<<    <     Malema     25     >    >> 
Vo'ohogo yuunɛ
25
1 Te Na'ayenɛ tɔgɛ bo Moses Sinai Zoore zuo yeti, 2 Yele Israeldoma wa yeti, Ya han ta zin'ire teŋsɛka te n dekera bɔ'ɔra ya wa poan ba'ahɛ, ya bahɛ te teŋa la tara vo'ohogo yuunɛ la te la na'ahɛ Na'ayenɛ. 3 Yuuma ayoobe te ya wan bota ya vatɔ, ge maala ya dia tiihe, ge buna ya dia. 4 Ge yuuma ayopɔe poan, ya bahɛ te samana la vo'ohe. La dɛna vo'ohogo saŋa bo Na'ayenɛ. Da borɛ ya sɛla ya samana la zuto, bii ya tona ya tiihe vatɔ poan. 5 Diyɛɛhe la n yehe ya samana poan saŋkaŋa la, da bum ya mɛŋa sɔna ka. Ya dia tiihe la te ya ka maalɛ se ge te se wom disɛka saŋkaŋa la, da go'ohe ya. Bahɛ ya te teŋa la tara vo'ohogo yuunɛ. 6 Yuunɛ se'ere n pa'ahere ayopɔe la, diyɛɛhe la woo n yehe ya samana la poan la dela dia bo ya mɛhe, ya boraahe tontoneba, ya pɔgɔhe tontoneba, ya ligiri tontoneba saama, la sɛba woo n nɔgɛ na kɛn'ɛra la ya. 7 Ya dunhe n boe yire, la dunhe woo n boe teŋa la poan ta'an lagom ɔbera diyɛɛhe wa n yehe ya vatɔ poan saŋkana wa poan la.
8 Kanlɛ ya vo'ohogo yuuma la ayopɔe ayopɔe sugumnɔɔren boyopɔe, te la zan'an dɛna vo'ohogo yuuma pihinaahe la awae' biŋe. 9 Te ŋmarehe seyopɔe poan dabeha pia daarɛ la n de Be'em Duuhego Daarɛ la, ya peebe peraa iilɛ tentanɛ la kae teŋa la zan'an. 10 Ya maahom yuum pihinuu la te de dɛna toolom yuunɛ te ya mɔɔlɛ fai bɔŋa saŋa bo teŋa la nɛreba la zan'an. Ka dela Peraa Iila Peebego saŋa bo ya, te nɛra woo sona te a lebehe to'e sɛla woo n de a denɛ daa bɔna se'em nu'uhen, te nɛra woo lebe paɛ a nɛreba. 11 Yuum pihinuu saŋa wa dela Peraa Iila Peebego saŋa bo ya. Ya da borɛ bii bum diyɛɛhe la, bii ya go'ohe tiihe la te ya ka maalɛ se gee te se wom wɔla se'a la. 12 La dela Peraa Iila Peebego saŋa. Ka dela toolom bo ya.
13 Yuunɛ dɛna wa Peraa Iila Peebego saŋa wa poan, nɛra woo ne lebehe to'e a lɔkɔ sɔna. 14 Se'em han koohe la a sɛla bii a da' la a sɛla a sɔɔn bii zen'an saŋkana wa poan, ya da eŋɛ sɛla nyiihe taaba sunya. 15 Ne kaanlɛ ya yuuma se'a te samanɛ la wan tom ge te Peraa Iila Peebego saŋa la paɛ la, la ya yɔ ligiri la bala. 16 Samanɛ la poan n tom yuuma zo'e se'em, ligiri wan zo'e la bala. Samanɛ la poan n wan tom yuuma fiin se'em, ligiri la me wan pɔ'ɛ la bala. Se'ere n sɔe la, a koohere la hom wan borɛ ge kɛ' yuuma se'em n bala bɔ'ɔra ho la. 17 Wana te ya kan tue taaba, ge me zɔta Yenɛ. Mam de Na'ayenɛ ya Yenɛ.
18 Ya dɔla mam malema la mam ze'elego wa, ge tona a. Bala te ya wan bɔna teŋa la poan fai. 19 Bala teŋa la mɛ wan maalɛ dia te ya dita ge bɔna ka poan fai. 20 Ge ya han tɛn'ɛha yeti, to han ka borɛ, ka kɛ' yuuma ayopɔe la poan to yeti to di la bene? 21 Mam yeti n ka'ɛ la kan'somɔ bahɛ ya zuo na, te yuunɛ se'ere n pa'ahere ayoobe poan la maalɛ yuuma atan' dia. 22 Ya han ta bota yuuma anii la poan, ya wan kelom dita dikɛka la. Ya wan di dikɛka la ta paɛ dipaala.
23 Da koohe ya samanɛ bo se'em te de kɔ'ɔn dɛna a denɛ yɛ'ɛha. Teŋa la dela mam denɛ, te yamam dɛna saama kɛn'ɛra la mam. 24 Bala se'em han kɔɔha a samanɛ zen'sɛka a tɔgɛ aanrɛ te a daana wan ta lebehe to'e samanɛ la. 25 Ya teŋa la poan se'em han ta ba' nameha te la dɛna a koohe a samanɛ zen'an, a sɔɔn wa'ana yɔ to'e zen'an lebehe na. 26 Ge nɛra la han ka tara sɔɔn ge koohe samanɛ la, a mina te la dela a toonɛ te a ta lebehe yɔ to'e samanɛ la biŋe. 27 Bala, a kaanla yuuma se'a te a koohe samanɛ la, la a ta yɔ yuuma se'a n gee la bo en koohe samanɛ la bo se'em la ge lebehe to'e de te de dɛna a denɛ. 28 Ge a han ka ta'an yɔ ge to'e samanɛ la, de wan bɔna la se'em n da dɛ la nu'uhen gura Peraa Iila Peebego saŋa la. Peraa Iila Peebego saŋa la han paɛ, de dɛna a denɛ te a to'e.
