<<    <     Kanlɛ     16     >    >> 
Kora sunsunya n nyie la Moses
16
1 Kora dela Izhar dayɔa te Izhar me dɛna Kohat dayɔa, te a Kohat me dɛna Levi dayɔa. Te Kora, la Areubendoma sɛba n de Datan la Abiram te ba sɔ dɛna Eliab la, la Pelet dayɔa On, bana sunsunya n nyie la Moses, 2 te ba dekɛ boraa kɔbehe seyi' la pihinuu, boraa se'ehe te Israeldoma mina ba soŋa soŋa, loohe ba te ba dɛna ba nɛŋadoma. 3 Ba enŋɛ la nɔyenɛ wa'ana te bama kan sakɛ bo Moses la Aron, nya yele ba yeti, Ya pon ba tuue gaŋɛ mɛ! Buuri wa zan'an ayena ayena woo dela fa'a, te Na'ayenɛ me bɔna la ba. Ge bene n sɔe te yamam zɛnkɛ ya mɛhe yagelɛ saazuo sɔna Na'ayenɛ nɛreba wa behera?
4 Moses n kelehe yetɔgom la ta ba'ahɛ la a kɔ'ɔn lu la teŋa aliko. 5 Ge yele Kora, la a taaba la yeti, Ya dekera yɛ'a bolika Na'ayenɛ wan pa'alɛ sɛba n de a nɛreba,a la sɛba n de fa'a, ge bahɛ te nɛre enŋa daana lɛm en. Nɛra se'em te a loe la, a wan enŋɛ a daana te a keŋɛ lɛm en. 6 Hom Kora la ho taaba la zan'an n wan enŋɛ se'em n wa'ana. Dekɛ ya dokɔ seto te ba tara nyɔn'ɔra digilom la, 7 te beere te ya kɔ digilom enŋɛ to poan, la ya wa'an Na'ayenɛ zen'an na. Se'em te Na'ayenɛ wan loe la, enŋa n de fa'a. Yamam Levi buuri wa ba' keŋɛ zaan mɛ! 8 Te Moses le yele Kora yeti, Yamam Levi buuri wa, kelehe ya! 9 La kelom ka seke yamam la Israeldoma, Na'ayenɛ wa n yelege yamam Israeldoma wa zan'an poan tare ya na lɛm a mɛŋa te ya tona a Sogorɛ la poan tooma ge la ya zɛ'ɛta Israeldoma wa nɛŋa la ya tɔgɔra pa'ala ba wa? 10 A tare hom mɛ la ho Levi buuri lɛm a mɛŋa na, ge ya nya kɔ'ɔn bɔta te ya fan' la malema tooma la me pa'ahɛ. 11 Na'ayenɛ n bala te hom la ho taaba la lagahɛ zabera la en la. Aron dela ane te ya gɔngena la en?
12 Te Moses yi Eliab dayɔɔhe Datan, la Abiram. Te ba yele en yeti te ka ye'na. 13 La kelom ka seke ho la hon tare to ze'ele teŋsɛka poan te iilom la seerom zɔta wo ko'om la yehe na te ho ko' tɔ pɔgɔtia wa poan wa? Ge te nan nana wa te ho nya bɔta te ho dekɛ de ziile tomam? 14 Sɛla n pon le pa'ahɛ la, ho ka tare to wa'an teŋsɛka poan te iilom la seerom zɔta wo ko'om la, bii ho bo tomam me vatɔ, bii zɛɛnrɔ borega zen'an. Hon yeti ho kpegɛ la boraahe wa nini bahɛ? Aai, te kan yehe na.
15 Te Moses suunre nyie te a yele Na'ayenɛ yeti, Da to'e ba bo'olom la. Mam ka to'e ba sɛla te la paɛ boŋa, n me ka tuue ba se'em.
16 Te Moses yele Kora yeti, Hom la ho taaba la zan'an, tare ya ya mɛhe wa'an na ze'ele Na'ayenɛ nɛŋan beere, hom la ho taaba la, la Aron. 17 Nɛra woo be'ere dekɛ a dokɔ enŋɛ digilom enŋɛ bini, ba zan'an dela dogorɔ kɔbehe seyi' la pihinuu, la ya ze'ele Na'ayenɛ nɛŋan. Hom me la Aron me beere tara ya dogorɔ la ya wa'ana ze'ele Na'ayenɛ nɛŋan. 18 Bala te nɛra woo tara a dokɔ, kɔ' ko'ɛnka enŋɛ bini mɔ'ɛ bugum enŋɛ bini te bama la Moses la Aron nya lagom ze'a Sogorɛ la nɔɔrɛn. 19 Kora n daa ta lagahɛ a taaba la zan'an ze'ele Sogorɛ la nɔɔrɛn te bama kan sakɛ bo Moses la, bilam te Na'ayenɛ soŋa nɛɛ ba zan'an zuo.
20 Te Na'ayenɛ yele Moses, la Aron yeti, 21 Yelege ya ya mɛhe nɛrebana wa poan te n kɔ'ɔn ba'ahɛ ba boyena. 22 Ge Moses la Aron lu la aliko ge kaahɛ yeti, Na'ayenɛ, Na'ayenɛ, nɛresaala sea zuo, te hon suunre wan kɔ'ɔn nyie la nɛreba wa zan'an, ge te la me dɛna la nɛra ayena ma'an n tom be'em wa?
