ'ɔra Naba Solomon la nɛresɛba woo n dite la en la dia. Ba woo bo'ore mɛ ba saŋa saŋa, te sɛla ka pɔ'ɔra. 28 Ba me tara mui la mɔɔ kena biŋera zen'soŋa poan, tara bɔ'ɔra yiri se'e en ve'ere zaba toroto la yiri ise'e la me.
29 Yenɛ bo Solomon yam la baŋerɛ la yɛla bɔkerɛ yam te la zo'e wo kolaa tentɔnbin'ihegɔ la. 30 Solomon yam wa zo'e gana nɛra se'em woo n boe dapɔya bɔba ha la Mizraim teŋa poan nɛreba zan'an. 31 A yam la gane nɛra woo mɛ, ta ta' la Ezrah teŋa boraa Etan la Heman la Kalkol la Darda n de Mahol dayɔɔhe la mɛ. A yu'urɛ yehe paɛ teŋse'ehe woo n kae en la. 32 A tɔgɛ la yetɔgɔbiŋire tuha atan', ge baam baanhe tuhure la senuu. 33 A pa'alɛ bonbula vom n ane se'em mɛ, pɔhera Lebanon teŋa mɔlɔsonɔ tiihe la ta paɛ nyunhunyuŋa n bo dangoone zuo. A me pa'alɛ dunhe la niihe, bonvuula la zim yele. 34 Teŋparɛ wa zuo nadoma woo n wom Solomon yam wa yele tom ba nɛreba te ba wa'ana kelehe Solomon yam wa.