33
1 Kan'an kana te Yenɛ nɛra Moses daa kan' bo Israeldoma ge ki. 2 A yeti, Na'ayenɛ ze'ele la Sinai Zoore zuo na, le nɛɛ a mɛŋa bo to Seir Zoore zuo, le nɛɛ a mɛŋa Paran Zoore la zuo. Le ze'ele a soŋoreba zo'e zo'e la poan nɛɛ zoore la zuɔ nu'o bɔba. 3 Ho seren nɔŋɛ nɛreba wa, nɛresɛba woo n de toolom nɛreba la boe la ho nu'uhen. Ba wan pɔnta na'ma la hom nɛŋan, ge tɔ'ɔha yɛla ho zen'an, 4 doohe pa'alegɔ la te Moses dekɛ bo ba te ko dɛna Yakob buuri sɔ'ɔlom lɔkɔ la. 5 Enŋa daa de Yesuruna naba, la nɛreba keendoma n lagahɛ la Israel buuri la poan.6 Bahɛ te Areuben vɔna, ge da ki bii a nɛreba pɔ'ɛ.
7 N yele Yuda yele se'em wana. Na'ayenɛ, kelehe Yuda kaahega ge tare en lebe a nɛreba zen'an na. A mɛŋa nu'uhe te a tara tɛ'ɛla a mɛŋa. Soŋɛ en a diŋdoma poan.
8 A yeti Levi yele ti, Ho Tumim la Urimb daa boe se'em te hom zɔ a ninbɔn'ɔn. Hom makɛ en la Massa teŋa behɛ, zɛnkɛ la en Meriba ko'om la poan. 9 A daa yeti a sɔ la a ma yele ka pakɛ en. A ka behere a keendoma bii a mɛŋa kɔma, ge a dole la hom yelehom la ge gu'ura hom nɔbiŋere la. 10 A pa'alɛ Yakob ho yelehom la ge pa'alɛ Israel ho pa'alegɔ la. A tare ko'ɛnka la zɛ'a ho nɛŋan ge tara nyɔ'an bo'olom kena ho kaanbegɔ daka la zuo na. 11 Na'ayenɛ, kan' bahɛ a yam toonɛ woo poan te ho nini tegɛ la a nu'uhe tooma zan'an. Sagom sɛba woo n ihege te ba zabɛ la en. Ŋmɛ a diŋdoma la tara tara te ba ta ba'ahɛ.
12 A yeti Benyamin yele ti, Bahɛ te hom Na'ayenɛ suunre n nɔŋɛ se'em wa gan'an ho nu'uhen vɔ'ɔha fai. Ho wan gura en daarɛ woo. Se'em te Na'ayenɛ nɔŋɛ la yage la a bɔgɔrɔ zuo vɔ'ɔha.
13 A yeti Yosef yele ti, Na'ayenɛ wan kan' bahɛ a teŋa la zuo bahɛ te mɛgelom kanra wan zɛ'ɛta saazuo luta la ko'om sebo n gan' teŋa la teŋa ha. 14 Wontɛɛŋa wan nɛɛ makera hom bote ka se'em, te ŋmarehe me pɛɛligira wo hom bote ka se'em, 15 la zɔya lɔgɔsonɔ la zobibihe zuto dia maalegɔ 16 la teŋparɛ wa zuo dia maalegɔ. Ge te se'em n daa boe tuntuo la n dite bugum la poan la ninbɔn'zɔrɛ la wan bɔna ho zuo. Bahɛ te som bona zan'an sige Yosef zuo, a perɛ se'em n de nabia a sɔɔnrɔ poan wa nu'uhe. 17 Kpe'eŋo poan, a ane me woo lɔle deeŋa la, a eela ane wo mɔen nahɔ eela la. A wan dekɛ la aŋa kpegehɛ teŋhe, ta ta' teŋse'ehe zaan bɔna teŋparɛ wa ba'ahegɔ beene ha la. Epraimdoma tuha pia pia la ane la bala, te Manasedoma tuha tuha la me ana bala.
18 A yeti Zebulun yele ti, Zebulun, nyeena ho yɛhega woo poan, ge hom Isakar me nyeena ho kɛn'an zen'an la poan. 19 Ba wan yehe teŋa la poan keŋɛ zoore zuo ta kaanbɛ tontɔɔ kaanbegɔ. Ba wan ɛ' ko'om poan lɔgɔsonɔ la lɔgɔsonɔ seto n sogɛ tentɔnɔ bin'ihigo poan.
20 A yete Gad yele ti, Kan'an wan bɔna hom nɛra se'em n yalegɛ Gad sɔ'ɔlom pa'ahɛ. Gad boe la bilam wo gbegenɛ la aanhena bɔgɔrɔ la zuto. 21 A loe la teŋsoŋa bo a mɛŋa, nɛŋadaana tɔntɛ la dekɛ biŋe la enŋa. Nɛreba la nɛŋadoma ne han lagahɛ, a ne tom Na'ayenɛ potɛn'ɛrɛ la gankerɛ se'ere woo te Na'ayenɛ tara bo Israeldoma.
22 A yeti Dan yele ti, Dan dela gbegenbila zɛ'ɛta Basan teŋa poan yɛhera na.
23 A yeti Naptali yele ti, Naptali boe mɛ la Na'ayenɛ ninbɔn'zɔrɛ te Na'ayenɛ kan'an perɛ en. A sɔ'ɔlom wan bɔna la mɔgɔrɛ la gɔbega nɛŋa bɔba la.
24 A yeti Aser yele ti, Kan'an wan ba' bɔna Aser dayɔɔhe zuo. Bahɛ te a keendoma zɔta a ninbɔn'ɔn ge bahɛ te a tara kaam pɛɛra a na'ma. 25 Ho nayahe wan dɛna kuto la nyɔgom zaŋa te ho paŋa bɔna ta paɛ ho dabeha ba'ahegɔ.
26 Se'em ka boe ana wo Yesurunc Na'ayenɛ wa, se'em n boe saazuo te a soŋɛ ya ge dɛna saŋgbana zan'an paŋadaana. 27 Vom Zan'an Yenɛ la n de ho sokazen'en ge a nu'uhe boe la ho teŋa tɛ'ɛla ho. A wan dige ho diŋdaana te a zɔ' ho nɛŋan te a tanhera yeti, sagom en. 28 Israel wan kɔ'ɔn bɔna la fai ma'an poan. Yakob kolega la boe la fai dia la daam paalom teŋa la poan zen'an te mɛgelom kanra zɛ'ɛta saazuo luta ka poan la. 29 Kan'an bɔna hom, Israel, wa zuo. Ane n ane wo hom, dɛna nɛreba te Na'ayenɛ mɛŋa fan' ba bahɛ? Enŋa n de ya pɛɛn tɛ'ɛlega la ya soŋora ge dɛna ya nyeema so'a. Ya diŋdoma wan gbe'era luta ya nɛŋan te ya nɛɛra ba kaanbegɔ zen'enhe la poan.