23 Te Na'ayenɛ yele Moses yeti, 24 Yele nɛreba zan'an yeti ba fɔnregɛ Kora la Datan la Abiram sogora. 25 Te Moses n gan ne la nya vaɛ ihege saazuo nya yɛ'a Datan la Abiram zen'an, te Israeldoma keendoma la taɛ a poore. 26 Te a yele Israeldoma la zan'an la ninmɔ'ɔrɛ yeti, Vuruge ya ya mɛhe lebe pooren ge bahɛ ya toonfɛn'ɛhadoma wa yiya wa. Da kalom ya ba sɛla, te ba be'em la wan lagom taa ya te ya ki. 27 Bala te nɛra woo daa vuruge lebe pooren ge bahɛ Kora la Datan la Abiram sogora la. Te Datan la Abiram la ba pɔgɔba la ba kɔma nya yehe na zɛ'a ba nɔyan. 28 Te Moses yeti, Sɛla n wan bahɛ te ya baŋɛ te Na'ayenɛ n tom mam te n tom toon ana woo ge dagɛ la mam mɛŋa potɛn'ɛrɛ n wa'ana. 29 Nɛrebana wa han ki wo nɛreba n kiiri se'em la, ge nyɛ nɛreba nyɛta sɛla la, Na'ayenɛ ka tom mam. 30 Ge Na'ayenɛ han bahɛ te yelepaalɛ enŋɛ, te teŋa wa mɛŋa ya'ɛ nɔɔrɛ vole ba, la sɛla woo n de ba bonɔ te ba sige ba yɔɔ poan voto, ya wan baŋɛ te nɛreba wa enŋɛ Na'ayenɛ la sɛla n ka nare.
31 Moses n ta tɔgɔra yele ana wa woo te a nɔɔrɛ ta man'ara la, te zen'an bɔba te nɛrebana wa zen'an la tanhɛ bɔkɛ, 32 te teŋa ya'ɛ boko vole ba, la ba yire la zan'an, la Kora tadaandoma la zan'an la ba lɔgɔrɔ zan'an. 33 Ba sige ba yɔɔrɔ la poan la voto, la ba lɔgɔrɔ zan'an te teŋa la lebehe mum ba bahɛ ha te ba vɔregɛ Israeldoma poan. 34 Ba tagurega la zuo te Israeldoma la zɔta ge yɛta te teŋa la wan vol tomam me. 35 Te bugum ze'ele saazuo sige na di nɛreba kɔbehe seyi' la pihinuu la n ze' nyɔn'ɔra digilom la.
36 Te Na'ayenɛ yele Moses yeti, 37 Yele Aron se'em n de malemadaana la, la a dayɔa Eleazar te a vaɛ dogorɔ la, ge tare bugumsaana keŋɛ zen'an n zan la ho ta ka'ɛ bahɛ ge dogorɔ la dela fa'a, 38 doge seto te nɛreba la n tom be'em te ba vom ba'ahɛ la. Malom nyɛlegɛ dogorɔ la, la ho maalɛ ba te ba dɛna bon lama te ho dekɛ ba kpa' kaanbegɔ daka la. Se'ere n sɔe la, ba deŋɛ dekɛ ba bo la Na'ayenɛ, te ba lebege fa'a. Bahɛ te wa'ana dɛna sɛla tɛɛnha Israeldoma wa. 39 Bala te Eleazar se'em n de malemadaana la, doohe lagahɛ nyɔgom dogorɔ la, te nɛresɛba te bugum la di la tare wa'ana la, bahɛ te ba yelegɛ ba maalɛ bon lama, te a dekɛ ba biŋe pin' daka la teŋa, 40 wo Na'ayenɛ n doohe Moses poan pa'alɛ en se'em la. Dena tɛɛnhe la Israeldoma la te han dagana Aron buuri la ma'an, se'em kan ta'an wa'an Na'ayenɛ nɛŋan na nyɔ' digilom la a daana han enŋɛ bala, la wan enŋɛ en wo Kora, la a taaba la te la enŋɛ ba se'em la.
41 Yiimbeere te Israeldoma wa da gɔngena la Moses la Aron yɛta te, Na'ayenɛ nɛreba n bala te ya ko la. 42 Ge nɛreba zan'an n ta lagahɛ taaba te bama kan sakɛ bo Moses la Aron n enŋɛ se'em la, ge nya ŋmɛregɛ tɔɔra Sogorɛ la, te saŋgbanɛ pin' zen'an la ge te Na'ayenɛ soŋa nɛɛ zen'an la poan. 43 Te Moses, la Aron tole Sogorɛ nɛŋa ha.
44 Te Na'ayenɛ yele Moses yeti, 45 Yehe ya mɛhe nɛreba wa poan ge te n kɔ'ɔn ba'ahɛ ba. Te ba lu' aliko. 46 Te Moses nya yele Aron yeti, Dekɛ ho dokɔ la, la ho kɔ' ko'ɛnka enŋɛ bini la ho mɔ'ɛ bugum kaanbegɔ daka la poan, la ho kanbelɛ keŋɛ nɛreba la zen'an la ho ta sohɛ be'em duuhego bo ba. Sunsunyiim n ze'ele Na'ayenɛ zen'an na, te too la pon pɔhɛ mɛ. 47 Te Aron enŋɛ wo Moses n yele en se'em la, zɔ ta kɛn' nɛreba la teŋasoka. Too la pon pɔhɛ nɛreba la mɛ, ge Aron sina ge nyɔ' zun'uhe la sohɛ be'em duuhego bo ba. 48 A ze'e la sɛba n pon ki la, la sɛba n vɔe la teŋasoka, te too la go'e. 49 Nɛreba tuha pia la tuha anaahe la kɔbehe seyopɔe (14,700) n ki doohe la too wa poan, ge sɛba me n ki doohe Kora be'em la. 50 Te Aron nya lebe Moses zen'an Sogorɛ la nɔɔrɛn. Se'ere n sɔe la, too la bahɛ mɛ.