Te nɛreba la zan'an voole yeti, Naa, naa naba!
10
1 Te Samuel dekɛ iilɛ la kaam ka'ɛ yeele Saul zuo, ge kɔkɛ en ge yele en yeti, Na'ayenɛ n sɔ' ho te ho beha a nɛreba Israeldoma wa. Hom wan beha Na'ayenɛ nɛreba wa, ge fan' ba ba diŋdoma woo nu'uhen bahɛ. Yele se'ere n wan dɛna danlehom pa'alɛ te Na'ayenɛ n sɔ' hɔ te ho beha a nɛreba wa. 2 Ho han bahɛ mam zen'an zina yɛ'a, ho wan to'ohɛ boraahe seyi' Arakel yɔɔ la zen'an Zelza teŋa Benyamin sɔ'ɔlom la poan. Ba wan yele ho te ba nyɛ bonhe la te ho yehe se ɛɛa la. Ho sɔ ka le fabela bonhe la yele, ge a nya fabele la hom yeti bene n eŋɛ n dayɔa wa. 3 Ho han ze'ele bilam keŋɛ sige fiin na paɛ Tabor tikantɛ la, boraahe setan' n ye' Betel teŋa te se ta sohɛ Yenɛ wan to'ohɛ hɔ, te kayema tara pebibihe setan', te kayema tara boroboro atan', te kayema la me ziira daam la talaŋa. 4 Ba wan po'ohɛ hɔ ge bo ho boroboro bayi', ho to'e. 5 Bilam han tole, ho wan wa'ana paɛ Yenɛ zoore la n boe Gibea teŋa poan la, zen'an te Pilistidoma pɛɛntɛɛnreba bɔna gura ba teŋa la. Bilam yɛ'a teŋa poan na, ho wan to'ohɛ nɔtɔgɔheba te ba ze'ele kaanbegɔ zen'an la sigera na, te kɔnlɔgɔ la senyagarɛ la yiihe la duureŋa bɔna ba nɛŋan ŋmɛ'ɛra ge te ba pota. 6 Na'ayenɛ Sea wan perɛ hɔ la paŋa, te ho lagom pota, te la tee ho te ho kan la dɛna hom de se'em wa. 7 Danlehom bona wa woo han ta eŋɛ hɔ, ho eŋɛ sɛla te Yenɛ wan pa'alɛ ho la. Yenɛ bɔna la hɔ. 8 Ho ta deŋɛ nɛŋa yɛ'a Gilgal teŋa ge n wan sige bini na kaanbɛ nyɔ'an bo'olom la popeelom bo'olom bo Na'ayenɛ. Ho gu'uhe dabeha ayopɔe ge te n wa'ana pa'alɛ hɔ hom n wan eŋɛ se'em.9 Saul n bire a poore bahɛ Samuel te a keŋɛ la, te Yenɛ bo Saul suunre deyema te yele ana wa zan'an tom de daarɛ mea. 10 Ban wa'ana paɛ Gibea teŋa zoore la, ba yeti ba behɛ te Yenɛ nɔtɔgɔheba n bala to'oha Saul na. Te Yenɛ Sea paŋa sige Saul zuo zo'e te a pɔhɛ pota la nɔtɔgɔheba la. 11 Nɛresɛba n pon mina en korom ge nyɛ en te a naɛ la nɔtɔgɔheba la pota la, ba yɛta taaba yeti, Bene n zina eŋɛ Kis dayɔa wa? Saul me lagom pa'ahɛ nɔtɔgɔheba la poan mɛ? 12 Boraa n boe bini lebehe yeti, Ane n de ba sɔ? Bala te yele dena wa dɛna makerɛ te, Saul me lagom bɔna nɔtɔgɔheba la poan. 13 Saul n ta porɛ ba'ahɛ la, a ihege keŋɛ la kaanbegɔ zen'an la poan.
14 Pooren te Saul sɔ be'a ta nyɛ en soke enŋa la yameŋa la yeti, Yamam keŋɛ la bɛha bala? Te Saul yeti, To keŋɛ la bonhe la eere. Ge tomam n ta ɛ se koŋɛ la te tomam kɛn' Samuel zen'an. 15 Saul sɔ be'a wa yele en yeti, Yele mam Samuel n yele ho sɛla la. 16 Saul yele en yeti, A yele tomam te ba nyɛ bonhe la. Ge Saul ka yele a sɔ be'a la na'am la yele te Samuel yele en.
17 Samuel lagahɛ Na'ayenɛ nɛreba wa wa'an Mizpa teŋa na 18 yele ba yeti, Na'ayenɛ Israel Yenɛ la n yele se'em n wana. Mam n tare Israel ze'ele Mizraim teŋa yehe na, mam fan' ya Mizraimdoma nu'uhen la sɔ'ɔlom la zan'an n muguhere ya la bahɛ. 19 Ge zina dabaherɛ wa, ya zagahɛ ya Yenɛ se'ere n fan' ya ya nɔyalegerɛ la ya sunsagaŋɔ poan bahɛ la mɛ, ge yeti, Aai, bo to naba te a ka beha tɔ. Bala ya zan'an yehe na ze'ele Na'ayenɛ nɛŋan, ya yizuto ya yizuto, la ya yiya ya yiya.
20 Samuel n bahɛ te Israel yizuto zan'an lɛm na, te a ŋmɛ' gbaŋa te gbaŋa la loe Benyamin yizuo la. 21 Te a tare Benyamin yizuo la na ŋmɛ' gbaŋa te la loe Matri yire la. Te a tare Matri yire la boraa boraa yehe na ŋmɛ' gbaŋa, ta la loe Kis dayɔa Saul. Ge ban behɛ la, ba ka nyɛ en bini. 22 Te ba soke Na'ayenɛ yeti, Boraa wa wa'an ka'lam na? Te Na'ayenɛ lebehe yeti, Behɛ ya, enŋa n bala sogora a mɛŋa lɔgɔrɔ la poan ha la. 23 Ba zɔ ta tare en bini wa'ana. En wa'ana ze'ele ba poan ba'ahɛ la, enŋa n wɔgɛ gana ba zan'an. 24 Samuel yele nɛreba la zan'an yeti, Ya nyɛ se'em te Na'ayenɛ mɛŋa loe la? Se'em ka boe ya poan ana wo en. Te nɛreba la zan'an voole yeti, Naa, naa naba!
25 Samuel yele nɛreba la naba la paŋa la ka toonɛ n de se'em ge golehɛ yɛla la eŋɛ gɔŋɔ poan dekɛ biŋe zen'an Na'ayenɛ nɛŋan. Ge Samuel nya bahɛ te nɛra woo yeregɛ kule a yire a yire. 26 Saul me kule a yire Gibea teŋa, la kansaŋehe sɛba te Yenɛ kalom ba sunya la. 27 Ge nɛreyooro basɛba me nyɔna yeti, Boraa kana wan eŋɛ la wane fan' tomam bahɛ? Ba zagahɛ en ka tare sɛla na po'ohɛ en. Ge Saul me nyɔkɛ a mɛŋa te la ta paɛ ŋmarega.