<<    <     Yosua     21     >    >> 
Israeldoma n tɔnrɛ teŋhe la se bɔn'ɔrɔ se'em bala bo Levidoma
21
1 Te Levidoma la keendoma wa'an malemadaana Eleazar la Nun dayɔa Yosua la Israel buuri yizuto keendoma la zan'an na 2 Silo teŋa n boe Kanaan teŋa poan na, yele ba yeti, Na'ayenɛ daa bo Moses a nɔɔrɛ yeti, ya bo to kɛn'an zen'an teŋhe poan ge bo to bɔn'ɔrɔ n tare yaama te to dunhe ɔbera. 3 Bala, doohe la Na'ayenɛ n daa bo a nɔɔrɛ la se'em la, Israeldoma n loohe teŋse'ehe la bɔn'ɔrɔ seto ba sɔ'ɔlom la poan bo Levidoma wa n wana.
4 Ban ŋmɛ yia gbaŋa la, ka loe la Kohatdoma la ba yizuto. Bama n de malemadaana Aron yaahe, Levidoma la, te ba to'e la teŋhe pia la setan' Yuda la Simeon la Benyamin yizuto sɔ'ɔlom la poan. 5 Kohat yaahe se'a n gee la to'e la teŋhe pia Epraim la Dan la Manase yizuo koyema yizuto sɔ'ɔlom la poan. 6 Gerson yaahe la to'e la teŋhe pia la setan' Isakar la Aser la Naptali la Manase yizuo koyema la n boe Basan teŋa la yizuto sɔ'ɔlom la poan. 7 Merari yaahe la to'e la teŋhe pia la seyi' Areuben la Gad la Zebulun yizuto sɔ'ɔlom la poan. 8 Israeldoma n tɔnrɛ teŋhe la se bɔn'ɔrɔ se'em bala bo Levidoma wa wo Na'ayenɛ n daa bo Moses a nɔɔrɛ se'em la.
9 Ba me tɔnrɛ Yuda la Simeon yizuto sɔ'ɔlom poan teŋse'ehe bo Levidoma la yu'ura n wana. 10 Teŋhe sena n tɔnrɛ bo Aron yaahe wa n ze'ele Levidoma Kohat yizuo la poan la, ba ŋmɛ' gbaŋa ba zuo yia la. 11 Ba bo ba la Kiriat Arba n de Hebron teŋa la yaama la bɔn'ɔrɔ seto n kae teŋa la bɔna Yuda zɔya teŋhe la poan. Arba dela Anak sɔyaaba. 12 Ge sengehe la teŋbibise'ehe n kae Kiriat Arba la ba daa dekɛ bo Yepune dayɔa Kaleb te la dɛna a sɔ'ɔlom. 13 Te ba bo Aron n de malemadaana yaahe Hebron n de gankerɛ teŋaa la Libnah la 14 Yatir la Estemoa la 15 Holon la Debir la 16 Ain la Yuta la Bet Semes teŋhe la se bɔn'ɔrɔ man'aha seto n kae se la zan'an dela teŋhe sewae' te ba loe yizuto toyi' wa sɔ'ɔlom poan. 17 Benyamin yizuo la me poan, ba bo ba Gibeon la Geba la 18 Anatot la Almon teŋhe senaahe la se bɔn'ɔrɔ en ma'ɛn. 19 Teŋse'ehe woo te ba loohe bo Aron yaahe la dela teŋhe pia la setan', la se bɔn'ɔrɔ en ma'ɛn.
