Bala te naba la lebe
19
1 Te Yoab ta wom ti naba kele mɛ ge fabela a dayɔa Absalom kum la. 2 Bala, nyaŋerɛ la yare lebege la koonɔ bo pɛɛntɛɛnreba la woo. Se'ere n sɔe la, de daarɛ la, pɛɛntɛɛnreba la daa wom ya te naba suunre daam mɛ la a dayɔa kum la. 3 Daanden daarɛ la, pɛɛntɛɛnreba la le'ehɛ mɛ kɛn'ɛra teŋa la poan na, wo pɛɛntɛɛnreba ne le'ehɛ zaberɛ poan zɔ ge nya ne le'eha la valom kɛn'ɛra teŋa poan na se'em la. 4 Te naba la pin' a nɛŋa ge kaaha vɔɔla te, Woo, n dayɔa Absalom! Absalom, n dayɔa, woo, n dayɔa!5 Yoab nya keŋɛ naba la yire ta yele en yeti, Zina, ho dekɛ la yanɛ kɛn'ɛhɛ kpɛ'ɛndoma sɛba woo n zabɛ fan' hom la ho dayɔɔhe la ho pɔyɔɔhe la ho pɔgɔba la ho pɔgɔbɔ'ɔrenhe la woo vom bahɛ la. 6 Hom ton nɔŋɛ sɛba n yaɛ hɔ, ge yaɛ sɛba n nɔŋɛ ho la. Ho bahɛ te la nɛɛ pa'alɛ tɔ, te nɛŋadoma la kpɛ'ɛndoma la dagɛ sɛla bo ho. Mam behɛ te Absalom han vɔ ne zina wa, ge te tomam woo ki ne, la wan ane hɔ soŋa. 7 Bala, ihege nananawa yehe, la ho ta sohɛ la popeelom bo ho tontoneba wa. Mam pɔ' la Na'ayenɛ wa, te ho han ka eŋɛ bala, dagɛ te nɛra la ayena me n wan yee ho zen'an yu'uŋɔ kona wa poan. La han wa'an bala na, la wan daam ho gaŋɛ daaŋseko woo n tabelɛ sige ho zuo, ho bonbilome tara tara la zina wa.
8 Bala te naba la ihege saazuo, nya yehe yeŋa, ta zin'ire yeŋa n ne pon zin'an zen'an la. Te ba yele pɛɛntɛɛnreba la yeti, Behɛ ya, naba la n bala zin'an nayaŋa nɔɔrɛn ha la. Te pɛɛntɛɛnreba la woo wa'an naba la nɛŋan na. Bala ma'an la, te Israel buuri sɛba n dole Absalom poore la yeregɛ mɛ zɔ kule ba yiya.
9 Te nɔkpe'ene nya to'e Israel buuri la yizuto woo poan te, Behɛ ya, naba wa n fan' tɔ to diŋdoma nu'uhen, ge fan' tɔ Pilistidoma wa nu'uhen bahɛ. Ge te la wa'ana, te a a zɔ yehe teŋa wa poan Absalom zuo. 10 Nananawa, Absalom se'em te to sɔ en la kaam la te a dɛna to naba la ki la pɛɛm bɔn'en. Bene zuo te to ka tɔgɔra to tare naba wa lebena yele?
11 Naba David tom sɔɔleŋa bo malemadoma Zadok la Abiatar yeti, Yele ya Yuda teŋa keendoma la yeti, bene zuo te bama wan ta dɛna pooren doma te ba tare naba la lebe a yire poan na? Bala te a wom sɛla te ya yeti ya taaba a meŋa yire poan. 12 Yamam la mam n de sɔɔn, ge dɛna ziim yemɔ, bene zuo te yamam wan ta dɛna pooren doma, te ya tare naba la lebe na? 13 Ge yele ya Amasa me yeti, mam la hom dagɛ la sɔɔn, ge n han ka dekɛ tee ze'ele Yoab na'arɛ, te ho dɛna n pɛɛntɛɛnreba wa nɛŋadaana, zina yɛ'ɛha, Yenɛ bahɛ te la woŋɛ mam, malom woŋɛ.
