Te Na'ayenɛ yele Moses yeti, Ho mɛŋa tɔgɛ bo Israeldoma wa yeti, tɛnre ya n vo'ohogo la
31
1 Te Na'ayenɛ yele Moses yeti, 2 Behɛ, mam yi' la Uri dayɔa Hur la n de Yuda buuri la dayɔa Bezalel, 3 ge me perɛ en la n Sea, la mi'ilom la bɔkerɛ la yam, lɔgɔrɔ woo maalegɔ poan, 4 te a tana ŋmata lɔgɔrɔ, ge tana tara sanlema, la sanlenpeelega, la nyɔgom maala lɔgɔrɔ, 5 ge tana ŋmata kuga, ge tana tara dɔɔrɔ maala lɔgɔrɔ, la lɔgɔrɔ woo maalegɔ yam. 6 Ge te n me loe Ahisamak n de Dan buuri poan la dayɔa Oholiab pa'ahɛ en, ge me bo sɛba n ta'an lɔgɔrɔ maala la mi'ilom pa'ahɛ, te ba ta'an maalɛ mam n bo ho nɔɔrɛ te ho maalɛ lɔgɔseto woo la: 7 Sogorɛ la nɔbiŋere daka la be'em duuhego liŋa la n vuge ka la Sogorɛ kogehe la zan'an la 8 tebole la de tooma lɔgɔrɔ la zan'an la butolela zɛ'ɛlega la ka la lɔgɔrɔ zan'an la ko'ɛnka daka la 9 nyɔ'an kaanbegɔ daka la ka lɔgɔrɔ la zan'an la peere laa la ka zɛ'ɛlega la 10 futo la n wan kpa' la malemadoma futo la n wan kpa' bo Aron la a dayɔɔhe la te ba yɛɛra tona malema tooma la 11 soa kaam la ko'ɛnka lɔgɔrɔ la n wan bɔna toolom zen'an la. Ba eŋɛ sɛla woo wo mam n bo ho nɔɔrɛ se'em la.12 Te Na'ayenɛ yele Moses yeti, 13 Ho mɛŋa tɔgɛ bo Israeldoma wa yeti, tɛnre ya n vo'ohogo la, yele dena n wan dɛna danlehom gan'an mam, la yamam teŋasoka, ya buuri wa saŋa woo poan, te ya mina te mam, se'em n de Na'ayenɛ la n pee ya. 14 Dole ya Vo'ohogo wa. Se'ere n sɔe la, ko dela toolom yele bo ya. Se'em woo n ganlom vo'ohogo wa, wan ki, se'em woo me n tom toonɛ Vo'ohogo Daarɛ wa poan, ŋmaɛ ya en Israel buuri wa poan bahɛ. 15 Tare ya dabeha ayoobe tona ya tooma, ge ayopɔe daarɛ la dela Vo'ohogo ma'an dabaherɛ, de dela Na'ayenɛ ma'an dabaherɛ, se'em n tom toonse'ere Vo'ohogo Daarɛ wa poan, ko ya en. 16 Bala zuo, Israeldoma wa tɛnra dɛ'ɛna Vo'ohogo Daarɛ wa de saŋa woo, ba buuri saŋa woo poan, te de dɛna toolom nɔbiŋere bo ba. 17 La dela danlehom, mam la Israeldoma wa teŋasoka yɛ'ɛha, te dabeha ayoobe te Na'ayenɛ dekɛ naam saazuo, la teŋparɛ wa ba'ahɛ, ge vo'ohe dabeha ayopɔe daarɛ la poan.
18 Te Yenɛ tɔgɛ la Moses zoore la zuo ba'ahɛ, ge dekɛ kugulama ayi' la n de a nɔze'elego la, kugulama ayi' se'a te Yenɛ mɛŋa golehɛ la a mɛŋa nu'o eŋɛ a zuo la, bo Moses.