Da tare be'em wa'an teŋsɛka te Na'ayenɛ ya Yenɛ la dekera bɔ'ɔra ya
24
1 Boraa han di' pɔga, te ka ka le ta ana en soŋa doohe la a nyɛ la se'ere n ka ane soŋa ka poan, golehɛ pɔgɔlebehegɔ gɔŋɔ bo ka sa'ɛ ka a yire poan, 2 te pɔka la n yehe a yire la poan la lebe ta ele, 3 te boraa kaŋa me ka ta bɔta ka ge golehɛ pɔgɔlebehegɔ gɔŋɔ bo ka sa'ɛ ka a yire poan bii se'ere kaŋa ki mɛ, 4 a se'ere sɛka n lebehe en yia te a keŋɛ ta ele ayema la da le di ka. Bala dela dɛngerɔ Na'ayenɛ nɛŋan. Da tare be'em wa'an teŋsɛka te Na'ayenɛ ya Yenɛ la dekera bɔ'ɔra ya te ka dɛna ya sɔ'ɔlom la poan.5 Boraa han nan di pɔka, ka da doohe keŋɛ pɛɛntɛɛnrɛ bii ba bo en toonse'ere. A bɔna yire fai yuunɛ deyena la a pɔga la te a nan di la te ka poorɛ pee.
6 Da dekɛ se'em n di ho sanɛ nɛɛrɛ bii nɛɛmbiŋa ta biŋe. Bala ane wo ho to'e la nɛra vom biŋe ho sanɛ la zuo la.
7 Se'em han le'ehɛ nyɔkɛ a Israel sɔɔn ta eta wo n wo da'aberɛ bii a koohe en mɛ, ko ya se'em n eŋɛ bala la. Foe ya be'em la ya poan.
8 Ho han tara iŋsagaŋɔ, ma'ɛn ho mɛŋa doohe Levidoma n de malemadoma la pa'alɛ ya se'em la. Ma'ɛn ya mɛhe doohe mam pa'alɛ ba se'em la. 9 Tɛnre yan yuun yehe Mizraim teŋa na sore la zuo la te Na'ayenɛ ya Yenɛ n yuun eŋɛ Miriam se'em.
10 Ho han dekɛ sɛla pengera ho sɔɔn, da kɛn' a yire ta to'e sɛla te a yeti a dekɛ bo ho ta yɔ ge to'e la. 11 Zɛ'a a zanɔɔren te se'em te ho pengera en la mɛŋa tare a lɔkɔ la yehe na bo ho. 12 Nɛra la han dɛna la naha, da bahɛ te a lɔkɔ la gan'anrɛ ho zen'an yiligɛ beere. 13 Tare a fugɔbega la ta bo en zanɔɔrɛ woo te a pila a mɛŋa ge tara popeelom la ho, te Na'ayenɛ ya Yenɛ la wan beha dɛ te de dɛna tontɔɔ toonɛ a nɛŋan.
14 Da pina nɛra te ho dekɛ te a dɛna taroma bii naha te a tona ho zen'en, a dɛna ho sɔɔn Israel buuri bii saana n lagom bɔna la ya teŋsɛka poan. 15 Bɔ'ɔra en a dabaherɛ yɔɔrɛ daarɛ woo zanɔɔrɛ. Se'ere n sɔe la a dela naha te bilam en dɛna a dia zen'an. Han dagana bala, a wan fabelɛ bo Na'ayenɛ de zuo, te la dɛna be'em bo ho.
16 Da ko ya sɔdoma ba kɔma be'em zuo bii ya ko kɔma ba dɔgɔreba be'em zuo. Nɛra woo kiiri la a mɛŋa be'em zuo.
17 Da faanre ya saana bii keebehe boorɔ, bii ya to'e pɔkɔɔnrɛ fuo ta biŋe ha sanɛ zuo. 18 Tɛnre ya te ya yuun dela yamehe Mizraim teŋa poan te Na'ayenɛ ya Yenɛ la yɔ to'e bini na. Bala te mam bɔ'ɔra ya nɔdena wa. 19 Ya han buna ya dia ya va'am poan ge zoohe basɛba, da le tagehɛ sɛla te ya ka nyɛ la. Bahɛ bama bo saana la keebega la pɔkɔɔnrɛ, te Na'ayenɛ la n de ho Yenɛ la kan' bahɛ ho nu'o tooma woo poan. 20 Ho han kpa'aha ho tii wɔla ho tiihe dia va'am poan, da lebe tagehɛ. Bahɛ sɛla n yee la bo saana la keebega la pɔkɔɔnrɛ. 21 Ho han gɔ'ɔha ho tiihe wɔla, da lebe tagehɛ. Bahɛ bama bama bo saana la keebega la pɔkɔɔnrɛ. 22 Tɛnre ya te ya yuun dela yamehe Mizraim teŋa poan. Bala te mam bɔ'ɔra ya nɔdena wa.