14 Te Absalom tɔgɛ tee Yudadoma boraa la zan'an sunya eŋɛ boyena, te ba tom sɔɔleŋa bo naba la na yeti, Naba, hom la ho tontoneba la woo, lebe ya Yordan na. 15 Bala te naba la lebe paɛ Yordan Kolaa na. Te Yuda nɛreba yehe to'ohɛ Gilgal teŋa na, te ba tare naba la yakɛ wa'an Yordan na. 16 Benyamin boraa Gera n kɛn'ɛra Bahurim teŋa dayɔa Simei, maahom kalam la Yuda buuri la to'ohɛ naba David na. 17 Benyamin nɛre tuhure dɔla en. Te Ziba se'em n de Saul tontona la a dayɔɔhe pia la senuu la a tontoneba pihiyi' la lagom taaba. Ba yakera Yordan Kolaa bɔna naba la nɛŋan. 18 Ba yakera Yordan Kolaa la, te ba tare naba la a yiredoma la lebena te a dɛna ba naba. Te naba la n bɔna bini yakera Yordan, te Gera dayɔa Simei wa'ana lu a nɛŋan, 19 yele naba la yeti, N daana, tamɛ tuure se'ere te mam, ho tontona wa n tue ho, daanse'ere daarɛ te n daana wa ze'ele Yerusalem teŋa wa poan yɛhera la. Naba, da bahɛ te de bɔna ho suunren. 20 Ho yameŋa wa mi' te n tue ya. Bala zuo te mam dɛna yiadaana Yosef yizuo la poan, to'oha hom daana naba wa zina dabaherɛ wa poan na wa.
21 Zeruiah bia Abisai yeti, Simei wa dagɛ la ba ko' en, la enŋa n pɔ' nɔbe'o bahɛ se'em te Na'ayenɛ la n sɔ' la zuo la? 22 David lebehe yeti, Zeruiah kɔma wa, la pakɛ ya la wane? Te ya bɔta te ya lebege mam diŋdoma wa! La nare ba ko Israel buuri wa nɛra zina dabaherɛ wa poan? Mam ka mi' te zina dabaherɛ wa, mam n de Israel buuri wa zan'an naba? 23 Ge naba yele Simei yeti, Ho kan ki. Ge te naba la bo en a nɔpɔtɛ.
24 Saul yaaŋa Mepiboset, me to'ohɛ naba David na. Naba la n yehe teŋa la poan daarɛ, Mepiboset ka peere a na'ma bii a maalɛ a tɛɛŋa bii a pee a lɔgɔrɔ, tara tara la daanse'ere te naba la lebe na la iŋma'ahom la. 25 Mepiboset n ze'ele Yerusalem teŋa poan wa'ana te a nyɛ naba la, te naba la soke en yeti, Bene zuo te ho daa ka doohe mam yehe? 26 A lebehe yeti, N daana naba, nam daa yele mɛ yeti, lo' n boŋa wa bo mam te n ba' doohe la naba yehe, mam n de kɔɔrɔŋɔ la zuo. Ge mam yameŋa n daa pa'ahɛ mam. 27 A dekɛ ho yameŋa wa nɔɔrɛ tugule la hom, mam naba. Ge n daana naba, hom ane me woo Yenɛ soŋora la, bala enŋɛ hom mɛŋa n behɛ te sɛla nare. 28 Mam sɔ yire zan'an daa boe la hom n daana naba nu'uhen te ho daa wan ta'an ko ne ba. Ge ho sina ge loe mam pa'ahɛ sɛba n naɛ la hɔ dite ho tebole zuo la. N yetɔgom le dɛna la boni, gana n yele naba mam bote sɛla.
