Ge Gibeondoma bɔta te ba pan'ahɛ Yosua
9
1 Nadoma sɛba woo n boe Yordan nɛŋa bɔba la n ta wom yele ana wa la, sɛba woo teŋhe n boe zɔya zuto la nɛŋa bɔba zuluŋa la Mɔgɔkantɛ nɔgbɛman la poan ta paɛ Lebanon, Hitidoma la Amoridoma la Kanaandoma la Perizidoma la Hivdoma la Yebusdoma nadoma, 2 ba naɛ taaba te ba zabɛ la Yosua la Israel nɛreba la zan'an.3 Ge Gibeon teŋa nɛreba n ta wom Yosua n eŋɛ Yeriko la Ai teŋhe se'em la, 4 te Gibeondoma bɔta te ba pan'ahɛ Yosua. Ba maahom wo ba tom ba mɛ la, lagahɛ bɔra la daam talahe kɛgehe n aanhom bobe pagelɛ ba bonhe zuo wa'an na. 5 Ba pire tagara kɛgehe se'a n di ge kɔ' te ba tomehe tomehe ge yɛ futo en aanhom. Te ba boroboro la zan'an ku'e ge piinlom. 6 Te ba wa'ana paɛ Yosua tiiheŋɔ, Gilgal poan, yele en la Israel nɛreba yeti, Tomam ze'ele la zen'an n zaan na te ya eŋɛ nɔɔrɛ la to. 7 Te Israel nɛreba la soke Hivdoma wa yeti, Daanse'ere ya teŋa la han lɛm ka'lam. Tomam wan eŋɛ la wane eŋɛ nɔɔrɛ la ya? 8 Te ba yele Yosua yeti, Tomam dela ho yamehe. Te Yosua lebehe soke ba yeti, Yamam dele bane, ze'ele la bɛ na? 9 Te ba lebehe yeti, Ho yamehe wa ze'ele la teŋsɛka n zaan wa'an la Na'ayenɛ ho Yenɛ la yu'urɛ kantɛ wa zuo. Tomam wom a yele la sɛla woo te a eŋɛ Mizraim teŋa poan 10 la sɛla woo te a eŋɛ Amori nadoma bayi' n boe Yordan dapɔya la, Hesbon teŋa naba Sihon la Basan teŋa naba Og n sɔna Astarot teŋa. 11 Bala te to keendoma la nɛreba la zan'an yeti to tare lɔgɔtona na po'ohɛ ya ge yele ya te tomam dela ya yamehe te ya eŋɛ nɔɔrɛ la to. 12 To boroboro wa dene la boroboro tuluga te to tara dita ge kena na ge nya behɛ ya aŋa piinlom ge ku'e se'em. 13 To daam talahe wa me kɔ'ɔn dene la bonpaala zaŋa ge nananawa, behɛ ya ba pon'ɛn aanhom se'em. To lɔgɔrɔ wa la to tagara wa daa kɔ'ɔn dɛna la bonpaala zaŋa, ge sɔrɔɔ woko kenɛ la n bahɛ te bana zan'an aanhom wa. 14 Te Israel nɛreba la beha la ba lɔgɔrɔ la ge ka soke Na'ayenɛ behɛ. 15 Te Yosua biŋe nɔɔrɛ la ba te a wan bahɛ te ba vɔna, te Israel nɛŋadoma la pa' de poore la nɔpɔtɛ.
16 Ban eŋɛ nɔɔrɛ la Gibeondoma wa ba'ahɛ la, dabeha atan' daarɛ te Israeldoma wona te ba teŋa la ka zaan la ba. 17 Te Israeldoma maahom yehe, wa'ana na paɛ ba teŋhe la n de Gibeon la Kipira la Beerot la Kiriat Yearim dabeha tan' daarɛ. 18 Ge Israeldoma ka ta'an zabɛ la ba, ba keendoma la n daa pɔ' nɔɔrɛ la ba, Na'ayenɛ Israel Yenɛ yu'urɛ poan, la zuo. Te nɛra woo nya nyɔna keendoma la, 19 ge keendoma la zan'an me lebehe yele ba yeti, Tomam pɔ' la nɔɔrɛ la ba Na'ayenɛ Israel Yenɛ yu'urɛ la poan. Bala to kan ta'an kalom ba zina wa. 20 Tomam wan eŋɛ ba se'em dela: to wan bahɛ ba te ba vɔna ge da kɔ' te nɔpɔtɛ la te la bahɛ te sunsunyiim sige te zuo na. 21 Ge ba le pa'ahɛ yeti, Te wan bahɛ te ba vɔna ge bahɛ te ba dɛna dɔɔŋmateba la koziireba bɔ'ɔra Israel nɛreba la zan'an. Te ba de kɔ' keendoma nɔpɔtɛ la.
22 Te Yosua lagahɛ Gibeondoma wa na soke ba yeti, Bene te ya pa'ahɛ to yeti yamam boe la teŋsɛka n zaan, te yamam boe la teŋsɛka en pon ka nyɔna la to, ge mina te ya pon ka zaan, la to? 23 Woŋerɛ boe ya zuo ya kan malom vo'ohe ya ŋmata dɔɔrɔ, dɛna ko'om ziireba bo Na'ayenɛ yire wa. 24 Ba lebehe Yosua yeti, Ba yele tomam ho yamehe wa mɛ te Na'ayenɛ ya Yenɛ n daa bo a yameŋa Moses nɔɔrɛ se'em, te a dekɛ teŋa wa zan'an eŋɛ ho nu'uhen se'em. Ge la a bahɛ te nɛresɛba n zin' se poan mɛlom se'em. Bala dabeem tare tomam la ho, to vom wa zuo. Bala te tomam eŋɛ bala la. 25 Tomam nan boe la ho nu'uhen. Eŋɛ to hom behɛ te sɛla ane soŋa bo ho te ho eŋɛ. 26 Yosua n fan' ba se'em Israel nɛreba la nu'uhen bahɛ te ba ka ko' ba en bala. 27 De daarɛ mea te a bahɛ te Gibeondoma wa dɛna dɔɔŋmateba la koziireba bo Israeldoma la zan'an la Na'ayenɛ kaanbegɔ zen'an n boe zen'sɛka te Na'ayenɛ wan loe. Gibeondoma n bala, tara tara zina na.