20 Levidoma Kohat yizuo seto woo n gee la to'e teŋhe la Epraim yizuo teŋhe poan. 21 Epraim zɔya teŋhe wa poan ba bo ba Sekem n de gankerɛ teŋa la Gezer la 22 Kibzaim la Bet Horon, teŋhe senaahe la se bɔn'ɔrɔ n ma'ɛn. 23 Ban to'ohe teŋse'ehe Dan yizuo la sɔ'ɔlom poan bo ba Elteke la Gibeton la 24 Aiyalon la Gat Arimon, teŋhe senaahe la se bɔn'ɔrɔ n ma'ɛn. 25 Ban to'ohe teŋse'ehe Manase yizuo koyema la sɔ'ɔlom la poan bo ba Taanak la Gat Arimon, teŋhe seyi' la se bɔn'ɔrɔ n ma'ɛn. 26 Kohat yizuo n gee to'e teŋhe sena pia wa la se bɔn'ɔrɔ n ma'ɛn.
27 Teŋsena te ba bo Levidoma Gerson yizuto n wana. Ba to'e Manase yizuo koyema la poan Golan n de gankerɛ teŋa n boe Basan teŋa poan la Be Estara, teŋhe seyi' la se bɔn'ɔrɔ n ma'ɛn. 28 Ban to'e teŋse'ehe Isakar yizuo la sɔ'ɔlom poan la n wana: Kision la Daberat la 29 Yarmut la En Ganim, teŋhe senaahe la se bɔn'ɔrɔ n ma'ɛn. 30 Ban to'e teŋse'ehe Aser yizuo sɔ'ɔlom la poan n wana: Misal la Abdon la 31 Helkat la Arehob, teŋsenaahe la se bɔn'ɔrɔ n ma'ɛn. 32 Ban to'e teŋse'ehe Naptali yizuo sɔ'ɔlom poan la n wana: Kedes n boe Galilee teŋa poan n de gankerɛ teŋa la Hamot Dor la Kartan, teŋhe setan' la se bɔn'ɔrɔ n ma'ɛn. 33 Teŋse'ehe woo te Gerson yizuto to'e la dela teŋhe pia la setan' la se bɔn'ɔrɔ n ma'ɛn.
34 Teŋsena te ba bo Merari yizuto, Levidoma seto n gee la, n wana. Ba to'e teŋse'ehe Zebulun sɔ'ɔlom la poan Yokneam la Karta la 35 Dimna la Nahalal, teŋhe senaahe la se bɔn'ɔrɔ n ma'ɛn. 36 Ban to'e teŋse'ehe Areuben sɔ'ɔlom la poan Bezer la Yahaz la 37 Kedemot la Mepaat, teŋhe senaahe la se bɔn'ɔrɔ n ma'ɛn. 38 Ba to'e teŋse'ehe Gad sɔ'ɔlom la poan Aramot n boe Gilead teŋa poan n de gankerɛ teŋa la Mahanaim la 39 Hesbon la Yazer, teŋhe senaahe la se bɔn'ɔrɔ n ma'ɛn. 40 Teŋse'ehe woo n tɔnrɛ bo Merari yizuto, Levidoma seto n gee la, dela teŋhe pia la seyi'.
41 Levidoma wa kɛn'ɛre Israel teŋse'ehe poan dela teŋhe pihinaahe la senii la se bɔn'ɔrɔ n ma'ɛn. 42 Teŋhe sena wa woo tare la bɔn'ɔrɔ n ma'ɛn kae se. Se zan'an ane la bala.
43 Na'ayenɛ n dekɛ teŋa woo la te a pɔ' te a wan dekɛ bo ba sɔyaabdoma la se'em bala bo Israeldoma, te ba to'e ka zin'an ka poan sɔna ka. 44 Te Na'ayenɛ nya bo ba vo'ohogo bɔbɔrɛ woo wo n pɔ' se'em bo ba sɔyaabdoma la. Ba diŋdoma la ayena me ka nyaŋɛ ze'ele la ba. Na'ayenɛ dekɛ ba diŋdoma zan'an eŋɛ la ba nu'uhen. 45 Na'ayenɛ nɔsoma la te a biŋe la Israeldoma te a eŋɛ bo ba la, deyena me ka gee ka tom bo ba wa.