N nan dela yuuma kɔbega la yuum pihiyi' wa
31
1 Te Moses nya yehe na yele Israel nɛreba la zan'an yeti, 2 N nan dela yuuma kɔbega la yuum pihiyi' wa, n me ka le tara paŋa wan kelom bɔna ya nɛŋa. Na'ayenɛ me yele mam yeti n kan yakɛ Yordan wa. 3 Na'ayenɛ ya Yenɛ la mɛŋa wan bɔna ya nɛŋa yakɛ la ya. A wan sagom teŋse'ehe n boe ya nɛŋan la nɛreba ge te ya sɔe ba teŋhe la sɔna. Yosua me wan lagom bɔna ya nɛŋa te ya yakɛ wo Na'ayenɛ n yele se'em la. 4 Na'ayenɛ wan eŋɛ ba wo n eŋɛ Sihon la Og n de Amori teŋhe nadoma la te a daa sagom ba la ba teŋhe la se'em la. 5 Na'ayenɛ wan dekɛ ba eŋɛ ya nu'uhen te ya eŋɛ ba zan'an wo mam bo ya nɔɔrɛ te ya eŋɛ ba se'em la. 6 Kpeŋe ya mɛhe ge tara potɛn'ɛrɛ. Da zote ya dabeem bii ya paleŋa ɛngera la ba. Se'ere n sɔe Na'ayenɛ ya Yenɛ la ye' mɛ la ya. A kan malom bahɛ ya bii a zagahɛ ya. 7 Te Moses nya yi' Yosua na ze'ele Israel nɛreba la zan'an nɛŋan yele en yeti, Kpeŋe ho mɛŋa ge tara potɛn'ɛrɛ. Se'ere n sɔe hom wan tare nɛreba wa ta kɛn' teŋsɛka te Na'ayenɛ pɔ' nɔɔrɛ la ya sɔyaabdoma te a wan dekɛ bo ba la ge tɔnrɛ ka bo ba te ka dɛna ba sɔ'ɔlom. 8 Na'ayenɛ mɛŋa boe ho nɛŋa. A wan bɔna la ho. A kan malom bahɛ ho bii a zagahɛ ho. Da zɔta dabeem bii ho giinla kɔ'ɔhɛ.9 Te Moses golehɛ pa'alegɔ wa bo Levidoma n de malemadoma la n ziire Na'ayenɛ nɔbiŋere daka la Israel keendoma la zan'an. 10 Te Moses bo ba nɔɔrɛ la yeti, Yuuma ayopɔe woo ba'ahegɔ poan, sama bahega saŋa la, se'em ma'an te ya dɛ'ɛna Pagahe Tin'a De'eŋɔ la, 11 Israel buuri la zan'an han ne lagahɛ Na'ayenɛ ya Yenɛ la nɛŋan na zen'sɛka te a wan loe la poan na, ne kaanlɛ pa'alegɔ wa bahɛ ba woo toban. 12 Ne lagahɛ nɛreba la zan'an, boraahe la pɔgɔhe la kɔma la saama woo n lagom kɛn'ɛra ya teŋhe la poan la, te ba me wa'ana wom ge zamehɛ zɔta Na'ayenɛ ya Yenɛ la ge dɔla pa'alegɔ wa yɛla la soŋa. 13 Ba kɔma sɛba n ka mi' pa'alegɔ wa yɛla la kelehe ge zamehɛ zɔta Na'ayenɛ ya Yenɛ la ya vom poan zan'an teŋsɛka te ya yakera Yordan te ya ta sɔe ka sɔna wa poan.
14 Na'ayenɛ yele Moses yeti, Ho kum dabeha pɔnre. Yi' Yosua, te hom la enŋa wa'an Sogorɛ la poan na, te n tom en. Te Moses la Yosua wa'an Sogorɛ la poan.
