Amalekdoma daa tare ba pɔgɔba la ba dayɔɔhe la ba pɔyɔɔhe keŋɛ
30
1 Te David la a nɛreba la paɛ Ziklag na dabeha atan' daarɛ. Ban paɛ ba nyɛ' te Amalekdoma n daa wa'ana zabɛ la teŋse'ehe n boe Negev poan la, ta ta' la Ziklag teŋa nyɔ' Ziklag teŋa la zan'an bahɛ, 2 ge vaɛ ka poan pɔgɔhe la nɛra woo n boe ka poan, bonbila la bonkotɛ woo, ka ko nɛnɛra ge tare ba keŋɛ.3 David la a nɛreba la n paɛ na la, ba nyɛ te teŋa la nyɔ' mɛ ge te 4 David la a nɛreba la kaahɛ te ba koŋkɔya ta sin' te ba kan le ta'an kaahɛ. 5 Amalekdoma lagom nyɔkɛ David pɔgɔba bayi' la mɛ, Ahinoam Yezreel teŋa pɔka la Abigail Karmel teŋa boraa Nabal pɔga la. 6 Se'ere n pa'ahɛ ba' daam David dela, a nɛreba la zan'an suunre n ba' nyie la David te ba yeti ba lobe en la kuga, ba dayɔɔhe la ba pɔyɔɔhe la zuo. Ge David kpemehe a mɛŋa Na'ayenɛ a Yenɛ la poan.
7 David nya yele Ahimelek dayɔa Abiatar la n de malemadaana la yeti, Tare toolom fugiriga la na. Te a tare fuo la paɛ David zen'an. 8 David soke Na'ayenɛ yeti, N dige nayigehe wa? N wan paɛ ba? Na'ayenɛ yele en yeti, Dige ba. Ho wan paɛ ba fan' ho nɛreba la. 9 David yehe la a boraa kɔbehe seyoobe la, te ba wa'ana paɛ Besor Kolaa la nɔɔrɛn te se yee bɔgɔhe la nɔɔrɛn la gan'arɛ. 10 Se'ere n sɔe ba kɔbehe seyi' taregɛ, te David bahɛ bama bilam ge te a tole la boraa kɔbehe senaahe la.
11 Ba nyɛ Mizraim teŋa boraa kayema bɔn'ɔn poan ha tare ka paɛ David nɛŋan na, te ba bo ka dia la ko'om. 12 Disɛka te ba bo en la dela mu'uro kɛ'ɛhe la tiihe wɔla n ku'e wama ayi'. Boraa wa n di ba'ahɛ la, te ka yam nya lebe na. Se'ere n sɔe la, dabeha atan' te ka ka di sɛla. 13 David nya soke en yeti, Hom dole la ane? Ho me ze'ele la bɛha na? Te a yele David yeti, Mam dela Mizraim teŋa bodibila te n daana dɛna Amalek teŋa boraa. Te mam daa bɛn'ɛnra te n kpɛ'ɛma wa bahɛ mam mɔɔ wa poan ge keŋɛ dabeha atan' n wana zina. 14 To daa gbirige la Keretdoma n boe Negev poan la la sɛba n de Yuda teŋadoma la Kalebdoma n boe Negev la poan la, ge nyɔ' Ziklag teŋa bahɛ. 15 David soke en yeti, Ho wan tare mam ta pa'alɛ ho nɛreba wa n boe zen'an? Te a yeti, Pɔ' Yenɛ wa te ho kan ko mam, ho me kan tare mam ta eŋɛ n daana wa nu'uhen, ge te n tare hɔ ta pa'alɛ.
16 N tare David ta pa'alɛ ban boe zen'an la, David nyɛ ba te ba zan'an zin' mɛ, dita ge nyuura ge wa'ara la popeelom. Se'ere n sɔe la, ban fan' lɔgɔseto Pilistia la Yuda teŋhe la poan la zo'e mɛ. 17 Te yenɛ ta yɛ'a lua, te David pɔhɛ zaberɛ la ba tara tara la yiimbeere zanɔɔrɛ. Ba nɛra yene me ka nyaŋɛ peɛn, han dagana bodibinto kɔbehe senaahe n deŋɛ zom yogoma zɔ la ma'an. 18 Te David lebehe fan' a sɛla woo te Amalekdoma la wa'ana fan' la ge le fan' a pɔgɔhe seyi' la me. 19 Ba sɛsɛla ka bɔregɛ, ba lɔgɔbila bii lɔgɔkantɛ bii ba bonbila bii ba bonkotɛ. David nyaŋɛ to'e ba sɛla woo lebe me na. 20 David nyaŋɛ fan' piihe la nii mɛ pa'ahɛ, te a nɛreba pe'e dunhe senhe bɔna dunhe la woo nɛŋa te nɛreba pa'ala te David n fan' lɔgɔseto n bala.
21 David n ye' lɛbera a nɛreba kɔbehe seyi' la n daa taregɛ te a bahɛ ba Besor Kolaa la nɔɔrɛn la, te bama me yehe to'ohɛ David la nɛreba la zan'an na te David paɛ na po'ohɛ ba zan'an. 22 Nɛreyaalehe la la nɛresɛba n ka tare vɔnrɛ n dole David la nyɔna yeti, Bana n ka doohe keŋɛ la, ba kan nyɛ sɛla lɔgɔrɔ la poan. Ba yeen to'e ba pɔgɔba la ba kɔma la keŋɛ ge bahɛ tɔ. 23 David yele ba yeti, N sɔɔnrɔ wa, da dekɛ ya sɛla te Na'ayenɛ dekɛ bo to wa eŋɛ yamam n bote se'em. Na'ayenɛ n gu' to, ge dekɛ nayigehe wa n wa'ana zabɛ la to wa eŋɛ to nu'uhen. 24 Ane n wan kelehe yamam n yeti sɛla wa? Se'em n keŋɛ pɛɛnbɔn'ɔn la poan, la se'em n yee gura lɔgɔrɔ la yɔɔrɛ dela boyena. Ba yɔɔrɛ ka gane taaba. 25 Yehe de daarɛ yɛ'ɛha, David daa eŋɛ dɛ te de dɛna la malema la nɔze'elego bo Israeldoma tare na paɛ zina.
26 David n lebe na paɛ Ziklag teŋa la, a loe lɔgɔseto te a fan' la mɛ bo a zɔdoma sɛba n de Yudadoma nɛŋadoma la, ge yeti, Tomam n zabɛ nyaŋɛ Na'ayenɛ diŋdoma la ge fan' lɔgɔseto la, ho tɔntɛ n wana. 27 A tɔnrɛ bo la sɛba n boe Betel la Aramot Negev la Yatir la 28 Aroer la Sipmot la Estemoa la 29 Arakal la Yerameel teŋhe la Ken teŋhe la 30 Horma la Bor Asan la Atak la 31 Hebron la teŋse'ehe woo te David la a nɛreba la tabelɛ ɛ se poan la.