Kpemehe ho mɛŋa, ba' lea boraanɛ
2
1 Naba David dabeha n ta pɔnra la, te a kan'an a dayɔa Solomon yeti, 2 Mam pɔnre la kuluga wa. Kpemehe ho mɛŋa, ba' lea boraanɛ. 3 Dɔla Na'ayenɛ ho Yenɛ la n bote se'em la. Dɔla a sore la nana a malema la a nɔɔrɛ la nɔze'elego la kan'aŋɔ wo n golehɛ Moses pa'alegɔ la poan. Bala te ho wan tara nyaŋerɛ sɛla woo te ho eta la zen'an woo te ho ŋmɛregera. 4 Bala te Na'ayenɛ wan tom en biŋe nɔɔrɛ la mam yeti, Ho dayɔɔhe han ta ma'ɛn ba mɛhe birikindoma, kena la mam la yelemɛŋɛrɛ, la ba sunya la ba potɛn'ɛrɛ zan'an, n kan malom koŋe nɛra n wan zin'ire Israel na'am gɔŋɔ wa zuo la.5 Nananawa, ho mɛŋa mi' Zeruiah bia Yoab n eŋɛ mam se'em, doohe la enŋa n eŋɛ Israel teŋa wa zaba nɛŋadoma bayi' la n de Ner dayɔa Abner la Yeter dayɔa Amasa se'em la. A ko ba mɛ. A mɛ wa le kelom ka'ahɛ la ziim sunma'ahom saŋa, te ba ziim la lerom a sɛganɛ la a tagara se'a te a pire la. 6 Bala, dekɛ ho yam tom ge da bahɛ te a tare zompeelego sige a yɔɔen la sunma'ahom.
7 Zo'oha Gilead boraa Barzilai buuri wa. Bahɛ te ba lagom pa'ahɛ sɛba n dite la ho la poan. Se'ere n sɔe la, mam yuun zote le'eha ho keema Absalom la, bama n yuun sɛ ze'ele la mam.
8 Behɛ, Benyamin boraa Gera n yehe Bahurim dayɔa Simei lagom bɔna mɛ la hɔ. Simei wa yuum zɛrɛgerɛ mam mɛ la ninmɔ'ɔrɛ, daanse'ere te mam zɔ ta paɛ Mahanaim teŋa la. Ge a wa n daa ta lagom yehe na to'ohɛ mam Yordan Kolaa la, mam yuum pɔ' la Na'ayenɛ yu'urɛ wa te mam kan ko ka. 9 Ge nananawa la, da bahɛ en fai. Ho dela yamdaana, ho wan mina hom wan eŋɛ en se'em. Bahɛ te a tare a zupeelego sige a yɔɔen la ziim.
10 Te David ki, te ba pin' en David Teŋa la poan. 11 A daa behɛ Israel teŋa la yuuma pihinaahe. Yuuma ayopɔe te a zin'ire Hebron teŋa, zin'ire yuuma pihitan' la atan' me Yerusalem teŋa poan. 12 Te Solomon sɔe zin'ire a sɔ David na'am gɔŋɔ la zuo, te a sɔ'ɔlom la sɛ ze'ele kaŋkaŋe.
13 Te Hagit dayɔa Adoniya wa'an Solomon ma Batseba zen'an na, te pɔka wa soke en yeti, Ho kene la ho mɛŋa? Te a yeti, Ɛɛn, kɔ'ɛ yam. 14 Ge a nya yele pɔka wa yeti, N tare la se'ere te n yele ho. Te a yeti, Yele mam. 15 Te a yeti, Ho mɛŋa mi' te sɔ'ɔlom wa dene la mam denɛ. Israel zan'an behere ne te mam wan dene ba naba, ge te la ŋmɛregɛ keŋɛ mam yebega wa zen'an. Se'ere n sɔe la, la ze'ele la Na'ayenɛ zen'an na. 16 Nananawa, mam bote n sohɛ ho la sɛla, da zagahɛ mam. Te Batseba yeti, Yele. 17 Te a yeti, Sohɛ Naba Solomon bo mam, ge mam mi' te a kan zagahɛ hom, te a dekɛ Abisag n de Sunem teŋa pɔka la bo mam te n di. 18 Te Batseba yeti, La ane soŋa. N wan ze'ele ho na'arɛ sɔnhɛ bo naba.
19 Batseba n ta yɛ'a Naba Solomon zen'an te a tɔgɛ Adoniya yele la bo en la, naba ihege mɛ, sure a mɛŋa teŋa na'ahɛ en, ge lebe zin'ire a na'am gɔŋɔ zuo. A bahɛ te ba tare koka na bo a ma la, te a me zin'ire naba la zuɔ nu'o bɔba. 20 Te Batseba nya yeti, N tare la yele fiin te n sohɛ hɔ, da zagahɛ. Te naba la yeti, N ma, yele, n kan zagahɛ. 21 Te a yeti, Bahɛ te Abisag n de Sunem teŋa pɔka la ele ho keema Adoniya. 22 Te Naba Solomon soke a ma wa yeti, La eŋɛ la wane, te hom wa'ana soha te Abisag n de Sunem teŋa pɔka wa ele Adoniya? Ye kɔ'ɔn sohɛ to'e sɔ'ɔlom wa bo en, ge enŋa n pon dɛna keema. Da sohɛ bo enŋa ma'an, sohɛ bo malemadaana Abiatar la Zeruiah bia Yoab me.
