Ge Israel buuri iyopɔe n gee nan ka to'e ba sɔ'ɔlom
18
1 Te Israel buuri la zan'an lagahɛ Silo teŋa poan tin' Sogorɛ la bilam. Bala ma'an la te bama n sɔe sɔna teŋa la behera, 2 ge Israel buuri iyopɔe n gee nan ka to'e ba sɔ'ɔlom. 3 Te Yosua soke Israeldoma wa yeti, Ya yeti ya gu'uhe paɛ la wane ma'an ge nya fan' teŋsɛka te Na'ayenɛ ya sɔdoma Yenɛ la dekɛ bo ya la? 4 Loohe ya nɛreba batan' batan' yizuto woo poan. N wan tom ba te ba keŋɛ ta kae teŋa la behɛ ge golehɛ ka n ane se'em la nɛra woo n wan to'e ka zen'an te la dɛna a sɔ'ɔlom tare na bo mam. 5 Ya tɔnrɛ ka sugumnɔɔren boyopɔe. Bahɛ te Yuda kelom sɔna a gɔbega bɔba mea te Yosef buuri la me sɔna ba zuɔ bɔba mea. 6 Ya han ta golehɛ zen'enhe seyopɔe la en ane se'em ba'ahɛ, tare wa'ana, te n ŋmɛ' se gbaŋa Na'ayenɛ to Yenɛ la nɛŋan bo ya. 7 Levidoma la ka tare tɔntɛ la ya. Se'ere n sɔe bama n tone malema tooma Na'ayenɛ nɛŋan la n de ba tɔntɛ. Gad la Areuben la Manase yizuo la deyema pon to'e ba sɔ'ɔlom zen'se'ehe n boe Yordan Kolaa dapɔya bɔba ha la. Na'ayenɛ yameŋa Moses n daa dekɛ bo ba.8 Boraahe la n ta maahom ba'ahɛ te ba keŋɛ ta kae teŋa la behɛ la, Yosua pa'alɛ ba yeti, Keŋɛ ya ta kae teŋa la behɛ. Ge golehɛ yamam n nyɛ se'ere na bo mam, te n ŋmɛ' ka gbaŋa Na'ayenɛ nɛŋan Silo teŋa wa poan. 9 Te boraahe la yehe keŋɛ teŋa la poan ta ɛ ka poan, golehɛ teŋa woo n boe ka poan ana se'em, tɔnrɛ ka sugumnɔɔren boyopɔe eŋɛ gɔŋɔ poan, ge lebe Yosua zen'an Silo na. 10 Te Yosua ŋmɛ' se gbaŋa Na'ayenɛ nɛŋan Silo teŋa poan bo ba, ge tɔnrɛ se bilam mea bo Israel buuri la zan'an.
11 Gbaŋa la n loe zen'sɛka bo Benyamin yizuto, ba yire yire n wana. Ba tɔntɛ la gan' la Yuda la Yosef yizuto la teŋasoka. 12 Ba zuɔ, beene pɔhɛ la Yordan Kolaa la wa'ana gaŋɛ Yeriko teŋa zuɔ zuluŋa la tɔɔra nɛŋa bɔba ta kɛn' teŋa la en yage zoore zuo la wa'ana yehe Bet Aven pɔgɔtia la poan. 13 De ze'ele la bilam yakɛ Luz n de Betel gɔbega zuluhe la, sige Atarot Adar zoore la zuo teŋa nɔɔrɛ Bet Horon gɔbega bɔba. 14 De ze'ele zoore se'ere n tɔ Bet Horon na la gɔbega la beene la ŋmɛregɛ la gɔbega dola nɛŋa bɔba wa'ana yehe Kiriat Baal n de Kiriat Yearim n de Yudadoma teŋa. Nɛŋa bɔba beene n bala. 15 Gɔbega beene la me pɔhɛ la Kiriat Yearim yeŋa ha nɛŋa tontɔɔ wa'ana yehe Neptoa Bulehen la. 16 Beene la ze'ele la bilam zulige sige ta paɛ zoore se'ere n tɔ Ben Hinom Bɔn'ɔn la, Arepaim paberɛ la zuɔ bɔba la. De ze'ele bilam doohe Hinom bɔn'ɔn la sige Yebus teŋa gɔbega zuluŋa la, tare ta paɛ En Arogel. 17 De ze'ele la bilam ŋmɛregɛ keŋɛ zuɔ ta paɛ En Semes tole Gelilot tɔɔra teŋsɛka te ba yi'ira Adumim Tɔlega, ze'ele bilam sige Areuben Dayɔa Bohan Kugure la zen'an. 18 De tare bala ta paɛ zuluŋa sɛka n boe Bet Arabah zuɔ la sige Arabah zuluŋa la poan. 19 De ze'ele bilam sige Bet Hogla zuɔ zuluŋa la wa'ana yehe Yaarom Mɔgɔrɛ la zuɔ bɔba Yordan Kolaa la nɔɔrɛn gɔbega. Gɔbega beene n bala. 20 Yordan Kolaa la n de ba dapɔya beene. Beena ana n beem Benyamin yizuo sɔ'ɔlom la zan'an.
21 Benyamin yizuo la, ba yire yire n to'e teŋse'ehe te se dɛna ba sɔ'ɔlom n wana: Yeriko la Bet Hogla la Emek Keziz la 22 Bet Arabah la Zemaraim la Betel la 23 Avim la Parah la Oprah la 24 Kepar Amoni la Opni la Geba. Se dela teŋkanra pia la seyi' la se teŋbibihe. 25 Gibeon la Aramah la Beerot la 26 Mizpa la Kepira la Moza la 27 Arekem la Irpeel la Tarala la 28 Zela la Haelep la Yebusdoma teŋa la n de Yerusalem la Gibea la Kiriat dela teŋkanra pia la senaahe, la se teŋbibihe. Benyamin sɔ'ɔlom en bala tɔnrɛ bo a yiya.