Yosua 6

1 Yeriko teŋa nayahe kɔ'ɔn yu' la kaŋkaŋe Israeldoma wa zuo. Nɛra ka yehere, nɛra me ka kɛn'ɛre na. 2 Te Na'ayenɛ yele Yosua yeti, Behɛ, n dekɛ Yeriko teŋa eŋɛ la ho nu'uhen la ka nadoma la ka pɛɛntɛɛnreba zan'an. 3 Hom la ho pɛɛntɛɛnreba la yen ne keŋɛ ta kae teŋa la boyena. Ete ya bala ta paɛ dabeha ayoobe. 4 Ne bahɛ te malemadoma bayopɔe dekɛ piihe iila tentana bɔna nɔbiŋere daka la nɛŋa. Dabeha ayopɔe daarɛ, kae teŋa la sugumnɔɔren boyopɔe, ge te ba pɛɛbera tentana la dɔla. 5 Ho han ta wom te ba peebe tentana la paŋa paŋa ba'ahɛ, bahɛ te nɛra woo voole kpimm, ge Yeriko dangoone la wan lu, la me han eŋɛ bala, nɛra woo kɔ'ɔn kɛn'.

6 Te Nun dayɔa Yosua yi malemadoma la na yele ba yeti, Ɔnbege ya Na'ayenɛ nɔbiŋere daka la zi ge bahɛ te malemadoma bayopɔe zanla tentana ayopɔe bɔna ka la nɛŋa. 7 Ge te a yele nɛreba la me yeti, Tole ya keŋɛ ta kaɛ teŋa wa la sɛba n yɛ zaberɛ lɔgɔrɔ la bɔna Na'ayenɛ nɔbiŋere daka la nɛŋa.

8 Yosua n pa'alɛ nɛreba wa ba'ahɛ la, malemadoma bayopɔe la n zanle tentana Na'ayenɛ nɛŋan la tole la nɛŋa na, pɛɛbera ba tentana la, te Na'ayenɛ nɔbiŋere daka la tagalɛ ba poore. 9 Te sɛba n yɛ zaba lɔgɔrɔ la me bɔna sɛba n peebere tentana la nɛŋa, te basɛba me yee poore dɔla nɔbiŋere daka la. Saŋkana woo la te tentana la peebere mɛ. 10 Yosua daa bo nɛreba la nɔɔrɛ yeti, Da sakɛ ya pɛɛntɛɛnrɛ baaŋa. Da voole ya. Da pon yele ya sɛla gura daanse'ere daarɛ te n wan yeti, ya woole te ya woole. 11 Bala, daarɛ woo a ne bahɛ te ba zi Na'ayenɛ daka la ta kae teŋa la boyena mum ge lebe ba tiiheŋɔ zen'an la ta gan'arɛ yu'uŋɔ.

12 Yiimbeere te Yosua ihege bolika yu'uŋyu'uŋɔ, te malemadoma la dekɛ Na'ayenɛ daka. 13 Te malemadoma bayopɔe la n tara tentana ayopɔe la tole bɔna Na'ayenɛ daka la nɛŋa kena ge pɛɛbera ba tentana la. Te sɛba n yɛ zaba lɔgɔrɔ la bɔna ba nɛŋa, te basɛba me yee pooren dɔla Na'ayenɛ daka la te ba kena ge pɛɛbera tentana la. 14 Dabeha ayi' daarɛ te ba le ta kae teŋa la boyena mum ge lebe ba tiiheŋɔ zen'an la. Ba eŋɛ la bala dabeha ayoobe.

15 Dabeha ayopɔe daarɛ la ba ihege bolika keŋɛ ta kae teŋa la bala mea boyopɔe. Daanden daarɛ mea ma'an te ba kae teŋa la sugumnɔɔren boyopɔe. 16 Kaarɛ boyopɔe poan la, malemadoma la n ta peebe ba tentana la paŋa paŋa ba'ahegɔ poan la, Yosua bo nɛreba la nɔɔrɛ yeti, Woole ya! Na'ayenɛ dekɛ teŋa wa bo ya mɛ! 17 Teŋa wa la sɛla woo n boe ka poan la dela ya sagom ba bo Na'ayenɛ. Arahab se'em n de yiyɛa la ma'an la sɛba woo n kɛn'ɛre la en a yire la poan la ma'an te ya wan bahɛ. Se'ere n sɔe la enŋa n daa sogɛ vɛɛhereba la te to daa tom na la. 18 Gu ya mɛhe lɔgɔseto te ya wan sagom la poan. Da loe ya lɔkɔ to poan la ya tare sagaŋɔ na bo ya mɛhe. Ya han eŋɛ bala, ya wan ganlom Israel tiiheŋɔ zen'an la, te nɔyalegerɛ sige ka poan na. 19 Sanlenpeelega la sanlema la nyɔgom lɔgɔrɔ la kuto lɔgɔrɔ la woo la dela Na'ayenɛ denɛ ge wan dekɛ pa'ahɛ la Na'ayenɛ lɔgɔrɔ biŋere zen'an la poan.

20 Tentana la n ta peebe paŋa paŋa la, nɛreba la voole mɛ. Tentana la n peebe mɛ la nɛreba la n voole kpim la, teŋa la dangoone la me lu te boraa woo kɛn' ka poan ta nyaŋɛ ka. 21 Ba dekɛ ka bo Na'ayenɛ, kɔrom bonvɔa woo n boe ka poan, boraahe la pɔgɔhe la bonbibihe la bonkoroba la nii la piihe la bonhe. 22 Te Yosua yele vɛɛhereba bayi' la n daa wa'ana doohe veehe teŋa la behɛ la yeti, Kɛn' ya yiyɛa la yire ta tare enŋa la nɛresɛba woo n de a nɛreba la yehe na wo yan daa pɔ' nɔɔrɛ la en se'em la. 23 Te ba kɛn' ta tare Arahab la a ma la a sɔ la a keendoma la la nɛresɛba woo n de a nɛreba la, yehe na. Ba tare a nɛreba la zan'an yehe me na bo ba zen'an n boe Israeldoma tiiheŋɔ zen'en la kenkɛleŋa ha. 24 Ba nya nyɔ' teŋa la zan'an la sɛla woo n boe ka poan. Ge ba dekɛ sanlenpeelega la sanlema la nyɔgom la kuto lɔgɔrɔ ta pa'ahɛ Na'ayenɛ lɔgɔrɔ biŋere zen'an la poan. 25 Ge Yosua bahɛ Arahab la a yire la a nɛreba woo. Se'ere n sɔe, enŋa n daa sogɛ vɛɛhereba la te Yosua tom ba te ba veehe Yeriko teŋa behɛ la. Bala te a bɔna la Israeldoma tara tara la zina. 26 Bala ma'an te Yosua pɔ' nɔɔrɛ yeti, Woŋerɛ wan woŋɛ hom se'emdaana n ze'ele te ho malom mɛ Yeriko teŋa wa. A dayɔkeema han biŋe ka ɛnberɛ, a wan ki. Ge a dayɔbila han mɛ ka nayahe, a mi wan ki. 27 Ge Na'ayenɛ daa boe la Yosua la bala te a yu'urɛ yehe teŋa la zan'an poan.