15 Te Na'ayenɛ nɛɛ a mɛŋa Sogorɛ la poan dɛna bugum saŋgbanɛ, te saŋgbanɛ la zɛ'a Sogorɛ la nɔɔrɛn. 16 Te Na'ayenɛ yele Moses yeti, Ho pɔnre te ho keŋɛ paɛ la ho sɔdoma vo'ohe wa, la me pon kan yuue la nɛreba wa n wan yaalɛ ba mɛhe bo teŋsaanhe se'ehe te ba yɛ'a kɛn'ɛra se poan wa baga la. Ba wan zagahɛ mam, ge kɔ' mam biŋe nɔse'ere la ba la. 17 De daarɛ, n wan eŋɛ suunre la ba zagahɛ ba ge yehe n nɛŋa ba poan ge te ba nyɛ sagaŋɔ. Sunsagaŋɔ zo'e zo'e la namehegɔ wan sige ba zuo. De daarɛ, ba wan sɔkera ba mɛhe yeti, dagɛ to Yenɛ la n ka boe la to la n sɔe te sunsagaŋɔ kona sigera nyɔkera to wa? 18 De daarɛ n wan yehe n nɛŋa ba poan. Se'ere n sɔe bama tom potoseko doohe la ban ŋmɛregɛ dɔla yena a se'a la. 19 Golehɛ yoonɛ wa bo ya mɛhe ge dekɛ dɛ pa'alɛ Israel buuri la zan'an te ba yoon dɛ te de dɛna seradaana, mam la yamam teŋasoka. 20 Mam han tare ba wa'an teŋsɛka n zote la iilom la seerom la poan la, teŋsɛka te mam biŋe nɔɔrɛ la pɔtɛ la ba sɔyaabdoma la poan la, te ba han ta dita tegera ge baha, ba wan ŋmɛregɛ dɔla baga kaanbera ge zagahɛ mam, kɔ' nɔse'ere te mam biŋe la ba la. 21 Sunsagaŋɔ la namehegɔ zo'e zo'e han ta sige ba zuo na, yoonɛ wa wan tɛɛn ba. Se'ere n sɔe la ba yaahe kan malom tamɛ yoonɛ wa. Mam pon daa mina ban lo ba sunya te ba tom se'em mɛ ge nya biŋe tare ba wa'an teŋsɛka te mam biŋe nɔɔrɛ la pɔtɛ wa poan na wa. 22 Te Moses golehɛ yoonɛ wa dekɛ dɛ pa'alɛ Israel nɛreba de daarɛ mea. 23 Te Na'ayenɛ bo Nun dayɔa Yosua nɔɔrɛ yeti, Kpeŋe ho mɛŋa ge tara potɛn'ɛrɛ ge hom de se'em wan tare Israeldoma ta kɛn' teŋsɛka te n biŋe nɔɔrɛ la pɔtɛ te n bo ba la poan. Mam mɛŋa wan bɔna la ho.
24 Moses n ta golehɛ pa'alegɔ yɛla wa pɔhega ta paara a ba'ahegɔ zan'an eŋɛ gɔŋɔ poan ba'ahɛ la, 25 a bo Levidoma la n ziire Na'ayenɛ nɔbiŋere daka la la nɔdena: 26 To'e ya Pa'alegɔ Gɔŋɔ wa, la ya dekɛ kɔ kpe'ele Na'ayenɛ ya Yenɛ la nɔbiŋere daka la poan. Ko wan bɔna la bilam dɛna seradaana bo ya. 27 Mam mi' yan de pobiregadoma se'em te ya toba kpa' se'em. Mam nya daa han tom vɔna ge bɔna la ya, te bire poore bahɛ Na'ayenɛ, mam han ki ya nya kan gaŋɛ bala. 28 Ya yizuto keendoma la ya kpɛ'ɛndoma la lagahɛ na te n tɔgɛ yele ana wa bahɛ ba toba poan, ge yi saazuo la teŋa wa te ba dɛna n seradoma, mam la yamam teŋasoka. 29 Mam mi' te mam han kɔ'ɔn ki ba'ahɛ, ya yeti ya ganlom mɛ ge ŋmɛregɛ ya mɛhe yehe sose'ere te mam bo ya nɔɔrɛ te ya dɔla la poan. Dabeha kene na te sunsagaŋɔ wan nyɔkɛ ya. Se'ere n sɔe la ya wan tona be'em Na'ayenɛ nɛŋan nyiihe a sunsunya la yan dekɛ ya nu'uhe maalɛ sɛla la. 30 Te Moses kaanlɛ yoonɛ la yɛla, pɔhega ta paɛ de ba'ahegɔ bahɛ Israeldoma la woo n lagahɛ na la toban.