23 Naba Solomon nya pɔ' Na'ayenɛ yu'urɛ yeti, Yenɛ tulugɛ mam. A bahɛ te la bi'e mam, Adoniya han ka dekɛ a vom yɔ enŋa n sohɛ se'ere wa zuo. 24 Bala zuo, Na'ayenɛ wa n sɛ mam ze'ele mam sɔ David na'am gɔŋɔ wa zuo wa, ge bahɛ te a nɔbiŋere la nyɛ ze'elego zen'an mam poan wa la, Adoniya kiiri la zina wa! 25 Te Naba Solomon tom Yehoiada dayɔa Benaiah, te a keŋɛ ta kɛ' Adoniya, te a lu ki.
26 Naba Solomon nya yele Abiatar n de malemadaana la yeti, Lebe kule ho yire Anot teŋa poan. La dene la ho ki, ge n kan ko hɔ nananawa, la hom n tabelɛ ziira Daana Na'ayenɛ wa nɔbiŋere daka la bɔna mam sɔ David nɛŋan, ge lagom di mam sɔ namehegɔ tooro la zuo. 27 Naba Solomon n foe Abiatar malemadaana tooma la poan se'em bahɛ en bala, te la doohe la Na'ayenɛ n pon tɔgɛ Eli buuri la yele se'em Silo teŋan la.a
28 Yele wa n ta lu Yoab se'em n naɛ la Adoniya, ge ka naɛ la Absalom, la toban la, a zɔ mɛ keŋɛ Na'ayenɛ Sogorɛ la poan ta gin' kaanbegɔ daka la iila la tara. 29 Ba yele Naba Solomon yeti, Yoab zɔ ta bɔna la Na'ayenɛ Sogorɛ la poan, zɛ'a lɛm la daka la. Te Solomon tom Yehoiada dayɔa Benaiah yeti, Keŋɛ ta kɛ' en! 30 Benaiah kɛn' Na'ayenɛ Sogorɛ la poan yele Yoab yeti, Naba yeti ho yehe na! Te a lerege yeti, Aai, mam wan ki la ka'lam. Te Benaiah lebe tom yele naba yeti, Yoab n yele mam se'em n wana. 31 Naba Solomon nya yele Benaiah yeti, Ta eŋɛ en wo a mɛŋa n yele se'em la, ko ya en la ya pin' en. Te la duuhe ziim sebo te enŋa Yoab ka'ahɛ bɔ te bo ka tara taalɛ la be'em mam la n sɔ yire wa zuo bahɛ. 32 Na'ayenɛ wan namehe en la zimsebo te a ka'an bahɛ la. Se'ere n sɔe la, a le'ehɛ mam sɔ David keŋɛ ta ko' boraahe seyi' la so'a, Ner dayɔa Abner n de Israeldoma pɛɛntɛɛnreba nɛŋadaana la Yeter dayɔa Amasa n de Yudadoma pɛɛntɛɛnreba nɛŋadaana. Ba dɛna nɛresomdoma ge dɛna tontɔɔdoma gana en. 33 Nɛreba wa taala dɔla Yoab la a yaahe zan'an zuo wuuha. Ge han dɛna naba David la a yaahe la a yire, la a na'am gɔŋɔ wa, Na'ayenɛ sunma'ahom wan bɔna ba zuo bala wuuha. 34 Benaiah lebe ta ko Yoab, te ba pin' en mɔen ha a mɛŋa samanɛ zuo. 35 Naba nya dekɛ Benaiah tee ze'ele Yoab na'arɛ, te a dɛna Israel zaba nɛŋadaana, ge dekɛ Zadok tee ze'ele Abiatar na'arɛ, te enŋa dɛna malemadaana.
36 Naba nya wa yi' Simei na yele en yeti, Mɛ ho yire Yerusalem teŋa wa poan kɛn'ɛra, ge da makɛ yehe teŋa wa poan keŋɛ zen'an. 37 Daanse'ere daarɛ te ho yehe teŋa wa poan yakɛ Kidron bɔn'ɔn wa la, ho mina te ho kum daarɛ n bala. Ho taala me wan dɔla la ho mɛŋa. 38 Simei yele naba yeti, Hom n daana naba n yele se'em la ane soŋa, mam ho yameŋa wa sakɛ ya. Ge a nya kɛn'ɛra Yerusalem teŋa te la yuue.
39 Ge yuuma atan' poan, te Simei yamehe seyi' zɔ keŋɛ Gat teŋa boraa Makaa dayɔa naba Akis zen'an. Te ba yele Semei yeti, Behɛ, ho yamehe la boe la Gat teŋa. 40 Simei ihege bagɛ a boŋa keŋɛ Gat teŋa naba Akis zen'an ta ɛ a yamehe la, tare se ze'ele Gat teŋa poan la lebe na. 41 Solomon n ta wom te Simei yehe Yerusalem poan mɛ keŋɛ Gat teŋa ge lebe na la, 42 te naba tom yi' en na soke en yeti, N daa ka bahɛ te ho pɔ' la Na'ayenɛ nɛŋan, ge te n yele ho la ninmɔ'ɔrɛ yeti ho daan han yehe ka'lam keŋɛ zen'an, ho kum daarɛ en bala? Te ho lerege mam de daarɛ la yeti hom yele mam se'em wa ane soŋa. 43 Wane te ho ka doohe ho nɔpɔtɛ la te ho pɔ' bo Na'ayenɛ la nɔse'ere te n bo ho la? 44 A le yele Simei yeti, Ho mɛŋa la mi' ho suunren be'em sebo woo te ho dekɛ eŋɛ mam sɔ naba David mɛ. Na'ayenɛ wan yɔ hɔ ho be'em la. 45 Ge han dɛna mam Naba Solomon, kan'an wan bɔna n zuo, te naba David na'am wa bɔna wuuha Na'ayenɛ nɛŋan. 46 Naba la nya bo Yehoiada dayɔa Benaiah nɔɔrɛ, te a yehe ta kɛ' Simei, te a lu ki. Te teŋa la nya sɛ ze'ele Naba Solomon nu'uhen.