Yosua 4

Ɔnbɛ kuga pia la ayi' kolaa la teŋasoka

1 Israel nɛreba la zan'an n ta yakɛ Yordan Kolaa la ba'ahɛ la, te Na'ayenɛ yele Yosua yeti, 2 Loohe boraahe pia la seyi' Israel buuri la woo poan boraa kayema. 3 Yele ba te ba ɔnbɛ kuga pia la ayi' kolaa la teŋasoka, zen'an te malemadoma la daa zi nɔbiŋere daka la zɛ'a ge te ba doohe yakɛ la, la ba tare a keŋɛ zen'an te ba yeti ba gan'anrɛ zina yu'uŋɔ la.

4 Te Yosua daa yi' nɛra pia la bayi' la te a loohe ba Israel buuri pia la ayi' la poan la wa'an a zen'en na, 5 yele ba yeti, Tole ya Na'ayenɛ ya Yenɛ daka la nɛŋan ha Yordan wa teŋasoka ha la. Te ya ayena ayena ɔnbegɛ kugure wo Israel buuri la kanlɛ n zone se'em la, 6 te la dɛna danlehom bo ya. Te pooren ya kɔma han ta soke ya yeti, kugu'ana wa pa'alɛ la bene? 7 yele ba yeti, to yuun ta ziira la nɔbiŋere daka la te to yakɛ Yordan Kolaa la, ko'om la yuun gu' zɛ'a ge te to nɛ' kɛ'ɛŋa tole. Kugu'ana wa wan dɛna tɛɛnhegɔ kuga bo Israel nɛreba saŋa woo.

8 Te Israeldoma wa eŋɛ Yosua n bo ba nɔɔrɛ se'em la. Ba ɔnbɛ kuga pia la ayi' wo Israel kanlɛ n de se'em la Yordan Kolaa la teŋasoka dooe na wo Na'ayenɛ n bo Yosua nɔɔrɛ se'em la. Ba zi a keŋɛ ba gan'an zen'an la ta biŋe. 9 Te Yosua guge kuga pia la ayi' la te ba zi a Yordan Kolaa la teŋasoka zen'sɛka te malemadoma la zi nɔbiŋere daka la zɛ'a la biŋe bɔberɛ yenɛ, te a kelom gan'an bini la zina.

10 Malemadoma la n zi nɔbiŋere daka wa zɛ'a la kolaa la teŋasoka la bala, te nɛreba la ta tom sɛla woo te Na'ayenɛ bo en nɔɔrɛ te a tom la ba'ahɛ, wo Moses n bo Yosua a nɔɔrɛ se'em la. Te nɛreba la eŋɛ kalam kalam tole, 11 ge ba zan'an n yakɛ ba'ahɛ la, Na'ayenɛ daka la malemadoma la n ziire ka la nya yakɛ ha, te nɛreba la zɛ'a ge beha ba. 12 Te Areuben la Gad la Manase yizuo koyema sɔɔnrɔ la bobe ba zaberɛ lɔgɔrɔ yakɛ Israel nɛŋa ha wo Moses n pa'alɛ ba se'em la. 13 Boraahe wo tuha pihinaahe n bobe ba zaba lɔgɔrɔ n yakɛ Yordan Kolaa wa bɔna Na'ayenɛ nɛŋan ta kɛn' Yeriko paberɛ la poan te ba zabɛ. 14 Te Na'ayenɛ zɛnkɛ Yosua Israeldoma zan'an ninin de daarɛ te ba pɔhɛ de daarɛ la na'aha Yosua a vom dabeha zan'an poan wo ban daa na'ahe Moses se'em la.

15 Te Na'ayenɛ yele Yosua yeti, 16 Bo malemadoma la n ziire nɔbiŋere daka la nɔɔrɛ yeti ba dooe Yordan Kolaa la poan na. 17 Te Yosua bo malemadoma la nɔɔrɛ yeti, Dooe ya Yordan la poan na. 18 Te malemadoma wa ze'ele kolaa la poan dooe na ziira Na'ayenɛ nɔbiŋere daka la. Ba na'arɛ n ta kalena doone na la, te Yordan Kolaa ko'om la pon gbi' lagom taaba le perɛ paahom uura wo bom pon ne uura se'em la.

19 Yuunɛ pɔhega ŋmarega dabeha pia daarɛ, nɛreba wa yakɛ Yordan Kolaa ta tiihom Gilgal teŋa la n boe Yeriko dapɔya bɔba la poan. 20 Te Yosua dekɛ kugupia la ayi' la te te ba ɔnbɛ a Yordan Kolaa la poan dooe na la sɛ a ze'ele Gilgal teŋa la poan. 21 A yele Israel nɛreba la yeti, Pooren ya yaahe han ta sɔkera ba sɔdoma yeti, kuga ana pa'ale la bem? 22 yele ya ba yeti, Israeldoma yuun nɛ la kɛ'ɛŋa poan yakɛ Yordan Kolaa wa. 23 Se'ere n sɔe Na'ayenɛ ya Yenɛ la yuun gu' Yordan Kolaa ko'om la mɛ ge te to yakɛ. Na'ayenɛ ya Yenɛ la yuun eŋɛ Yordan Kolaa wa wo n yuun eŋɛ Mɔgɔ Mɔlega poan se'em la, n yuun gu ko'om la ge te to nɛ kɛ'ɛŋa yakɛ la. 24 A eŋɛ wana te saala woo n vɔe teŋparɛ wa zuo baŋɛ te Na'ayenɛ paŋa zo'e gaŋɛ mɛ ge te yamam me wan zɔta Na'ayenɛ ya Yenɛ la saŋa woo.