29 Naba la lebehe yeti, Da nameha ho mɛŋa tɔgɔra sɛla n daane hɔ. Mam pon deŋɛ maahom mɛ ti hom la Ziba n wan tɔnrɛ teŋa la bo taaba. 30 Mepiboset yele naba yeti, Hom n daana naba n deŋɛ paɛ yire na, la iŋma'ahom wa, bahɛ te enŋa ma'an kɔ'ɔn sɔna sɛla woo.
31 Gilead boraa Barzilai la me ze'ele Arogelim teŋa poan na la, me lagom doohe naba la mɛ tare en ta yakɛ Yordan Kolaa la. 32 Barzilai dela bonkɛka, yuum pihinii. A daa bɔ'ɔra naba la dia, se'em ma'an te naba la daa ta bɔna Mahanaim teŋa poan la. 33 Naba la yele Barzilai yeti, Hom doohe mam wa'an Yerusalem teŋa na, te n bo ho zen'an, lɛm la n mea. 34 Te Barzilai lebehe naba la yeti, N le yeti n vɔna la yuuma a lɛ, te la dɛna n doohe ho keŋɛ Yerusalem teŋa poan? 35 Mam ze' zina wa, mam dela yuuma pihinii. N wan le mina sɛla n nare, la sɛla n ka nare? Ho tontona wa pon ka le mina enŋa n dite sɛla, la enŋa n nyuure sɛla n zan'anhom se'em. Mam toba pon ka le wona boraahe bii pɔgɔhe n yoone. Bala, bene zuo te ho wan tare ho tontona wa keŋɛ te a ta dɛna zeero bo hom n daana naba wa? 36 Ho tontona wa wan yeen doohe ho yakɛ Yordan wa keŋɛ la fiin wa. Bene zuo te naba pon ba zɛnkɛ mam bala, bɔ'ɔra mam yɔ dena wa taaba? 37 Bahɛ te ho tontona wa lebe, la n ta ki n mɛŋa teŋa, te ba pin' mam lɛm n sɔ la n ma yɔɔ. Ge ho tontona Kimham n wana. Bahɛ te enŋa doohe la hom n daana naba, te ho eŋɛ en ho bote ho eŋɛ ho som sebo woo la bo en. 38 Te naba la yeti, N wan bahɛ te a doohe mam keŋɛ, n wan ta eŋɛ en som sebo woo te ho bɔta te n eŋɛ bo en. Ge n wan eŋɛ hom mɛŋa me n bote n eŋɛ hɔ som sebo woo me bo ho.
39 Te nɛreba la woo yakɛ Yordan Kolaa la, te naba nya yakɛ la. Te naba la kɔkɛ Barzilai ge kan' som bahɛ a zuo ge bahɛ en te a lebe kule a mɛŋa yire. 40 Te naba la n yakɛ keŋɛ Gilgal teŋa, te Kimham dɔla la en. Yuda pɛɛntɛɛnreba la zan'an la Israel pɛɛntɛɛnreba la porogerɛ daa lagom tare naba la bala tare na.
41 Bilam te Israeldoma la zan'an wa'an naba la zen'an na soke en yeti, Naa, bene zuo te to sɔɔnrɔ, Yudadoma wa zun' ho, nya tare hom la ho yiredoma la ho kpɛ'ɛndoma zan'an yakɛ Yordan ka'lam na? 42 Yudadoma wa lebehe Israeldoma wa yeti, Naba la de tomam me mɛ la zuo. Wane te ya zabera yele dena me zuo? Naba wa diihire tomam? Bii a bo to la bo'olom sebo? 43 Israeldoma wa lebehe Yudadoma wa yeti, Na'am la poan, tomam kema dela pia bini. La han le dɛna la David mɛŋa me zen'an, tomam gane ya. Bene zuo te yamam ka nana tomam? Dagɛ tomam n de yiadoma te to tɔgɛ naba wa lɛbega na yele? Ge Yudadoma la yetɔgom kpe'em mɛ gana Israeldoma wa yetɔgom mɛ.