29 Bala mea te se'em han koohe a yire n boe teŋa te dangoone mɛ kae ka, yɔto'e ze'elego la dela yuunɛ. 30 Ge a daana han ka nyaŋɛ yɔ to'e yire la yuunɛ la poan, yire la wan dɛna la se'em n da' la a yaahe denɛ yɛ' a ha. De kan lebehe bo de daana la Peraa Iila Peebego saŋa la poan. 31 Ge han dɛna yiya se'a n boe teŋbibihe te dangɔɔma ka mɛ kae se poan la, yiya aŋa boe la samanɛ zuo n bala. Bala a yɔ to'e ze'elego la boe la bala bo aŋa Peraa Iila Peebego saŋa la poan.
32 Ge han dɛna Levidoma teŋhe la poan, bama n bote se'em ma'an ba ta'an yɔ ge lebehe to'e ba yire. 33 Sɛla woo n de Levidoma la lɔkɔ te ba koohe, bama n bote se'em ma'an ba yɔ ge to'e. Ba han koohe ba yire teŋkanra la poan le dela ba lebehe de bo ba Peraa Iila Peebego saŋa. Se'ere n sɔe la, Levidoma yiya la n boe teŋkanra la poan la n de ba lɔkɔ Israeldoma zen'an. 34 Ge Levidoma samana la n boe ba teŋkanra la poan laka koohe. Se'ere n sɔe la, ba ninmɔ'ɔrɛ lɔkɔ zan'an n bala.
35 Ya sɔɔn seko han ka tara te la wona en, soŋɛ ya en wo yan wan soŋɛ saana n kɛn'ɛre la ya se'em la. 36 Da to'e ya dɔgɔlega a zen'an. Zɔ ya ya Yenɛ la ge bahɛ te ya sɔɔn la bɔna la ya. 37 Da peŋe ya sɔɔn ligiri ge ɛɛra a yɔ dɔgɔlɛ, bii ya koohe dia bo en ɛɛra yɔɔrɔ. 38 Mam de Na'ayenɛ ya Yenɛ, tare ya ze'ele Mizraim teŋa na dekɛ Kanaandoma teŋa wa bo ya ge dɛna ya Yenɛ.
39 Ya sɔɔn han ta ba' namehe gaŋɛ, koohe a mɛŋa bo ya se'em da dekɛ ya en lebege da'aberɛ. 40 A wan kɛn'ɛra la ya wo ligiri tontona la, ana wo saana la tona bɔ'ɔra gura Peraa Iila Peebego saŋa la. 41 A nya wan yehe la a kɔma lebe a sɔyaabdoma samanɛ poan. 42 Ba dela mam yamehe te mam tare ba ze'ele Mizraim teŋa na. Ba da koohe ba wo da'aba. 43 Ya da eta bama taaba vɛngela vɛngela. Zote ya ya Yenɛ la.
44 Ya han bɔta boraahe da'aba bii pɔgɔhe da'aba, ya ta'an da' ba teŋhe se'e da'aba te ya dahe n kae ya wa doma zen'an. 45 Ya ta'an da' sɛba n de saama kɛn'ɛre la ya la, la ba kɔmsɛba te ba dɔgɔra la te ba dɛna dɛna ya da'aba tona bɔ'ɔra ya. 46 Ya ta'an togohɛ ba bo ya kɔma te ba dɛna ba lɔgɔrɔ tona bɔ'ɔra ya. Ya ta'an tara ba te ba dɛna ya da'aba saŋa woo. Ge han dɛna ya sɔɔnrɔ Israel buuri la, ya da makɛ dekɛ ba te ba dɛna yamehe.
47 Saama han kɛn'ɛra la ya ta panrɛ, te ya sɔɔn seko me dɛna naha ta dekɛ a mɛŋa koohe bo saana la n kɛn'ɛre la ya la bii a yaahe, 48 ba han da' en ba'ahɛ, a tare sore te a yɔ to'e a mɛŋa. A sɔɔn seko ta'an yɔ to'e en, 49 bii a anheba bii a anheba dayɔɔhe, bii enŋa la sɛba n de ziim yemɔ ta'an yɔ to'e en, Bii a mɛŋa han tara, a yɔ to'e a mɛŋa. 50 Enŋa la se'em n da' en la wan kaanlɛ yuuma se'a te a da' en ta paɛ Peraa Iila Peebego saŋa la, ligise'a n wan yɔ to'e ne la wan zona la ban yɔɔre ligiri tontona se'em, wo yuuma la n zone se'em la. 51 Yuum se'a n gee la han zo'e, a yɔ gaŋɛ porogerɛ ge to'e a mɛŋa. 52 Te yuuma la han gee la fiin wa la la paɛ Peraa Iila Peebego saŋa la, ba kaanlɛ yuuma se'a n gee la te a yɔ ge to'e a mɛŋa. 53 A wan ana mɛ wo nɛra te ba tare en na te a tona ge tɔ'ɔha yuunɛ yuunɛ yɔɔre la. Ya behɛ soŋa te se'em n da en la da nameha en. 54 Ba han pon ka ta'an yɔ to'e en, ge te Peraa Iila Peebego saŋa la paɛ, enŋa la a kɔma dela ba keŋɛ fai. 55 Israeldoma dela mam nɛreba te n tare ba yehe Mizraim teŋa poan na. Mam n de Na'ayenɛ ya Yenɛ.