Ba daa pɔhɛ te ba keŋɛ la
10
1 Te Na'ayenɛ daa yele Moses yeti, 2 Maalɛ sanlenpeele tentana ayi', la ho tara bama pɛɛbera yi'ira nɛreba la te ba lagaha, ge tara bama pɛɛbera bɔ'ɔra ba la han ne ta paɛ ba kɛŋɛ. 3 Ba han ne ta peebe tentana ayi' la zan'an, la dela nɛra woo lagahɛ ho zen'an Sogorɛ nɔɔrɛn na.4 Ge ba han peebe deyena ma'an, la dela keendoma la, sɛba n de Israeldoma yizuto zuodoma la ma'an lagahɛ ho zen'an na. 5 Ba han ne peebe tentanɛ la boyena ma'an la dela sɛba n boe pooren bɔba la son te ba pɔhɛ kenɛ. 6 Ba han le peebe tentanɛ la boyena pa'ahɛ, sɛba n me sontii ba tagalɛ kenɛ la. 7 Ho han bɔta te ho lagahɛ ba zan'an na, ho peebe tentana la zan'an, ge de peebe peebe yeŋɔ. 8 Aron dayɔɔhe la, n de malemadoma la, n sontii ba pɛɛbera tentana la. Yele dena wa dela ho tara dɛ te de bɔna yamam la ya yaahe sɛba n wan ta wa'ana. 9 Ya han le yeti ya yehe ya mɛŋa teŋa la poan zabɛ la diŋdaana se'em n boe bini daana ya, ye peebe tentana la zan'an boyena ma'an. Ya han enŋɛ bala, ya Daana Na'ayenɛ la wan tɛɛn ya yele ge fan' ya ya diŋdaana la nu'uhen bahɛ. 10 Ya popeelom saŋa poan, de'en seko woo te ya dɛ'ɛna, la ya yuum paala de'eŋɔ poan, ya ne peebe tentana la bahɛ ya nyɔ'an bo'olom la, la ya sunma'ahom bo'olom la zuo te ba dɛna tɛɛnhegɔ bɔ'ɔra ya, ya Na'ayenɛ la nɛŋan. Mam n de ya Daana Na'ayenɛ la.
11 Yuuma ayi' la poan, ŋmarehe seyi' dabeha pihiyi' daarɛ te saŋgbanɛ la daa pilige ge bahɛ Sogorɛ la. 12 Bilam te Israeldoma nya daa ze'ele Sinai pɔgɔtia la poan pɔhɛ kenɛ, keŋɛ gamehɛ zen'enhe tara tara ta paɛ Paran pɔgɔtia la poan te saŋgbanɛ la sige na pin' bilam zan'an.
13 Ba daa pɔhɛ te ba keŋɛ la, ba doohe la Na'ayenɛ n bo a nɔɔrɛ doohe Moses poan la. 14 Yuda buuri la yizuto n deŋɛ nɛŋa daa dɔla la kenɔ poan. Aminadab dayɔa Nason n daa boe nɛŋa bɔ'ɔra ba nɔɔrɛ te ba kena. 15 Zuar dayɔa Netanel me n daa boe Isakar buuri la nɛŋa te ba dɔla, 16 ge te Helon dayɔa Eliab ne daa bɔna Zebulun buuri la me nɛŋa te ba dɔla. 17 Te ba vɔn' Sogorɛ, Gerson buuri la Merari buuri la n de sɛba n ziire deo la lɔgɔrɔ la me daa ta' ba poore.
18 Areuben buuri la me yizuto n de sɛba me n daa dole poore, te Sedeur dayɔa Elizur me n boe ba nɛŋa bɔ'ɔra ba nɔɔrɛ te ba kena. 19 Zurisadai dayɔa Selumiel me daa boe Simeon buuri la, ba yizuto nɛŋan bɔ'ɔra ba nɔɔrɛ te ba kena, 20 ge te Deuel dayɔa Eliasap me daa bɔna Gad buuri la, la ba yizuto nɛŋan, bɔ'ɔra ba nɔɔrɛ te ba kena. 21 Kohat buuri la me n tagalɛ, bama n ziire toolom lɔgɔrɔ la. La ne sona te ba tin' Sogorɛ la ba'ahɛ ge te bama paana. 22 Epraim buuri me la ba yizuto n tagalɛ, te Ammihud dayɔa Elisama n boe ba nɛŋa bɔ'ɔra ba nɔɔrɛ te ba kena. 23 Pedazur dayɔa Gamaliel n boe Manase buuri la, la ba yizuto nɛŋa, bɔ'ɔra ba nɔɔrɛ te ba kena, 24 ge te Gideoni dayɔa Abidan me bɔna Benyamin buuri la, la ba yizuto nɛŋa bɔ'ɔra ba nɔɔrɛ te ba kena.
25 Ba'ahegɔ zan'an, sɛba n yuum daa de guruba ba buuri wa zan'an me Dan buuri la, la ba yizuto bama yuum yehe te Amisadai dayɔa Ahiezer yuum bɔna ba nɛŋa bɔ'ɔra ba nɔɔrɛ te ba kena. 26 Okran dayɔa Pagiel me n daa boe Aser buuri la nɛŋa, 27 ge te Enan dayɔa Ahira me bɔna Naptali buuri la, la ba yizuto nɛŋa. 28 Israeldoma la n tagalɛ taaba se'em kena n bala.
29 Te Moses yele daa Aruel dayɔa Hobab se'em n de Midian buuri la, dɛna Moses dɛɛma la yeti, Te maahene yɛ'a la zen'sɛka te Na'ayenɛ yeti n wan dekɛ ka bo ya la, bala doohe to na, ge te me wan ta enŋɛ ho soŋa, se'ere zuo Na'ayenɛ pon deŋɛ yele te a wan enŋɛ yelesoma bo Israeldoma bini. 30 Te a daa lebehe yeti, Aai, mam ka ye'ehe, mam ye'ehe lɛbera la n mɛŋa teŋa poan, la n mɛŋa nɛreba zen'an. 31 Te Moses daa yele en yeti, Da enŋɛ bala, da bahɛ tɔ. Ho mɛŋa mi tin' wan ta tiihom zen'an pɔgɔtia la poan, ho me ta'an wa'ana te ho niho nyɛ. 32 Ho han doohe to, to wan lagom tɔnrɛ yele som se'a woo te Na'ayenɛ wan dekɛ bo to la, la hɔ.
33 Te ba daa ze'ele Na'ayenɛ zoore la zuo pɔhɛ ba kenɛ la, ba keŋɛ la dabeha atan'. Na'ayenɛ nɔbiŋere daka la te ba zi bɔna nɛŋa dabeha atan' la woo poan, te ka pa'alɛ ba zen'an te ba wan ze'ele vo'ohe. 34 Ba ne han pɔhɛ kenɛ wontɛɛŋa, saŋgbanɛ n ne pin' ba. 35 Ba han ne daa maahom zi nɔbiŋere daka la te ba keŋɛ, Moses ne yeti, Ihege n Daana, la ho bahɛ te ho diŋdoma yeregɛ, la ho bahɛ te ho diŋdoma mɛlom ho nɛŋan. 36 Ge ba han daa ne le paɛ zen'an te nɔbiŋere daka la bɔta te ba vo'ohe, Moses ne le yeti, Lebena n Daana, lebe Israeldoma wa n ba' zo'e kan ta'an kaanlɛ wa zen'an na.