Yenɛ la dekɛ Basan teŋa naba Og la a pɛɛntɛɛnreba la zan'an eŋɛ to nu'uhen
3
1 Pooren te to le ŋmɛregɛ dɔla sore la yɛ'a tɔɔra Basan teŋa. Te Basan teŋa naba Og la a pɛɛntɛɛnreba zan'an maahom yehe na to'ohɛ to la pɛɛntɛɛnrɛ Edrei teŋa poan. 2 Te Na'ayenɛ yele mam yeti, Da zɔta dabeem la en. Mam pon deŋɛ dekɛ enŋa la a pɛɛntɛɛnreba la, la a teŋa la zan'an eŋɛ la ya nu'uhen. Eŋɛ ya en wo yan eŋɛ Amoridoma naba Sihon se'em la. 3 Te Na'ayenɛ to Yenɛ la dekɛ Basan teŋa naba Og la a pɛɛntɛɛnreba la zan'an eŋɛ to nu'uhen, te to aanhom ba te nɛrevɔa la ayena ka gee teŋa la poan. 4 Bala ma'an te to fan' a teŋhe la zan'an mɛ. Teŋa ka boe ba teŋhe pihiyoobe la poan ka bɔna tomam nu'uhen. Og teŋkantɛ la zan'an la Basan teŋkantɛ la te Og mɛŋa kɛn'ɛra la zan'an boe la tomam nu'uhen. 5 Teŋkanra ana woo tare la dangoone woko te ba mɛ' kae se bahɛ poan ge kɛn'ɛhɛ kuto nayahe. Teŋhe kekeko me boe ka ba' kanregɛ ge me ka tara dangɔɔma kae se. 6 Te to sagom se zan'an wo tomam sagom Hesbon teŋa la ba naba Sihon se'em la. To sagom teŋkantɛ woo mɛ la ka boraahe la pɔgɔhe la kɔma zan'an. 7 Te to fan' pe'e dunhe la lɔgɔseto woo la kule. 8 Bala ma'an ha la, te to fan' Amori nadoma bayi' wa teŋhe la n gan' Yordan pooren la mɛ, ta ta' Arnon Kolaa la, dekɛ bala ta paɛ Hermon zoore la, 9 Sidondoma yi'ire Hermon zoore wa la Sirion, te Amoridoma yi'ira dɛ Senir. 10 Te to fan' teŋhe se'ehe woo n yage kuŋkunɛ zuo la, ta' Gilead la Basan zan'an ta paɛ Saleka la Edrei. Teŋhe se'ehe woo n boe Basan naba Og nu'uhen la. 11 Basan naba Og ma'an te to bobe en ta bahɛ Arepadoma teŋa. A daa tare la kuto gɔrɔgɔ te ko woko dɛna santira pia la atan', te ko yaleŋa dɛna santira ayoobe. Ko kelom bɔna Araba teŋa n boe Ammon teŋa la la zina wa.12 Teŋse'ehe te to fan' bala ma'an ha la, mam yuun dekɛ Aroer teŋa n lɛm Arnon Kolaa, bɔna zuɔ bɔba la bo la Areuben la Gaddoma la, ge aan Gilead teŋa n yage zoore zuo la ka teŋbibihe pa'ahɛ ba. 13 Gilead teŋhe se'ehe n gee la Og teŋa Basan zan'an n dekɛ bo la Manase sɔɔn buuri la. Argob teŋa la zan'an n boe Basan teŋa poan la ne dɛna la Arepa buuri la denɛ. 14 Te Manase yaaŋa Yair fan' Argob teŋa wa zan'an ta du' Gesurdoma la Maakatdoma teŋhe beena la, n dekɛ segɛ a mɛŋa yu'urɛ Havot Yair wa paɛ zina wa. 15 N me dekɛ Gilead bo Makir. 16 Ge han dɛna Areubendoma la Gaddoma n bo ba ze'ele la Gilead beene sige ta paɛ Arnon Kolaa la teŋasoka. Ka teŋasoka la n de beene, te Yabok Kolaa la me beem Ammondoma la. 17 Ka nɛŋa bɔba beene dela Yordan Kolaa la sɛnka bɔba la, zɛ'ɛta Kineret ta paara mɔgɔrɛ la sɛnka bɔba la, Yaarom Mɔgɔrɛ la n bala, tare ta paara Pisga kuŋkuma la teŋa.
18 Te n bo ya nɔɔrɛ bala ma'an la yeti, Na'ayenɛ ya Yenɛ la n dekere teŋkana wa bɔ'ɔra ya te ya fan' ka te ka dɛna ya sɔ'ɔlom. Ge ya nɛre kpɛ'ɛma sɛba woo n yɛ' zaba lɔgɔrɔ la tole ya sɔɔnrɔ Israeldoma basɛba la nɛŋa yakɛ Yordan wa. 19 Ge han dɛna ya pɔgɔba la ya kɔma la ya dunhe la, mam mi' te ya tare dunhe te la ka tara makerɛ. Bama woo yee teŋhe se'ehe te n bo ya wa poan, 20 gura se'em ma'an te Na'ayenɛ wan ta bo ya sɔɔnrɔ seto woo n gee la vo'ohogo wo n bo yamam se'em wa. Bama me han ta zabɛ nyaŋɛ fan' teŋsɛka te Na'ayenɛ ya Yenɛ la dekera bɔ'ɔra ba Yordan yakenɛ wa ha la sɔna, nɛra woo nya ta'an lebe ta bɔna mam tɔnrɛ zen'sɛka bo ya la poan.
21 Bala ma'an te Moses bo Yosua nɔɔrɛ yeti, Ho mɛŋa nini nyɛ' Na'ayenɛ n eŋɛ nadoma bayi' wa se'em. Na'ayenɛ wan eŋɛ teŋhe se'ehe woo n boe yakenɛ ha te ho yɛ'a wa la bala. 22 Da zɔta dabeem. Na'ayenɛ ho Yenɛ la mɛŋa wan zabɛ bo ho.
Bahɛ te n yakɛ Yordan Kolaa wa la n ta nyɛ' teŋsoŋa
23 Bala ma'an te n kele mɛ la Na'ayenɛ yeti, 24 Daana Na'ayenɛ wa, hom n pa'alɛ ho tontona wa ho kantɛ la ho paŋa. Yenɛ dene n boe saazuo bii teŋparɛ wa zuo wan ta'an tom toonkanrɛ se'a taaba te ho tom wa. 25 Bahɛ te n yakɛ Yordan Kolaa wa la n ta nyɛ' teŋsoŋa sɛka n yage zoore zuo wa, la Lebanon teŋa wa. 26 Ge yamam zuo te Na'ayenɛ sunsunya nyie la mam te a ka kelehe mam, ge lebehe yele mam yeti, La seke ya, da le tɔgɛ yele dena wa bo mam. 27 Keŋɛ ta zom Pisga Zoore wa zuo la ho behɛ ho zuɔ bɔba la nɛŋa tontɔɔ la pooren la gɔbega bɔba zan'an, la ho behɛ teŋa la la ho nini, wo hom n kan yakɛ Yordan Kolaa wa la. 28 Ge bo Yosua sore ge kpemehe en. Enŋa n wan bɔna nɛŋa tare Israeldoma la yakɛ, ge eŋɛ ba te ba ta'an sɔe teŋsɛka te ho zɛ'a ka'lam ge nyɛta ka wa sɔna. 29 Te to yee bɔna paberɛ la n tɔ Bet Peor la poan.