21
1 Te Israeldoma la n daa lagahɛ taaba Mizpa teŋa la poan nya pɔ' yeti, Tomam ka maalom dekɛ to pɔyɔa elehe Benyamindoma wa. 2 Bala te nɛreba la keŋɛ Betel ta zin'ire Na'ayenɛ nɛŋan, kaahɛ la ninmɔ'ɔrɛ la bala ta luhe yenɛ. 3 Ba yeti, Na'ayenɛ Israel Yenɛ, bene eŋɛ la hom bahɛ te Israel yizuo koyema n bɔrege zina wa?4 Yiimbeere la nɛreba la ihege bolika yu'uŋyu'uŋɔ mɛ' bimbine ge nya kaanbɛ nyɔ'an bo'olom la sunma'ahom bo'olom. 5 Te ba nya sokɛ yeti, Ane n boe Israel buuri wa poan ge ka lagom wa'an Na'ayenɛ zen'en na? Se'ere n sɔe la, ba daa pɔ' la pɔ'kantɛ bo se'em n ka lagom wa'an Na'ayenɛ nɛŋan Mizpa teŋa la poan la yeti ba wan seren ko' a daana. 6 Te Israeldoma la suunre sagom la ba sɔɔnrɔ Benyamindoma ge yeti, Yizuo koyema ka le puta Israeldoma wa poan zina. 7 To wan eŋɛ la wanɛ te boraa se'ehe n yee la, ge to n daa pɔ' Na'ayenɛ yeti to ka malom dekɛ to pɔyɔɔhe elehe ba la? 8 Te ba sokɛ yeti, Israel buuri wa, yizuo konɛ doma n ka doohe wa'an Na'ayenɛ nɛŋan Mizpa teŋa la poan? Te ba nyɛ te Yabes Gileaddoma n ka lagom bɔna to lagaŋɔ wa poan. 9 Ba n yi nɛreba la zan'an lagahɛ na la, ba ka nyɛ Yabes Gileaddoma nɛra la ayema mɛ bini. 10 Te ba la loe pɛɛntɛɛnreba tuha pia la ayi', tom ba te ba keŋɛ ta ko' Yabes Gileaddoma la zan'an n kɛn' bini pa'ahɛ pɔgɔhe la kɔma. 11 Sɛla te ya wan eŋɛ n wana, ko' boraahe la pɔgɔse'ehe n tare sereba zan'an. 12 Ba nyɛ la pugunto kɔbehe senaahe n ka mi' boraa Yabes Gilead teŋa la poan tare ba wa'an Silo n boe Kanaan teŋa poan.
13 Te nɛreba la n daa zan'an lagahɛ taaba tom ba nɔɔrɛ bo Benyamindoma n sogɛ taŋa poan Arimon teŋa la poan la. Ba tɔgɛ la sunma'ahom bo ba. 14 Bala n bahɛ te Benyamindoma lebena, te ba dekɛ pɔgɔba te ba ka ko' la bo ba. Ge la bama sekɛ ba.
15 Ba suunre sagom la Benyamindoma la. Se'ere n sɔe la, Na'ayenɛ tare la yelehego na bo Israel buuri la. 16 Te keendoma la lagahe taaba sokɛ yeti, To wan eŋɛ la wanɛ la Benyamin boraa se'ehe pɔgɔba la n ki la? 17 Ba le yeti, La sontii Benyamindoma la n yee la nyɛ tɔntɛ Israel buuri la poan. La wan eŋɛ se'em te ba yu'urɛ ka n saalom. 18 Ge to ka ta'an dekɛ to pɔyɔɔhe elehe ba. Se'em n dekɛ a pɔyɔa elehe Benyamindoma wa sagom bo a daana zuo. 19 Ge behɛ, Na'ayenɛ de'eŋɔ la yuune wo la, pɔnre mɛ. Bala, de'eŋseko n de'enɛ Silo teŋa la n boe Betel teŋa zuɔ nu'o bɔba la, bɔna sɔrɔɔ buka la n ze'ele Betel yɛ'ɛha Sekem teŋa la poan, lebehe Lebona teŋa gɔbega nu'o bɔba la. 20 Te ba yele Benyamindoma la yeti, Keŋɛ ya ta sogɛ ya tiihe vatɔ la poan, 21 ge pigera ya. Ya han nyɛ' te Silo teŋa pugunto han yehena te ba wa', ya kɔ'ɔn ze'ele tiihe vatɔ la poan zɔ' yehena. Te nɛre woo nyɔkɛ en paɛ pugula sɛka la a tare kule Benyamin teŋa la poan te ka dɛna a pɔga. 22 Te ba sɔdoma bii ba tanpa han wa'ana yele tɔ, tomam wan yele ba yeti, Maalɛ ya bo ba. Se'ere n sɔe la to ka zabɛ fan' pɔgɔhe bo ba bii ya mɛhe n dekɛ se bo ba te ya wan yeti be'em boe ya zuo.
23 Benyamindoma la seren eŋɛ la bala. Pugunto la n zone se'em tole wa' nɛra woo goe la a pɔga tare kule. Te ba lebe ta maalom mɛ ba teŋhe la kɛn'ɛra se poan. 24 Bala ma'an, Israeldoma yeregɛ mɛ te nɛreba kule ta paɛ ba yizuo la ba yiya la ba lɔgɔseto woo te ba bahɛ la. 25 Saŋkaŋa la poan la te naba ka boe Israel teŋa la poan ge nɛra woo ete la enŋa n bote se'em.