Te Bezalel dekɛ zaaŋa dɔɔrɔ, maalɛ nɔbiŋere daka la
37
1 Te Bezalel dekɛ zaaŋa dɔɔrɔ, maalɛ nɔbiŋere daka la, te woko dɛna santira ayi' la girigo, te ka yaleŋa dɛna santire la girigo, te ka saazuo woko dɛna santire la girigo, 2 takɛ ka poan la ka yeŋa zan'an la sanlema, ge te a kure sanlema kɔkɛ dɛ kenkɛlehe la kae, 3 ge kure sanlema banhe senaahe tuhe ka na'ma anaahe la poan, seyi' bɔna loge dena, te seyi' me bɔna loge dena. 4 Ge te a peehe zaaŋa dɔɔrɔ, wogoro, dekɛ takɛ tɔ la sanlema, 5 dekɛ dɔɔrɔ la tuhe banhe la n boe loga la poan la yɔgɔrɔ la poan, te ba tara dɔɔ tonɔ ziira daka la.6 Ge te a dekɛ sanlema ma'an kure be'em duuhego zen'an, te a dɛna liŋa, te ka woko dɛna santira ayi' la girigo, te ka yaleŋa dɛna santire la girigo. 7 Te a dekɛ sanlema kure kelompagehedoma bayi' sugule liŋa la fehe se la zuo, 8 te ayema suga liŋa la fehega kayema zuo, te ayema la me suga liŋa la fehega kayema la me zuo, te kelompagehedoma wa, la liŋa la dɛna boyena, te ba suga liŋa la fehe yi se la zuo. 9 A kure kelompagehedoma wa mɛ te ba suga liŋa la zuo, te ba nɛhe tɔ taaba, zenga ba kelompagehe la saazuo, yeregɛ se pin' liŋa la, ge sura beha liŋa la zuo.
10 Ge te a dekɛ zaaŋa dɔɔrɔ, maalɛ tebole la me, te de woko dɛna santira ayi', te de yaleŋa dɛna santire, te de saazuo woko dɛna santire la girigo. 11 Te a dekɛ sanlema takɛ dɛ, ge kure sanlema kɔkɛ dɛ kenkɛlehe la kae, 12 ge kure bonlamehega te ka yaleŋa dɛna nu'dibila gu' de nɔɔrɛ la kae, kure sanlema kɔkɛ kenkɛlehe la kae, 13 ge kure sanlema banhe senaahe, tuhe tebole na'ma anaahe la poan. 14 Banhe wa n wan tara ziira tebole na'ma wa tuhe lɛm mɛ la bonlamehega la n kɔkɛ tebole la nɔɔrɛ la. 15 Ge a dekɛ zaaŋa dɔɔrɔ peehe dɔɔsaala n wan tara ziira tebole la, takɛ tɔ la sanlema, 16 ge dekɛ sanlema ma'an kure lɔgɔseto woo n wan tara tona tebole la zuo tooma la, de laahe pɛrehe la laahe kanra se'ehe n wan tara zun'uhe la dugulehe la wama se'ehe n wan tara kaanbera daam bo'olom la.
17 Te ba dekɛ sanlensoma kure butolela zɛ'ɛlega wa, teŋeren la ka dibire la, la ka laahe la n ane wo topuo n tanhɛ la dɛna zogɔ yeŋa. 18 Butolela zɛ'ɛlega dibire wa tare la yila ayoobe, yila atan' logorɛ woo. 19 Te yile woo tara laahe setan' n ane woo topuo la de poan. Yila ayoobe la zan'an daa dɛna bala yile woo poan. 20 Butolela zɛ'ɛlega la poan a golɛ la laahe senaahe n ane wo topuo n tanhɛ la de zuo. 21 Te butolela la zɛ'ɛlega la daa tara gina yia yila la poan tagela la yila se'a n pa'ahɛ yi'i la la se'a n pa'ahɛ atan' la, yila ayoobe la woo poan. 22 Gina la la butolela la la zɛ'ɛlega la zan'an daa dela salensoma te ba kure. 23 Te ba daa dekɛ sanlensoma maalɛ ka butolehe bibihe seyopɔe wa la ka zomehe la ka lapɛrehe. 24 Ba daa dekɛ la sanlensoma bɔɔrega maalɛ butolela wa la ka lɔgɔrɔ zan'an.
25 Ge te a dekɛ zaaŋa dɔɔrɔ maalɛ ko'ɛnka daka la, te ka woko dɛna santire te ka yaleŋa santire, te ka ana mɔkɔ, ge te ka saazuo woko dɛna santira ayi', daka la, la ka iila la dela dɔyeŋɔ. 26 A dekɛ sanlema takɛ ka yeŋa, la ka poan, la ka kae, la ka iila la, ge kure sanlema kɔkɛ ka, 27 ge kure banhe seyi' tuhe ka loga ayi' poan, sanlema n kɔkɛ zen'an la, te dɔɔseto n wan tara ziira ka la, tuhe banhe la yogoro la poan. 28 Ge a dekɛ zaaŋa dɔɔrɔ maalɛ dɔɔsaala la n wan tara ziira daka la, takɛ tɔ la sanlema.
29 Ge a maalɛ toolom soa kaam la ko'ɛnka sɛla n wan tara nyuŋo soŋɔ la wo ban maale bo se'em la.