Behɛ ya mɛhe soŋa soŋa
8
1 Behɛ ya mɛhe soŋa soŋa ge doohe nɔse'a woo te n bɔ'ɔra ya zina wa, ge bala te ya wan bɔna ge wi'ɛ, ge ta'an ta fan' teŋsɛka te Na'ayenɛ ya Yenɛ la biŋe nɔɔrɛ la pɔtɛ bo ya sɔyaabdoma la. 2 Tɛnre ya Na'ayenɛ ya Yenɛ la n daa tare ya se'em yuuma pihinaahe pɔgɔtia wa poan, te a bahɛ te ya sigehe ya mɛhe la. A magahera ya mɛ te a behɛ sɛla n boe ya sunya poan la. A bote a behɛ nya ya wan doohe enŋa n bo ya a pa'alegɔ se'em la bii ya kan doohe. 3 A bote ya sigehe la ya mɛhe zuo te a bahɛ te kom sige ya zuo ge te a diihe ya la *manna dia, sɛla te yamam bii ya sɔdoma ka tabelɛ mina.a Te a pa'alɛ ya yeti, Asaala ka vɔe la boom ma'an, ge a vɔe mɛ la yelese'ere woo n ze'ete Na'ayenɛ nɔɔrɛn na. b 4 Ya futo daa ka aanhom, bii ya na'ma fuuhom yan keŋɛ yuuma pihinaahe la. 5 Bala, mini ya ya sunya poan te nɛra n dɔnlegere a bia toberɛ se'em la, bala mea te Na'ayenɛ ya Yenɛ la me wan dɔnlegɛ ya toberɛ. 6 Tɛnre ya Na'ayenɛ ya Yenɛ la n bo a nɔɔrɛ se'em la, ge na'aha en. 7 Na'ayenɛ ya Yenɛ la tare ya yɛ'a kɛn'ɛra la teŋsoŋa poan na. Teŋsɛka te ka bɔgɔhe perɛ la ko'om. Teŋsɛka n perɛ la ko'nini, te ka kolaahe ko'om zɔta uura ba bɔn'ɔrɔ la zɔya zuto. 8 Teŋsɛka te ki' la mui la tiihe wɔla la kenkama la *pomegranate la kaam tiihe la te seerom bɔna ka poan. 9 Teŋsɛka te dia ka tara nɔŋɔ, zen'an te sɛla sɛla yele kan daam ya. Ka dela teŋsɛka te ka tanhe tara kurugo, te ka zɔya zuto tara kuto mɔlɔgɔ. 10 Ya han ta bɔna bini dita tegera, ya pɛngɛ Na'ayenɛ ya Yenɛ la soŋa, la enŋa n bo ya teŋsoŋa sɛka taaba wa.11 Behɛ ya soŋa la ya da tamɛ Na'ayenɛ ya Yenɛ la yele bii ya koŋe ya doohe a nɔya la bii nɔze'elego la bii malema se'a woo te n yɛta bɔ'ɔra ya zina wa. 12 Ya han ka baŋɛ soŋa, se'em ma'an te ya ta nyɛta dita tegera bii mɛ yikanra soma kɛn'ɛra la, 13 te ya nii la piihe wi'ɛ kekeko, te ya sanlema la ligiri malom pa'ahera, te sɛla woo te ya tara kɔ'ɔn malom pa'ahera la, 14 pa'alɛ n mɛŋa wan kɛn' ya sunya, ge la wa bahɛ te ya tamɛ ya Na'ayenɛ ya Yenɛ fan' ya yehe Mizraim teŋa poan na la, zen'an te ya yuun dɛna da'aba la. 15 A yuun tare ya la bala tɛbe tɛbe doohe pɔgɔtia zen'kantɛ la n daa de nyɔnpɔnhega zen'an te zankanhe la naŋhe perɛ ka poan, te ko'om la fiin wa yuun ka bɔna ka poan la. A yuun bahɛ te ko'om ze'ele la taŋa poan yehe na te ya nyu', 16 ge bahɛ te *manna dia ze'ele saazuo ka'aha na te ya obe tegɛ pɔgɔtia teŋa la poan, sɛla te ya sɔdoma mɛhe ka tabelɛ nyɛ. A yuun bote ya sigehe la ya mɛhe zuo te a makera ya beha, ge mina a suunren te ba'ahegɔ zan'an, sɛla woo wan ana soŋa bo ya. 17 Ya han ka baŋɛ soŋa, ho ta'an yele ho mɛŋa yeti, Mam mɛŋa murugere n bo mam lɔgɔtona wa zan'an. 18 Tɛnrɛ Na'ayenɛ ya Yenɛ la. Enŋa n bo ho paŋa te ho tom nyɛ lɔgɔrɔ la. Te enŋa bahɛ te a nɔɔrɛ la te a biŋe bo ya sɔyaabdoma la pɔtɛ la wa'an sera na wo lan ane se'em zina wa. 19 Ya han daan ta tamɛ ya Na'ayenɛ ya Yenɛ wa yele, ge ŋmɛregɛ dɔla yena a se'a tona bɔ'ɔra a ge na'aha aŋa, n yeti ya zina wa te sagaŋɔ wan sige ya zuo na, 20 wo teŋhe se'ehe woo te Na'ayenɛ sagom se ya ninin se'em la, bala mea te a wan eŋɛ ya, ya han ka nam ya Na'ayenɛ ya Yenɛ la.