Te a bo ba Benyamin boraa Gera dayɔa Ehud n dɛna gɔbega
3
1 Te teŋse'ehe te Na'ayenɛ gee te a makɛ Israel nɛresɛba n ka tabele mina pɛɛntɛɛnre ane se'em Kanaan teŋa la poan. 2 A eŋɛ bala te a pa'alɛ Israel yaahe sɛba woo n ka tabele baŋɛ pɛɛntɛɛnre ane se'em. 3 Teŋhe la poan doma n wana: Pilistia nadoma banuu la Kanaandoma zan'an la Sidondoma la Hivdoma sɛba n kɛn'ɛre Lebanon zoore zuo ze'ele Baal Hermon Zoore zuo ta paɛ Lebo Hamat. 4 Na'ayenɛ bahɛ te bana dɛna makere bo Israeldoma, te a nyɛ ban dɔla Na'ayenɛ nɔɔrɛ te a yuun bo ba sɔyaabdoma doohe Moses poan bii ba ka dɔla. 5 Israeldoma la kɛn'ɛre mɛ la Kanaandoma la Hitidoma la Amoridoma la Perizidoma la Hivdoma la Yebusdoma la. 6 Ba di la ba pɔyɔɔhe te bama me di ba pɔyɔɔhe ge lagom kaanbera ba baga la.7 Te Israeldoma tom be'em Na'ayenɛ nɛŋan. Ba tamɛ la Na'ayenɛ ba Yenɛ la mɛ ge dɔla bagase'a n de Baal la bagase'a n de Aserah la. 8 Te Na'ayenɛ sunsunyiim te a dekɛ ba eŋɛ Aram Naharaim teŋa naba Kusan Arisataim nu'uhen te Israeldoma tom yuuma anii bo en. 9 Israeldoma n kaahɛ bo Na'ayenɛ te a loe Kaleb yebega Kenaz dayɔa Otniel te a fan' ba la bahɛ. 10 Yenɛ Sea la sige a zuo te a nyɛ paŋa dɛna Israeldoma kema ye'ehɛ ta zabɛ. Te Na'ayenɛ dekɛ Aram teŋa naba Kusan Arisataim eŋɛ Otniel nu'uhen te a zabɛ nyaŋɛ en. 11 Te teŋa la nyɛ vo'ohogo yuun pihinaahe ge te Kenaz dayɔa Otniel nya ki'.
12 Israeldoma le tom be'em Na'ayenɛ nɛŋan. Be'em la zuo, Na'ayenɛ bo Moab naba Eglon paŋa te a zabɛ la Israeldoma. 13 Naba la me naa la Ammondoma la Amalekdoma te ba zabɛ nyaŋɛ Israeldoma to'e ba Kpa'kpa' Tiihe Teŋa la tara. 14 Israeldoma ton la yuun pia la anii bo Moab naba Eglon.
15 Israeldoma le kaahɛ te la paɛ Na'ayenɛ te a loe faanra bo ba. Te a bo ba Benyamin boraa Gera dayɔa Ehud n dɛna gɔbega. Te Israeldoma dekɛ bo'olom bo en te a tare ta bo Moab naba Eglon. 16 Te Ehud la n daa maalɛ so'woko n de kantere ge ŋmata nɔa ayi', dekɛ bobe a zuɔ geere te ka bɔna a lɔgɔrɔ la te a yɛ' la poan ha. 17 A tare bo'olom ta bo la naba Eglon n yuun de boraa kantɛ.
18 Ehud n dekɛ bo'olom la bo naba la ba'ahɛ la, a yele nɛresɛba n doohe en la te ba kena. 19 Ge en daa ta pɔnrɛ bagase'a n boe Gilgal teŋa, a lebe naba la zen'an nya yeti, Naa, n tare la sɔɔleŋa te n bo ho. Te naba la yele nɛresɛba woo n boe a nɛŋan la te ba yehe yeŋa. 20 Te Ehud nya paɛ naba la n zi' la ma'an a sɔnhega bɔ'ɔ poan yele en yeti, N tare la sɔɔleŋa Yenɛ zen'en na te n bo ho. Te naba la ihege saazuo 21 te Ehud paara en ge foe so'a la a zuɔ geere la a gɔbega nu'o lo' Eglon poore. 22 Ehud n lo' so'a la te ka tue yehe a pooren ge ka foe so'a la te kaam kɔ'ɔn sige pin' so'a la. 23 Ehud n yehe la naba sɔnhega bɔ'ɔ la na ge pagɛ koleŋa la. 24 Depooren te naba yamehe la wa paɛ nyɛ' te bɔ'ɔ la pagɛ ya te ba tɛn'ɛha te naba la kɛn' te a dɔnbelɛ a na'ma. 25 Ba gu'uhe te la yue ta gaŋɛ te ba yu'ɛ bɔ'ɔ te naba n ki' gan'an. 26 Ban daa ze' gu'ura la te Ehud le'ehɛ zɔ' peɛn doohe baga la zen'en tole Seira teŋa poan.
27 En ta paɛ Epraim teŋsɛka n boe zoore zuo ha la ge nya peebe tentanɛ ge kaahɛ boraane, te Israeldoma la doohe la en te a bɔna ba nɛŋa te ba keŋɛ sige teŋsɛka n boe zoore zuo la. 28 Te a yele ba yeti, Doohe ya ma na te Na'ayenɛ n dekɛ ya diŋdoma Moab teŋa eŋɛ to nu'uhen. Bala, te ba doohe en keŋɛ sige Yordan Kolaa n tɔ Moab la, nya gu'. Te nɛnɛra ka ta'an yakera yakene deyema la ha. 29 Saŋkaŋa ma'an la te ba ko' Moabdoma nɛrekpɛ'ɛma la pɛɛntɛɛnreba, ba nɛreba tuha pia. Te nɛra ayema me ka zɔ' peɛn. 30 Dabaherɛ dene daarɛ la Moabdoma la boe la Israeldoma nu'uhen ge te teŋa la doma vo'ohe yuum pihinii.
31 Te Ehud pooren, Anat dayɔa Samgar n wa sɔe. Enŋa dekɛ zan'anɛ ko' Pilistidoma kɔbehe seyoobe. A me fan' Israeldoma bahɛ mɛ.