Ya yehe gankerɛ teŋhe biŋe ya mɛhe
35
1 Te Na'ayenɛ yele Moses Moab teŋa sɛnka la poan Yordan Kolaa nɔɔrɛn te Yeriko teŋa bɔna yakenɛ deyema ha la yeti, 2 Bo Israeldoma wa nɔɔrɛ yeti ba yehe teŋkanra ba tɔntɛ la poan bo Levi buuri la te ba kɛn'ɛra, ge bo ba yaama bɔn'ɔrɔ lɛm teŋkanra la. 3 Teŋkanra senhe n wan dɛna ba denɛ te ba kɛn'ɛra se poan, te yaama bɔn'ɔrɔ la dɛna ba nii la ba dunhe woo te ba tara ɔbega zen'an. 4 Yaama zen'enhe la n wan gan'an teŋkantɛ woo poan, dɛna mɔkɔ, n gan'arɛ kae teŋa la dɛna santira tuha tuha. 5 Ya makere dangoone la n kae teŋa la dapɔya bɔbɔrɛ la santira tuha ayi', nɛŋa bɔbɔrɛ la me tuha ayi', zuɔ bɔbɔrɛ tuha ayi', te teŋa la nya bɔna teŋasoka. Zen'sena wa n wan dɛna Levi buuri la dunhe yaama zen'enhe teŋa la yeŋa. 6 Teŋhe seyoobe te ho wan dekɛ bo Levi buuri la, ge te se me dɛna gankerɛ teŋhea bo se'em n ka baŋɛ ge ko nɛra a zɔ' keŋɛ. Ge le bo ba teŋkanra pihinaahe la seyi' pa'ahɛ.7 Teŋse'ehe te ho wan bo Levi buuri wa la wan dɛna la teŋkanra pihinaahe la senii, la se yaama bɔn'ɔrɔ zan'an. 8 Teŋhe la te ho wan to'ohe se Israeldoma tɔntɛ poan la se'em dela, sɛba n tare teŋhe zo'e la, to'e bama zen'an zo'e, sɛba me n tare fiin la, to'e fiin. Yizuo woo n tare se'em la, ko yehe ko teŋkanra la me bala bo Levi buuri la.
9 Te Na'ayenɛ yele Moses yeti, 10 Yele Israeldoma wa yeti, ya han yakɛ Yordan wa ta kɛn' Kanaan teŋa wa poan, 11 ya yehe gankerɛ teŋhe biŋe ya mɛhe, te se'em n ka baŋɛ ge ko nɛra wan zɔ keŋɛ bilam ta bɔna fai. 12 Teŋhe sena wan dɛna ya gankerɛ teŋhe, te se'em ka baŋɛ ge ko nɛra wan zɔ keŋɛ bilam kan ki, gura te keendoma ta behɛ a yele la poan. 13 Teŋse'ehe te ya wan loe bo la dɛna ya gankerɛ teŋhe seyoobe la. 14 Ya yehe teŋhe setan' Yordan yakenɛ dena poan biŋe bo bala, ge ta yehe setan' me Kanaan teŋa ha bo bala mea, te se dɛna gankerɛ teŋhe. 15 Gankerɛ teŋhe wa wan bɔna bo la Israeldoma la saama la eereba n boe la ba, te se'em han ka baŋɛ ge ko nɛra, a zɔ loŋɛ bini.
16 Ge nɛra han dekɛ la kurugo ŋmɛ' nɛra lobɛ te a ki, enŋa daana dela nɛrekoora, a dela a ki. 17 Se'em han dekɛ kugure la nu'o zan' nɛra te a doohe bilam ki, a daana dela nɛrekoora, a dela a ki. 18 Se'em n dekɛ dɔɔ ŋmɛ' nɛra te nɛra la doohe bilam ki, a daana dela nɛrekoora, a dela a ki. 19 Lɛta la mɛŋa n wan ko lerege, n to'ohɛ koora la zen'an woo, a ko en. 20 Se'em n yaɛ nɛra, ta sogɛ gura en, ta dekɛ kugure lobe nɛra la te a ki, 21 bii se'em n ŋmɛ' nɛra la a nu'uhe te a ki, se'em n ŋmɛ' la dela a ki, a dela nɛrekoora. Lɛta la han to'ohɛ nɛrekoora wa zen'sɛka woo a ko en lerege.
22 Ge se'em han ka tara diŋo la nɛra, bii ka baŋɛ ge lobe sɛla te la nyɔkɛ se'em, 23 bii a dekɛ la sɛla, bii kugure lobe yoo te la ta nyɔkɛ nɛra te nɛra la ki, ge te ba pon ka tare ne se'ere la taaba, bii eere ne nɛra pɔgɔloŋɔ. 24 Nɛreba la dekɛ nɔze'elego ana wa gankɛ koora la la lɛta la teŋasoka. 25 Nɛreba la faan en lɛta la nu'uhen, bahɛ en te a kɛn'ɛra gankerɛ teŋsɛka poan te a zɔ keŋɛ la, gura te malema nɛŋadaana se'em te ba sɔ' en la kaam a yele la saŋa la ta ki. 26 Ge koora wa han ɛ zooe en zɔ ta bɔna gankerɛ teŋsɛka la poan beene, 27 te lɛta la nyɛ en te a ka boe en zɔ keŋɛ gankerɛ teŋsɛka la poan, te a ko en, lɛta la ka tare taalɛ. 28 Ge koora la sontii a bɔna gankerɛ teŋa la poan ma'an gura te malema nɛŋadaana sɛka n boe a yele la saŋa la ta ki ne. Malema nɛŋadaana ena han ta ki, koora la nya ta'an lebe a mɛŋa yire poan na. 29 Yele ana n de toolom yɛla, la nɔze'elego bo ya buuri la saŋa woo ya vom poan.
30 Nɛra han ko nɛra, seradoma bɔna ge te ba ko en lerege, ge sera daana han dɛna nɛre yenɛ ma'an, da ko ya nɛra la. 31 Da to'e ligiri ge bahɛ se'em tuure n de a ki. Kɔ'ɔn ko ya se'em tuure n de a ki. 32 Da to'e ya ligiri se'em n zɔ loŋɛ gankerɛ teŋhe wa poan ge bo en sore te a lebe a mɛŋa teŋa ta bɔna ge te malema nɛŋadaana la nan vɔna.