8
1 Te Epraimdoma la soke Gideon yeti, Bene n sɔe te ho eŋɛ to bala, saŋsɛka te ya keŋɛ ta zabɛ la Midiandoma la, ya yi' to me yoi? Ba daa nyɔnɛ en me la ninmɔ'ɔrɛ. 2 Ge a me lebehe ba yeti, Bene te mam eŋɛ, te zonɛ la taaba yoi? Epraimdoma, ya bonyɛɛhe ka ane soŋa gana sɛla te Abiezerdoma wa bure me yoi? 3 Yenɛ dekɛ Midian nɛŋadoma Oreb la Zeeb eŋɛ ya nu'uhen. Bene te mam wan ta'an le dekɛ pa'alɛ yamam? Te n tɔgɛ wana ba'ahɛ la, ba suunre daa ma'amɛ.4 Te Gideon la a nɛreba kɔbehe setan' la yakɛ Yordan Kolaa la ba'ahɛ la ba taregɛ mɛ ge kelom digera ba diŋdoma la. 5 Ban paɛ la Sukot teŋa na, te a yele teŋa la doma, N bene ya mɛ, eŋɛ ya dia bo nɛreba wa n dole mam wa, man digere la Midian nadoma wa Zeba la Zalmuna. 6 Teŋa la nɛŋadoma la yele ba yeti, Zeba la Zalmuna pon bona la ya nu'uhen te tomam ton eŋɛ dia bo ho pɛɛntɛɛnreba? 7 Gideon yele ba yeti, Ma'ɛn n bala, Na'ayenɛ han dekɛ Zeba la Zalmuna eŋɛ mam nu'uhen, n wan aanhom ya iinhe la gɔn'ɔhe. 8 Te a le zom Penuel teŋa ta yele bama me bala mea, te teŋa la nɛreba la lebehe en wo Sukotdoma pon lebehe en se'em la. 9 Te a yele Penueldoma la yeti, N han keŋɛ ge lebe som na, n wan sagom ya teŋa wa.
10 Zeba la Zalmuna n daa bona Karkor teŋa poan la pɛɛntɛɛnreba tuha pia la banuu. Dapoore bɔba nɛreba la pɛɛntɛɛnreba nɛresɛba n gee n bala. Se'ere n sɔe la ba pɛɛntɛɛnreba tuha kɔbega la pihiyi' n ki'. 11 Gideon doohɛ la mɔen sɔrɔɔ keŋɛ ta lige nɛresɛba n kɛn'ɛre Noba la Yogbeha teŋse'ehe n boe dapoore bɔba ha, zabɛ la ba. 12 Midian nadoma bayi' la Zeba la Zalmuna zɔ' te a digɛ ta nyɔkɛ ba ge sa'ɛ pɛɛntɛɛnreba la zan'an te ba yelegɛ.
13 Te Yoas dayɔa Gideon zabɛ ba'ahɛ ge doohe Heres teŋa lebe na. 14 A nyɔkɛ la Sukotdoma bodibipaalega sokɛ en te bodibipaalega wa golehɛ teŋa la nabiihe la keendoma la yu'ura, ba boraahe pihiyopɔe la bayopɔe. 15 Gideon keŋɛ ta yele Sukot teŋa la boraahe la yeti, Behɛ Zeba la Zalmuna se'em te ya yele mam yeti, Zeba la Zalmuna pon bɔna la ya nu'uhen, tomam ton eŋɛ dia na bo ho nɛresɛba n tarege la. 16 A nyɔkɛ teŋa la keendoma la, n gore nɛreba wa la ŋmɛ'ɛre, ŋmɛ' ba la gɔn'ɔhe la gɛn'ɛre. 17 A keŋɛ ta sagom Penuel teŋa dewoko la ge ko' teŋa la boraahe zan'an.
18 Te Gideon sokɛ Zeba la Zalmuna yeti, Nɛresɛba te ya ko Tabor teŋa la poan, ba ane la wane? Te ba lebehe yeti, Ba ane me wo yamam wa. Ba zan'an wɔnɔ mɛ la naba dayɔa. 19 Te a yele ba yeti, Ba dela mam sɔɔnrɔ, mam ma kɔma n bala. Mam pɔ' Na'ayenɛ te ya han ka ko' ne ba, mam mɛ kan ko' ya. 20 Te a yele a dayɔkeema Yeter yeti, Ihege ko' ba! Ge Yeter daa ka ko' ba. Se'ere n sɔe, dabeem n tare, ka kelom dena la bia. 21 Zeba la Zalmuna yele en yeti, Ihege saazuo ho mɛŋa la ho ba'ahɛ le to. Boraane tom la a boraane. Bala te Gideon vaɛ ihege ko' Zeba la Zalmuna ge dekɛ kaam n tare nyuŋo soŋɔ n page ba yogoma poore zuo.
22 Te Israeldoma la yele Gideon yeti, Hom la ho dayɔa le ho yaahe sɔna to behera. Se'ere n sɔe la hom n fan' to Midiandoma nu'uhen ba'ahɛ. 23 Ge Gideon lebehe ba yeti, Mam kan behɛ ya. Mam dayɔa me kan behɛ ya. Na'ayenɛ wan behɛ ya. 24 Gideon le yele ba yeti, Mam bote nɛra wo bo mam tobekayulega, ya loe lɔgɔseto te nɛreba zɔ' ge bahɛ la poan. La dela Ismaeldoma malema te ba ne yula sanlema tobekayulehe se'em la. 25 Te ba lebehe yeti, Te wan seren bo ho tobekayulehe la. Bala te ba dekɛ fuo yerege te nɛre woo tare a tobekayulega lɔbera baha fuo la zuo. 26 Sanlema tobekayulese'a te a to'ohe la tebehom dela kpila tuhure la kɔbehe seyopɔe. Midian nadoma la lɔgɔrɔ la kunkɔbanhe la futo la baŋse'ehe te ba yogoma la yɛ' la me pa'ahɛ. 27 Gideon dekɛ la lɔgɔrɔ maalɛ toolom fugiriga tare na ze'ele a mɛŋa teŋa Oprah. Te Israeldoma zan'an dekɛ ba mɛhe na'aha dɛ te dɛ lebege bɛnregɔ bo Gideon la a yire nɛreba. 28 Te Israeldoma wa nyaŋɛ Midiandoma wa te Midian ka zɛnkɛ ba mɛŋa le yɛ'ɛha. Te Gideon to'e teŋa la biŋe me le yuum pihinaahe ge nya baŋɛ ki'.
29 Te Yoas dayɔa Yerub Baal nya keŋɛ ta kɛn'ɛra a mɛŋa yire poan. 30 Gideon di la pɔgɔba kekeko te a dayɔɔhe dɛna pihiyopɔe. 31 A pɔgɔbɔ'ɔreŋa n kɛn'ɛre Sekem teŋa la poan dɔgɛ bia te a segɛ ka yu'urɛ Abimelek. 32 Yoas dayɔa Gideon kɔrɔgɛ mɛ ge nya ban ki' te ba pin' en a sɔ Yoas yɔɔ n boe Oprah n de a sɔyaaba Abiezer teŋa.
33 Gideon n ki ba'ahɛ waabe la te Israeldoma la kaanbera Baal bagarɛ la ge mɛ' Baal Berit gole n ta dɛna ba bagarɛ. 34 Te Israeldoma wa ka le tɛnra Na'ayenɛ ba Yenɛ la n fan' ba ba diŋdoma nu'uhen bahɛ. 35 Bii ba pon eŋɛ som bo Yerub Baal n de Gideon yiredoma la doohɛ la toonsoma la te a tom bo Israeldoma wa.